جاڭالىقتار
تۋريزم جانە سپورت مينيسترلىگى شايدوروۆتىڭ سىنىنا جاۋاپ بەردى
فوتو:مينيسترلىك
تۋريزم جانە سپورت مينيسترلىگى بوستونداعى الەم چەمپيوناتىندا كۇمىس مەدەل يەلەنىپ, ۇزدىك ۇشتىكتىڭ قاتارىنا ەنگەن كونكيمەن مانەرلەپ سىرعاناۋشى ميحايل شايدوروۆتىڭ سىنىنا جاۋاپ بەردى, دەپ حابارلايدى qandastar.kz Zakon.kz-كە سىلتەمە جاساپ.
بۇعان دەيىن شايدوروۆ ءوز وتانىندا جاتتىعاتىن ورىن جوق ەكەنىن, سوعان بايلانىستى وزگە ەلدەردەن «مۇز ايدىن» ىزدەۋگە ءماجبۇر ەكەنىن ايتقان. مينيسترلىك بۇل ەسكەرتۋدى ءادىل دەپ سانايدى.
«ەلىمىزدىڭ جەتەكشى سپورتشىلارىنىڭ ءبىرى ميحايل شايدوروۆتىڭ سپورتتىق دايارلىعىنا قاجەتتى ءتيىستى جاعدايلاردىڭ جوقتىعىنان ءبىز حاباردارمىز. بۇل فاكت قازاقستان پرەزيدەنتىنىڭ سپورت سالاسىنداعى ۆەرتيكالدى باسقارۋدى قالپىنا كەلتىرۋ جونىندەگى تاپسىرماسىنىڭ نەگىزدىلىگى مەن دەر ۋاقىتىندا كوتەرىلىپ وتىرعانىن تاعى دا راستايدى. وسى رەفورمانىڭ نەگىزگى باعىتتارىنىڭ ءبىرى جەرگىلىكتى اتقارۋشى ورگانداردان جوعارى جەتىستىكتەرگە دايىندالۋ ءۇشىن سپورت وبەكتىلەرىن تۋريزم مينيسترلىگىنە بەرۋ بولىپ تابىلادى», – دەپ ءتۇسىندىردى ۆەدومستۆودان.
مينيسترلىك ەلىمىزدە ۇلتتىق قۇرامانى وليمپيادا ويىندارىنا دايىنداۋ جوسپارى بەكىتىلگەنىن, ونىڭ شەڭبەرىندە مەدالدارعا الەۋەتتى ۇمىتكەر مىقتى سپورتشىلار ايقىندالعانىن حابارلادى. ولاردىڭ ارقايسىسىنا, سونىڭ ىشىندە شايدوروۆقا قاتىستى جاۋاپتى قۇرىلىمدارعا ناقتى مىندەتتەر بەكىتىلگەن.
«بۇل باعىتتاعى جۇمىس جالعاسۋدا. مينيسترلىك تۇرعىلىقتى جەرىنە نەمەسە تىركەۋ ورنىنا قاراماستان وليمپيادالىق دايىندىق جوسپارىنا ەنگىزىلگەن ءاربىر سپورتشىعا قاجەتتى قولداۋدى قامتاماسىز ەتەدى», — دەپ تولىقتىرادى مينيسترلىكتەن.
بۇعان دەيىن قر تۋريزم جانە سپورت ءمينيسترى ەربول مىرزابوسىنوۆ ەلىمىزدىڭ قىسقى سپورت تۇرلەرىندەگى ەڭ ۇزدىك وكىلدەرى دەنيس نيكيشامەن (شورت-ترەك) جانە ميحايل شايدوروۆپەن (مانەرلەپ سىرعاناۋ) كەزدەسكەنىن حابارلاعانبىز. تاراپتار يتاليانىڭ ميلان قالاسىندا وتەتىن 2026 جىلعى وليمپياداعا دايىندىق بارىسىن تالقىلادى.
