تۋريزم سالاسىندا قازاق-وزبەك ىنتىماعى ارتادى

قازاقستان مەن وزبەكستان تۋريزم سالاسىنداعى ىنتىماقتاستىقتى نىعايتپاق نيەتتە. ەكى ەلدىڭ بۇل باعىتتا الەۋەتى جەتكىلىكتى.

ماسەلەن, جىلدار بويى ورنىعىپ, قالىپقا تۇسكەن ءداستۇرلى ساياحات تۋرلارى بار. ودان بولەك, قوس مەملەكەت گاسترونوميالىق تۋريزم مەن تاۋ-شاڭعى سپورتى سالاسىن بىرلەسىپ دامىتۋعا كۇش سالماق.  وسى ماقساتتا ەلدەر اراسىندا تىڭ تاجىريبە الماسۋ ءىسى باستالىپ كەتتى. راۋان مىڭباەۆ, ءتىلشى: — وزبەكستاننىڭ ورتالىق بولىگىندە ورنالاسقان شاعىن عانا شاحريسابز شەتەلدىك عانا ەمەس, جەرگىلىكتى جۇرت ءۇشىن دە تۋريستىك تۇرعىدا كەڭ تانىلا قويماعان شاھار. دەگەنمەن كونە تاريحقا باي. مۇندا ايگىلى ءامىر-تەمىر دۇنيەگە كەلگەن. ول بيلىك قۇرعان جىلدارداعى رەزيدەنتسيا ءالى ساقتاۋلى.

قابىرعاسى سوناۋ ۇشار بيىكتەن كورىنەدى. ەجەلگى تەمىر اۋلەتىنە تيەسىلى ساۋلەتتىك ۇلگىسى دە بايقالادى.  ال بيلەۋشىنىڭ الىپ ەسكەرتكىشىنە كەلسەك, ونىڭ ءجونى ءتىپتى بولەك. ەل بويىنشا مۇنداي ءىرى ساۋلەت تۋىندىسىنىڭ ءۇش ءتۇرى بار. تاشكەنت, سامارقان جانە شاحريسابزدا. اۋەلگى ەكى ەسكەرتكىشتە ءامىر-تەمىردىڭ ات ۇستىندە جانە تاقتا وتىرعانى, سوڭعىسىندا تىكەسىنەن تۇك تۇرعانى بەينەلەنگەن. سەرگەي زنامەنسكي, ساياحاتشى: — وزبەكستانعا تۋريستىك ماقساتتا كەلدىم. بىرنەشە تاريحي قالادا بولدىم.

ءبارى ۇناپ جاتىر. حيۋا, بۇقارا, سامارقان, ەندى مىنە شاحريسابزعا تابان تىرەدىم. وزدەرىڭىز كورىپ تۇرعانداي, ساپارىم ءساتتى دەسەم دە بولادى. ءاپ-ساتتە گاسترونوميالىق شارانىڭ قوناعىنا اينالدىم. ساياحاتشىلارعا ۇنايتىن نەگىزگى ەرەكشەلىك تە وسى. ماتەريالدىق مۇرا نىساندارىنان بولەك, جەرگىلىكتىڭ جۇرتتىڭ ءداستۇر-سالتى مەن تىنىس-تىرشىلىگى قىزىق. وزبەكستان وسى سالاداعى ەرەكشەلىكتەرىن ەسكەرىپ, سىرتتان كوبىرەك مەيمان تارتۋدىڭ جولىن قاراستىرىپ جاتىر. شاحريسابز شاعىن قالا بولعانىمەن, تۋريستەر سانى ءوسىپ كەلەدى. «ماسەلەن, بىلتىر قازاقستاننان 20 مىڭ ساياحاتشى كەلدى», — جەرگىلىكتى اكىمدىك. ۋميد شاديەۆ, وزبەكستان تۋريزم كوميتەتىنىڭ توراعاسى: — «شىمكەنت-تاشكەنت-سامارقان» باستالاتىن تۋريستىك باعىت وتە تانىمال بولىپ تۇر. قازاقستاندىق ساياحاتشىلار وزبەكستانعا ءجيى ات باسىن بۇرادى.

ءبىزدىڭ دە تۋريستەرىمىز الماتىنىڭ شىمبۇلاق تاڭ شاڭعى دەمالىس ايماعى جانە قازاقستاننىڭ باسقا دا وڭىرلەرىنە بارۋدى ءجون سانايدى. ەندى ءبىز ەكى ەلدىڭ تاۋ-شاڭعى ءتۋريزمى سالاسىنداعى بايلانىستى دا  ودان ءارى نىعايتۋعا كىرىسىپ جاتىر. ايتا كەتەيىك, ەكونوميكالىق ىنتىماقتاستىق ۇيىمى ەلدەرىنىڭ تۋريزم استاناسى مارتەبەسى بيىل يراننىڭ اردەبيل قالاسىنان شاحريسابزعا اۋىستى. سوعان ساي, شاھار اكىمشىلىگى قازاقستان, يران, ازەربايجان, قىرعىزستان, وزبەكستان سىندى ەل وكىلدەرىنىڭ باسىن قوسىپ, ارنايى فورۋم ۇيىمداستىردى. باعدارلاما اياسىندا اۋەلى اسپازدار بايقاۋى ءوتتى. وندا ەلىمىزدىڭ ءداستۇرلى تاعامدارى مەن سۋسىندارى تانىستىرىلدى.  شامشات قۇرماناليەۆا, كاسىپكەر: — ماعان تۋريزم باسقارماسىنان ۇسىنىس ءتۇستى. بىزدە ەت اسپايتىن قازاق جوق قوي. مىنانىڭ ءبارىن ءوز قولىممەن دايىنداپ شىقتىم. ءبىراز ادامدارعا ءدامىن كورسەتكەن ەدىك, تاڭقالىپ جاتىر. ۆەنەرا تابىس, جەتىگەنشى, «قازاقكونتسەرت» ۇيىمىنىڭ جەكە ورىنداۋشىسى: — شاحريسابز قالاسىنا ۇلتتىق ونەرىمىز جەتىگەن ونەرىن الىپ كەلدىم. كوپتەگەن ەلدەن كەلگەن قوناقتارعا ونەر كورسەتۋگە كەلدىك.
ەندى بۇل قالاعا العاش كەلۋىم. ەرەكشە اسەردە بولدىم. فورۋم الاڭىندا قازاقستاندىق تاراپ تۋريستىك سالا الەۋەتىن ودان ءارى دامىتۋعا قاجەتتى ۇسىنىستارىن تالقىلادى. كونە قالالار مەن مادەني مۇرا نىساندارىن كەڭ ناسيحاتتاۋ باعىتىندا تاجىريبە الماستى.