TÜRKFİLM: تۇرىك كينەماتوگرافيستەرى قازاقستاننىڭ تابيعي لوكاتسيالارىنا جوعارى قىزىعۋشىلىق تانىتتى

فوتو: كينو ورتالىعى

تۇركسوي باستاماسىمەن قۇرىلعان TÜRKFİLM – تۇركى الەمى كينەماتوگرافيستەرىنىڭ وداعى اياسىندا ستامبۇلدا پانەلدىك سەسسيا ءوتتى. TÜRKFİLM قۇرامىنا ازەربايجان, قازاقستان, قىرعىزستان, وزبەكستان, تۇرىكمەنستان جانە تۇركيانىڭ ۇلتتىق كينو مەكەمەلەرىنىڭ وكىلدەرى كىرەدى. جيىنعا تۇركى مەملەكەتتەرىنىڭ كينو سالاسىنداعى جەتەكشىلەرى قاتىسىپ, ورتاق كينوكەڭىستىكتىڭ دامۋ جولىن تالقىلادى. تۇرىك كينەماتوگرافيستەرى ءىس-شارادا قازاقستاننىڭ تابيعي لوكاتسيالارىنا ەرەكشە قىزىعۋشىلىق تانىتىپ, ولاردى كينوجوبالارى ءۇشىن تارتىمدى ءارى اسەرلى ورىن رەتىندە قاراستىردى, دەپ جازدى qandastar.kz

سەسسياعا ۇلتتىق كينونى قولداۋ مەملەكەتتىك ورتالىعىنىڭ باسقارما توراعاسى قۇرمانبەك جۇماعالي قاتىسىپ, ەلىمىزدىڭ كينويندۋسترياسى, ونىڭ دامۋ قارقىنى جانە حالىقارالىق سەرىكتەستىك الەۋەتى تۋرالى بايانداما جاسادى. باسقارما توراعاسى ورتالىقتىڭ كينوجوبالاردى ىرىكتەۋ مەحانيزمدەرى, بىرلەسكەن ءوندىرىس بويىنشا ءوتىنىم بەرۋ ءتارتىبى, سونداي-اق وتاندىق كينووندىرىسكە قولداۋ كورسەتۋ قۇرالدارى تۋرالى كەڭىنەن باياندادى.

قۇرمانبەك جۇماعاليدىڭ ايتۋىنشا, سوڭعى جىلدارى قازاقستاندا كينووندىرۋشى كومپانيالاردىڭ سانى ارتقان, جىل سايىن شامامەن 100-گە جۋىق وتاندىق فيلم جارىق كورەدى. بۇگىنگى تاڭدا ەل اۋماعىندا 500-دەن استام وندىرىستىك كومپانيا تىركەلگەن, ولاردىڭ باسىم بولىگى الماتى قالاسىندا شوعىرلانعان.

كينو ينفراقۇرىلىمىنا كەلسەك, قازاقستاندا 113 كينوتەاتردا 446 ەكران جۇمىس ىستەيدى. جىل سايىن 23 ميلليوننان استام كورەرمەن كينوتەاترلارعا بارادى, بۇل – كينو ونەرىنە دەگەن تۇراقتى قىزىعۋشىلىقتىڭ دالەلى.

باسقارما توراعاسى مەملەكەت باسشىسى قاسىم-جومارت توقاەۆ قول قويعان كينونى قولداۋعا باعىتتالعان جاڭا زاڭ تۋرالى دا ءسوز قوزعادى. اتالعان زاڭ كينوجوبالاردى ىرىكتەۋ ءراسىمىن جەتىلدىرۋگە, كينو سالاسى ماماندارىنا كاسىبي جانە الەۋمەتتىك قولداۋ كورسەتۋگە باعىتتالعان.

سونداي-اق, قۇرمانبەك جۇماعالي قازاقستاندا زاڭ جۇزىندە بەكىتىلگەن ريبەيت جۇيەسى تۋرالى باياندادى.

«ءبىز بىرلەسكەن كينوجوبالارعا, ارىپتەستىككە جانە حالىقارالىق ينۆەستيتسيالارعا ءاردايىم اشىقپىز. كينو – بۇل تەك مادەنيەت پەن ونەر عانا ەمەس, حالىقتار اراسىنداعى ءوزارا تۇسىنىستىك پەن سەنىمدى ارتتىراتىن قۋاتتى قۇرال. تۇركى مەملەكەتتەرى اراسىنداعى شىعارماشىلىق بايلانىستاردى كۇشەيتۋ – ورتاق ماقساتىمىز», – دەدى ول.

سەسسيا اياسىندا تۇركى ەلدەرىنىڭ تاريحىن ەكران تىلىمەن بەينەلەۋ, بىرلەسكەن جوبالاردى دامىتۋ جانە حالىقارالىق فەستيۆالدەرگە قاتىسۋدى كەڭەيتۋ ماسەلەلەرى قوزعالدى. قۇرمانبەك جۇماعالي ءوز سوزىندە قازاقستان بارلىق قاتىسۋشىلاردى اقتاۋدا وتەتىن فەستيۆالدە قارسى الۋعا دايىن ەكەنىن اتاپ ءوتتى.

«قورقىت فەستيۆالى – شىعارماشىلىق ديالوگتىڭ, تاجىريبە الماسۋدىڭ جانە ورتاق جوبالاردى دامىتۋدىڭ ماڭىزدى الاڭى. ءبىز بۇل فەستيۆالدىڭ تۇركى ەلدەرى اراسىنداعى مادەني بايلانىستاردى ودان ءارى تەرەڭدەتە تۇسەتىنىنە سەنىمدىمىز», – دەدى ول.

ەسكە سالا كەتەيىك, بيىل اقتاۋدا تۇركى الەمىنىڭ مادەني تۇتاستىعىن كورسەتەتىن جانە ورتاق جوبالاردى دامىتۋعا سەرپىن بەرەتىن قورقىت حالىقارالىق كينوفەستيۆالى وتەدى.