تۇركىستان وبلىسىندا ءبىر اۋىلدى پوليتسيا كۇزەتىپ تۇر: اكىمدىك وكىلدەرى جاعدايعا قاتىستى تۇسىنىك بەردى

فوتو: nur.kz

تۇركىستان وبلىسى سارىاعاش اۋدانى جىبەك جولى اۋىلىندا الەۋمەتتىك جەلى ارقىلى جاستار اراسىندا 11-سىنىپ وقۋشىسى «14 جاسار قىزدى زورلاماق بولدى» دەگەن سىبىس تاراعان.

اۋىل تۇرعىندارىنىڭ سوزىنشە, سودان كەيىن اشۋلى توپ كۇدىكتىنى ىزدەپ, ونىڭ جانە تۋىستارىنىڭ ۇيىنە باسىپ كىرمەك بولعان. پوليتسيا وقيعاعا بايلانىستى قىلمىستىق ءىس قوزعادى, دەپ حابارلايدى KAZ.NUR.KZ ءتىلشىسى. تۇركىستان وبلىسى سارىاعاش اۋدانى جىبەك جولى اۋىلى ءۇش كۇن بويى بايلانىس پەن ينتەرنەتسىز قالدى.

14 شىلدەدەن 15 شىلدەگە قاراعان ءتۇنى اۋىلدا دۇربەلەڭ بولعان. بۇل تۋرالى اۋىل تۇرعىندارى ايتتى. سوزىنشە, اۋىلدا جاستار اراسىندا 11-سىنىپ وقۋشىسى 9-سىنىپ وقيتىن قىزدى زورلاماق بولدى دەگەن سىبىس تاراعان, كەيىن اشۋلى توپ كۇدىكتىنى ىزدەپ, ۇيىنە جانە تۋىسىنىڭ ۇيىنە تاس اتىپ, «شابۋىل جاساعان». اۋىل تۇرعىندارىنىڭ سوزىنە قاراعاندا وقيعادان بىرنەشە ادام زارداپ شەككەن, ەكى ۇيگە زاقىم كەلگەن.

پورتال ءتىلشىسى وقيعا ورنىنا باردى. 19 شىلدەدەگى جاعداي بويىنشا اۋىلدا ءار كوشەدەن پوليتسيانى كەزدەستىرۋگە بولادى جانە اۋىلعا كىرە بەرىستە قارۋ اسىنعان ءتارتىپ ساقشىلارى ءجۇر. زاقىم كەلگەن ۇيدەن تاس ءتيىپ شاعىلعان ەسىك اينەكتەرىن بايقاۋعا بولادى. اۋىل حالقى ۇرەي ءالى سەيىلمەگەنىن ايتادى.

جىبەك جولى اۋىلىنداعى وقيعا تۋرالى اكىمدىك وكىلدەرى پىكىر ءبىلدىردى. جەرگىلىكتى بيلىك مالىمەتىنشە, تاراپتار تۇسىنىسپەۋشىلىگى 15 مينۋتتا شەشىلگەن. قازىر قۇزىرلى ورگان وكىلدەرى جان-جاقتى باقىلاپ ءجۇر دەگەن جاۋاپتىلار دۇربەلەڭدە بىردە-ءبىر ادام زارداپ شەكپەگەنىن ايتتى. «جىبەك جولى اۋىلدىق وكرۋگىندە جاستار تاراپىنان تۇسىنبەۋشىلىك بولعان. جاستار اراسىندا الەۋمەتتىك جەلىدە 14 جاستاعى قىزدى زورلاماقشى بولدى دەگەن اقپارات تاراعان. سودان كەيىن جاستار دۇربەلەڭگە تۇسكەن. دەگەنمەن اۋىل ۇلكەندەرى دەر كەزىندە الدىن الىپ, كەلەڭسىز وقيعا بولعان جوق. قىلمىستىق ءىس قوزعالدى. جالعان اقپارات تاراتۋ بويىنشا بىرنەشە ازامات تەرگەلىپ جاتىر», – دەيدى سارىاعاش اۋدانى اكىمىنىڭ ورىنباسارى الديار قوزىباەۆ.

سارىاعاش اۋداندىق سوتىنىڭ مالىمەتىنشە, «زورلاۋ», «قىلمىسقا وقتالۋ» كۇدىگىمەن 16 جاستاعى ءجاسوسپىرىم قامالعان. ودان بولەك, «بۇزاقىلىق» بابىمەن 19 جاستاعى جىگىت قاماۋعا الىنعان. سوت ول ەكەۋىن 10 كۇنگە قاماۋعا سانكتسيا بەرگەن. ۇيىنە زاقىم كەلگەن وتباسى پورتال تىلشىسىنە سۇقبات بەرۋدەن باس تارتتى. ولار قاۋىپسىزدىگىنە الاڭدايتىنىن ايتتى. ايتا كەتەيىك, وزبەكستانمەن شەكارالاس جاتقان سارىاعاش اۋدانى جىبەك جولى اۋىلىندا 17 ۇلتتىڭ وكىلى تۇرادى. ال حالقىنىڭ سانى 11 مىڭنان اسادى. تۇرعىندار نەگىزىنەن ساۋدا-ساتتىقپەن اينالىسادى.