جاڭالىقتار
«تۋريستەر شاعىم تۇسىرگەن»: جەتىسۋ وبلىسىندا شوشقا شارۋاشىلىعى جابىلدى
جەتىسۋ وبلىسى الاكول اۋدانى ۇشبۇلاق اۋىلدىق وكرۋگىنىڭ اۋماعىنداعى شوشقا شارۋاشىلىعى تۋريستەر شاعىمىنان كەيىن جابىلعان, دەپ حابارلايدى qandastar.kz ەكولوگيا جانە تابيعي رەسۋرستار مينيسترلىگىنە سىلتەمە جاساپ.
الەۋمەتتىك جەلىلەردە جۇرگىزىلگەن مونيتورينگ ناتيجەلەرى بويىنشا جەتىسۋ وبلىسى الاكول اۋدانى ۇشبۇلاق اۋىلدىق وكرۋگىنىڭ اۋماعىندا شوشقا وسىرۋمەن اينالىساتىن «Qaratas» شق ماڭىنان جاعىمسىز ءيىس شىعاتىنى جونىندە ماتەريالدار جارىق كوردى.
«بەينەروليك بيىل 21 ساۋىردە جاريالانىپ, دەرەۋ ۋاكىلەتتى مەملەكەتتىك ورگاندارمەن ءتيىستى جۇمىس جۇرگىزىلدى. اتاپ ايتقاندا, جەتىسۋ وبلىسى بويىنشا ەكولوگيا دەپارتامەنتى شارالار قابىلداۋ ءۇشىن الاكول اۋدانىنىڭ پوليتسيا بولىمىنە حات جولدادى, تيىسىنشە تابيعات قورعاۋ پوليتسياسىنىڭ قاتىسۋىمەن تەكسەرۋلەر جۇرگىزىلدى. 22 ساۋىردە شارۋا قوجالىعىنىڭ يەسى تۋريستەر ءۇشىن اكەلىنگەن جابايى شوشقالاردى ء(وسىرۋ ماقساتىندا ەمەس) اكەتكەن. انىقتالعان بۇزۋشىلىق تولىعىمەن جويىلدى.
سونداي-اق, جەتىسۋ وبلىسىنىڭ جەر رەسۋرستارىن باسقارۋ دەپارتامەنتى جوسپاردان تىس تەكسەرۋ جۇرگىزدى, ونىڭ ناتيجەلەرى بويىنشا جەر ۋچاسكەسىنىڭ نىسانالى ماقساتىمەن كوزدەلمەگەن كۇردەلى وبەكتىلەردىڭ قۇرىلىسى انىقتالدى.
شارۋاشىلىق باسشىسىنا قاتىستى اكىمشىلىك شارالار قابىلدانىپ, اتالمىش بۇزۋشىلىقتاردى جويۋ تۋرالى نۇسقاما بەرىلدى.
2025 جىلدىڭ شىلدە ايىندا وقيعا ورنىن قوسىمشا ۆيزۋالدى تەكسەرۋ بارىسىندا شوشقا ءوسىرۋ جۇمىستارى توقتاتىلعانى بەلگىلى بولدى, تابيعي لاندشافت قالپىنا كەلتىرىلىپ, قارابۇلاق وزەنىنىڭ ساعاسىندا جاياۋ تۋريستەردىڭ سۇيىكتى سەرۋەندەۋ ورنى قايتارىلدى», – دەلىنگەن حابارلامادا.
