تۇرعىندارعا جاردەمدەسكەن: استاناداعى ۇلاندىق ساربازعا جەڭىلدىك جاسالدى

فوتو: ۇلتتىق ۇلاننىڭ ءباسپاسوز قىزمەتى

ۇلاندىق سارباز ەرەكشە قامقورلىعىمەن كوزگە ءتۇستى, دەپ جازدى qandastar.kz

ءىىم ۇلتتىق ۇلان ءباسپاسوز قىزمەتىنىڭ مالىمەتىنشە, 5573 اسكەري بولىمىندە وتان الدىنداعى بورىشىن وتەپ جۇرگەن جاس سارباز, قاتارداعى اڭسار جانتاس ۇجىمدىق قاۋىپسىزدىك تۋرالى شارت ۇيىمىنىڭ ءسامميتى كەزىندە قالا كوشەلەرىنىڭ بىرىندە قىزمەتتە ءجۇرىپ, حالىققا قول ۇشىن سوزعان. تايعاق جەردە ازاماتتاردىڭ قۇلاپ قالماۋى, جاراقاتتانباۋى ءۇشىن ول ارقايسىسىنا كومەكتەسىپ تۇرعان.

«سامميت كەزىندە كۇشەيتىلگەن رەجيمدە قىزمەت اتقاردىق. سول كەزدە بالالار, قارت كىسىلەردىڭ تايعاق جەردەن ارەڭ ءوتىپ جاتقاندارىن بايقاپ قالدىم. اسىرەسە بالالار, ايەل كىسىلەر مەن قارت كىسىلەردى قولداۋ ارتىق بولماس دەدىم. ەكى كۇن قاتارىنان سول جەردە قىزمەتتە تۇرىپ, تۇرعىندارعا كومەكتەستىم. مەنىڭ ورنىمدا بولعان ءار ازامات ءدال وسىلاي جاسايتىن ەدى دەپ ويلايمىن», — دەدى اڭسار جانتاس.

وسىلايشا ەكى كۇن قىزمەتىندە شامامەن 300-دەي ازاماتقا كومەگىن تيگىزگەن سارباز الەۋمەتتىك جەلىدە جۇلدىزعا اينالدى.

حالىقتىڭ ەرەكشە ءىلتيپاتىنا بولەنگەن ساربازعا قر ىشكى ىستەر ءمينيسترىنىڭ ورىنباسارى – ۇلتتىق ۇلان باس قولباسشىسى گەنەرال-مايور اڭساعان بالتابەكوۆ 10 كۇن دەمالىس بەرىلگەنىن جاريالادى.