Túrkimenstanda qazaqstandyq bloger tutqyndaldy

Foto: jeke qorynan 

Túrkimenstan shekarashylary «Evro Soıýz» degen laqap atpen tanymal qazaqstandyq bloger Erhat Qusaıynovty tutqyndady, dep jazdy qandastar.kz

Bloger Almatydan Abý-Dabıge avtostoppen barýdy josparlap, saparda bolǵan. Sońǵy ret 17 qarashada baılanysqa shyǵyp, Samarqand pen Buharada bolǵany týraly aıtqan. Osydan keıin bloger áleýmettik jelilerden ǵaıyp bolyp, dostary dabyl qaǵa bastady.

Erhattyń joǵalyp ketkeni týraly onyń Dıas esimdi bloger dosy birinshi bolyp habarlady. Ol óz paraqshasynda oqyrmandarynan kómek surap, vıdeo jarııalady. Keıinirek Dıas Erhattyń tabylǵanyn, ol Túrkimenstanǵa kelip, memlekettik organdarmen qıyndyqtarǵa tap bolǵanyn jazdy.

«Dostar, Erhat tabyldy! Qazirgi ýaqytta ol baılanysqa shyǵa almaıdy. Tek onyń tiri jáne Túrkimenstanda ekenin bilemiz. Shamasy, sol jaqtaǵy memlekettik organdarǵa qatysty máseleler bar, vızaǵa nemese qujattarǵa baılanysty bolýy múmkin, bul áli anyq emes», – dep jazdy blogerdiń dosy.

Aqparatty syrtqy ister mınıstrliginiń resmı ókili Aıbek Smadııarov rastady.

«Ony túrkimen shekarashylary ózbek-túrikmen memlekettik shekarasyn zańsyz kesip ótkeni úshin ustady, bizdiń elshilik bul máseleden habardar, konsýl ustalǵan azamatpen kezdesýdi surady», – dedi Smadııarov.