تۇركىمەنستاندا قازاقستاندىق بلوگەر تۇتقىندالدى

فوتو: جەكە قورىنان 

تۇركىمەنستان شەكاراشىلارى «ەۆرو سويۋز» دەگەن لاقاپ اتپەن تانىمال قازاقستاندىق بلوگەر ەرحات قۇسايىنوۆتى تۇتقىندادى, دەپ جازدى qandastar.kz

بلوگەر الماتىدان ابۋ-دابيگە اۆتوستوپپەن بارۋدى جوسپارلاپ, ساپاردا بولعان. سوڭعى رەت 17 قاراشادا بايلانىسقا شىعىپ, سامارقاند پەن بۇحارادا بولعانى تۋرالى ايتقان. وسىدان كەيىن بلوگەر الەۋمەتتىك جەلىلەردەن عايىپ بولىپ, دوستارى دابىل قاعا باستادى.

ەرحاتتىڭ جوعالىپ كەتكەنى تۋرالى ونىڭ دياس ەسىمدى بلوگەر دوسى ءبىرىنشى بولىپ حابارلادى. ول ءوز پاراقشاسىندا وقىرماندارىنان كومەك سۇراپ, ۆيدەو جاريالادى. كەيىنىرەك دياس ەرحاتتىڭ تابىلعانىن, ول تۇركىمەنستانعا كەلىپ, مەملەكەتتىك ورگاندارمەن قيىندىقتارعا تاپ بولعانىن جازدى.

«دوستار, ەرحات تابىلدى! قازىرگى ۋاقىتتا ول بايلانىسقا شىعا المايدى. تەك ونىڭ ءتىرى جانە تۇركىمەنستاندا ەكەنىن بىلەمىز. شاماسى, سول جاقتاعى مەملەكەتتىك ورگاندارعا قاتىستى ماسەلەلەر بار, ۆيزاعا نەمەسە قۇجاتتارعا بايلانىستى بولۋى مۇمكىن, بۇل ءالى انىق ەمەس», – دەپ جازدى بلوگەردىڭ دوسى.

اقپاراتتى سىرتقى ىستەر مينيسترلىگىنىڭ رەسمي وكىلى ايبەك سمادياروۆ راستادى.

«ونى تۇركىمەن شەكاراشىلارى وزبەك-تۇرىكمەن مەملەكەتتىك شەكاراسىن زاڭسىز كەسىپ وتكەنى ءۇشىن ۇستادى, ءبىزدىڭ ەلشىلىك بۇل ماسەلەدەن حاباردار, كونسۋل ۇستالعان ازاماتپەن كەزدەسۋدى سۇرادى», – دەدى سمادياروۆ.