TÜRKFİLM: Túrik kınematografısteri Qazaqstannyń tabıǵı lokaııalaryna joǵary qyzyǵýshylyq tanytty

Foto: Kıno ortalyǵy

TÚRKSOI bastamasymen qurylǵan TÜRKFİLM – Túrki álemi kınematografısteriniń odaǵy aıasynda Stambulda paneldik sessııa ótti. TÜRKFİLM quramyna Ázerbaıjan, Qazaqstan, Qyrǵyzstan, О́zbekstan, Túrikmenstan jáne Túrkııanyń ulttyq kıno mekemeleriniń ókilderi kiredi. Jıynǵa túrki memleketteriniń kıno salasyndaǵy jetekshileri qatysyp, ortaq kınokeńistiktiń damý jolyn talqylady. Túrik kınematografısteri is-sharada Qazaqstannyń tabıǵı lokaııalaryna erekshe qyzyǵýshylyq tanytyp, olardy kınojobalary úshin tartymdy ári áserli oryn retinde qarastyrdy, dep jazdy qandastar.kz

Sessııaǵa Ulttyq kınony qoldaý memlekettik ortalyǵynyń Basqarma tóraǵasy Qurmanbek Jumaǵalı qatysyp, elimizdiń kınoındýstrııasy, onyń damý qarqyny jáne halyqaralyq seriktestik áleýeti týraly baıandama jasady. Basqarma tóraǵasy Ortalyqtyń kınojobalardy irikteý mehanızmderi, birlesken óndiris boıynsha ótinim berý tártibi, sondaı-aq otandyq kınoóndiriske qoldaý kórsetý quraldary týraly keńinen baıandady.

Qurmanbek Jumaǵalıdyń aıtýynsha, sońǵy jyldary Qazaqstanda kınoóndirýshi kompanııalardyń sany artqan, jyl saıyn shamamen 100-ge jýyq otandyq fılm jaryq kóredi. Búgingi tańda el aýmaǵynda 500-den astam óndiristik kompanııa tirkelgen, olardyń basym bóligi Almaty qalasynda shoǵyrlanǵan.

Kıno ınfraqurylymyna kelsek, Qazaqstanda 113 kınoteatrda 446 ekran jumys isteıdi. Jyl saıyn 23 mıllıonnan astam kórermen kınoteatrlarǵa barady, bul – kıno ónerine degen turaqty qyzyǵýshylyqtyń dáleli.

Basqarma tóraǵasy Memleket basshysy Qasym-Jomart Toqaev qol qoıǵan kınony qoldaýǵa baǵyttalǵan jańa zań týraly da sóz qozǵady. Atalǵan zań kınojobalardy irikteý rásimin jetildirýge, kıno salasy mamandaryna kásibı jáne áleýmettik qoldaý kórsetýge baǵyttalǵan.

Sondaı-aq, Qurmanbek Jumaǵalı Qazaqstanda zań júzinde bekitilgen rıbeıt júıesi týraly baıandady.

«Biz birlesken kınojobalarǵa, áriptestikke jáne halyqaralyq ınvestıııalarǵa árdaıym ashyqpyz. Kıno – bul tek mádenıet pen óner ǵana emes, halyqtar arasyndaǵy ózara túsinistik pen senimdi arttyratyn qýatty qural. Túrki memleketteri arasyndaǵy shyǵarmashylyq baılanystardy kúsheıtý – ortaq maqsatymyz», – dedi ol.

Sessııa aıasynda túrki elderiniń tarıhyn ekran tilimen beıneleý, birlesken jobalardy damytý jáne halyqaralyq festıvalderge qatysýdy keńeıtý máseleleri qozǵaldy. Qurmanbek Jumaǵalı óz sózinde Qazaqstan barlyq qatysýshylardy Aqtaýda ótetin festıvalde qarsy alýǵa daıyn ekenin atap ótti.

«Qorqyt festıvali – shyǵarmashylyq dıalogtyń, tájirıbe almasýdyń jáne ortaq jobalardy damytýdyń mańyzdy alańy. Biz bul festıvaldiń túrki elderi arasyndaǵy mádenı baılanystardy odan ári tereńdete túsetinine senimdimiz», – dedi ol.

Eske sala keteıik, bıyl Aqtaýda Túrki áleminiń mádenı tutastyǵyn kórsetetin jáne ortaq jobalardy damytýǵa serpin beretin Qorqyt halyqaralyq kınofestıvali ótedi.