تۇركىستان وبلىسىندا ەر ادام ايەلىن بالتامەن ولتىرگەن

فوتو: سكرين

تۇركىستان وبلىسىنىڭ كارامۋرت اۋىلىندا قايعىلى وقيعا بولدى. 45 جاستاعى ەر ادام قىزعانىشتىڭ سالدارىنان 14 جىل بىرگە تۇرعان ايەلىن اياۋسىز ءولتىرىپ, ارتىنشا ءوز-وزىنە قول سالعان, دەپ حابارلايدى qandastar.kz

ەڭ اۋىر جايت – تاڭعى ۋاقىتتا ولاردىڭ ءمايىتىن ءتورت بالاسى تاۋىپ العان. وسىلايشا ءبىر تۇندە ءتورت ءبۇلدىرشىن جەتىم قالدى. قازىر ولار بالالار ۇيىنە جەتكىزىلدى.

وقيعا 13 جاستاعى قىزدىڭ مەكتەپكە دايىندالىپ جاتقان ساتىندە انىقتالعان. ول اۋلادا جاتقان اناسىنىڭ قانعا بويالعان دەنەسىن كورگەن. ايەلدىڭ دەنەسى قاتتى زاقىمدالىپ, تۋىستارى بىردەن تانىماي قالعان. قىزدىڭ جان ايقايىن ەستىگەن كورشىلەر وقيعا ورنىنا جينالعان.

مارقۇمنىڭ اعاسى مىرزاكەرىم مىرقاديەۆ بولعان جاعدايدى كوز جاسىمەن ەسكە الدى:

«بۇكىل بەتى قان-جوسا بولدى. العاشىندا نەمەن ۇرعانىن بىلمەدىك. كەيىن بەلگىلى بولدى – مولوتوكپەن باسىنان ۇرىپ, ميىن جانشىپ تاستاعان», – دەيدى ول.

ال اپكەسى مۇحاببات مىرقاديەۆا دەنەنى جۋىپ جاتقانداعى كورىنىستى بىلاي سيپاتتادى:

«شاشى ج ۇلىنعان, دەنەسى تۇگەل قان مەن كىرگە بويالعان. باسىن قوقىسقا, شوپكە تىعىپ تاستاپتى. جۋىپ جاتقاندا الاقاندارىم تاستاردان جارالاندى. جاندى جەر قالماعان. بەتىن ايتۋعا دا قورقامىن – ادام تانىماستاي كۇيدە ەدى», – دەيدى ول.

كوپ ۇزاماي اكەنىڭ دەنەسى دە تابىلدى. ول اجەتحانادا اسىلىپ قالعان. ارتىندا اۋديوۇندەۋ قالدىرىپتى.

تۋىستارىنىڭ ايتۋىنشا, وتباسى ىشىندەگى جانجال ءتۇن ورتاسىندا باستالىپ, تاڭعا دەيىن جالعاسقان. ەر ادام جازىپ كەتكەن ۇندەۋىندە ايەلىن قىزعانىشتان ۇرعانىن ايتقان.

«ول: „ايەلىمە قول كوتەردىم. سەبەبى ونىڭ كوپ قىلىعىن ەستىدىم. بىرەۋلەر كولىكپەن جۇرگەنىن ايتتى“, – دەپ ءتۇسىندىردى. بار كىناسى – قىزعانىش. بىراق قولىندا ناقتى دالەل بولماعان», – دەيدى مارقۇمنىڭ اعاسى.

تۇركىستان وبلىسى پوليتسيا دەپارتامەنتى دە بۇل دەرەكتى راستادى:

«الدىن الا مالىمەت بويىنشا, جەرگىلىكتى تۇرعىن ايەلىمەن جانجال كەزىندە وعان اۋىر جاراقاتتار سالىپ, سونىڭ سالدارىنان ايەل كوز جۇمعان. كەيىن ول اۋديوۇندەۋ قالدىرىپ, وزىنە قول سالعان», – دەدى ۆەدومستۆودان.

قايتىس بولعان ەرلى-زايىپتىلاردىڭ ارتىندا ءتورت بالا قالدى. ەڭ ۇلكەنى – 13 جاستاعى قىز, كىشىسى – ءۇش جاسار ۇل. بالالاردىڭ ءبىرى مۇگەدەكتىك ساناتىندا. تۋىستارىنىڭ ايتۋىنشا, ەر ادام تۇراقتى جۇمىس ىستەمەگەن, ال ايەلى بالا كۇتىمىنە بايلانىستى ۇيدە وتىرعان.

بەلگىلى بولعانداي, بۇعان دەيىن دە كۇدىكتى قىزعانىشتىڭ كەسىرىنەن بۇرىنعى جۇبايىن كولىگىمەن قاعىپ, سەگىز جىلعا باس بوستاندىعىنان ايىرىلعان.