تۋريستەرگە مۇمكىندىك: «الماتى –تۇركىستان – تاشكەنت» باعىتىندا پويىز قاتىناماق

فوتو: كتج

16 قاراشا كۇنى ساعات 13:55-تە «جولاۋشىلار تاسىمالى» اق پيلوتتىق جوبا اياسىندا الماتى ستانتسياسىنان «جىبەك جولى» تۋريستىك پويىزى «الماتى –تۇركىستان – تاشكەنت – الماتى» باعىتىمەن جولعا شىعادى, دەپ جازادى qandastar.kz «جولاۋشىلار تاسىمالىنىڭ» ءباسپاسوز قىزمەتىنە سىلتەمە جاساپ.

تۋر 16-20 قاراشا ارالىعىندا ءوتىپ, 5 كۇنگە سوزىلادى. العاشقى ساياحاتقا 115 تۋريست جولعا شىعادى. بۇل ساپار جولاۋشىلارعا قازاقستان مەن وزبەكستاننىڭ مادەني جانە تاريحي مۇرالارىمەن جاقىن تانىسۋعا مۇمكىندىك بەرەدى.

تۇركىستاندا جولاۋشىلار ءبىر كۇن ۋاقىت وتكىزىپ, قوجا احمەت ياساۋي كەسەنەسى, ارىستان-باب كەسەنەسى, وتىرار مۇراجايى جانە وزگە دە تاريحي ورىنداردى ارالايدى.

تاشكەنتتە تۋريستەر ەكى كۇن وتكىزەدى: العاشقى كۇنى ولار حازرەت يمام كەشەنى, باراقحان مەدرەسەسى, ءابۋ باكر كاففالي شاشي كەسەنەسى جانە تولە بي زيراتى سياقتى تاريحي ورىنداردى ارالاپ, وزبەكستان استاناسىنىڭ زاماناۋي كورىكتى جەرلەرىنىڭ ءبىرى «Magic City» ساياباعىنا ەكسكۋرسيا جاسايدى. تاشكەنتتەگى ەكىنشى كۇن تۋريستەردىڭ قالانى وزدىگىنەن ارالاۋىنا ارنالعان.

بارلىق ەكسكۋرسيالار كاسىبي گيدتەردىڭ جەتەكشىلىگىمەن ۇيىمداستىرىلادى, ال جولاۋشىلاردىڭ ىڭعايلى قوزعالىسى ءۇشىن زاماناۋي اۆتوبۋستار قاراستىرىلعان.

«Jibek joly» پويىزى 5 ۆاگوننان تۇرادى: 4 كۋپەلى ۆاگون جانە جولاۋشىلارعا ءۇش مەزگىل تاماق ۇسىنىلاتىن ۆاگون-مەيرامحانا بار.

ساپار بارىسىندا پويىزدا ءتۇرلى ويىن-ساۋىق شارالارى ۇيىمداستىرىلادى: شاحمات, UNO سياقتى ۇستەل ويىندارى جانە تۋريستەر ءۇشىن سىيلىقتار ويناتىلاتىن ۇتىس ويىن وتكىزىلەدى.

جولاۋشىلاردىڭ ىڭعايلىلىعى ءۇشىن پويىزدا فيلمدەر مەن دەرەكتى باعدارلامالاردى كورۋگە, مۋزىكا تىڭداۋعا جانە كىتاپ وقۋعا بولاتىن Vputi.kz مۋلتيمەديالىق جۇيەسى قولجەتىمدى بولادى. سونداي-اق, جولاۋشىلارعا تۋردىڭ باعدارلاماسى مەن قالالاردىڭ كارتالارى بەينەلەنگەن بۋكلەتتەر ۇسىنىلادى. ءاربىر جولاۋشىعا ەستەلىك رەتىندە «تۇركىستان جاڭعىرۋ» اتتى تۋريستىك كىتاپ سىيعا بەرىلەدى.

تۋرپاكەت بيلەتى تۋريستىك اگەنتتىكتەر ارقىلى ساتىلدى.