Túrkistan oblysynda er adam áıelin baltamen óltirgen

Foto: skrın

Túrkistan oblysynyń Karamýrt aýylynda qaıǵyly oqıǵa boldy. 45 jastaǵy er adam qyzǵanyshtyń saldarynan 14 jyl birge turǵan áıelin aıaýsyz óltirip, artynsha óz-ózine qol salǵan, dep habarlaıdy qandastar.kz

Eń aýyr jaıt – tańǵy ýaqytta olardyń máıitin tórt balasy taýyp alǵan. Osylaısha bir túnde tórt búldirshin jetim qaldy. Qazir olar balalar úıine jetkizildi.

Oqıǵa 13 jastaǵy qyzdyń mektepke daıyndalyp jatqan sátinde anyqtalǵan. Ol aýlada jatqan anasynyń qanǵa boıalǵan denesin kórgen. Áıeldiń denesi qatty zaqymdalyp, týystary birden tanymaı qalǵan. Qyzdyń jan aıqaıyn estigen kórshiler oqıǵa ornyna jınalǵan.

Marqumnyń aǵasy Myrzakerim Myrqadıev bolǵan jaǵdaıdy kóz jasymen eske aldy:

«Búkil beti qan-josa boldy. Alǵashynda nemen urǵanyn bilmedik. Keıin belgili boldy – molotokpen basynan uryp, mıyn janshyp tastaǵan», – deıdi ol.

Al ápkesi Muhabbat Myrqadıeva deneni jýyp jatqandaǵy kórinisti bylaı sıpattady:

«Shashy julynǵan, denesi túgel qan men kirge boıalǵan. Basyn qoqysqa, shópke tyǵyp tastapty. Jýyp jatqanda alaqandarym tastardan jaralandy. Jandy jer qalmaǵan. Betin aıtýǵa da qorqamyn – adam tanymastaı kúıde edi», – deıdi ol.

Kóp uzamaı ákeniń denesi de tabyldy. Ol ájethanada asylyp qalǵan. Artynda aýdıoúndeý qaldyrypty.

Týystarynyń aıtýynsha, otbasy ishindegi janjal tún ortasynda bastalyp, tańǵa deıin jalǵasqan. Er adam jazyp ketken úndeýinde áıelin qyzǵanyshtan urǵanyn aıtqan.

«Ol: „Áıelime qol kóterdim. Sebebi onyń kóp qylyǵyn estidim. Bireýler kólikpen júrgenin aıtty“, – dep túsindirdi. Bar kinási – qyzǵanysh. Biraq qolynda naqty dálel bolmaǵan», – deıdi marqumnyń aǵasy.

Túrkistan oblysy polıııa departamenti de bul derekti rastady:

«Aldyn ala málimet boıynsha, jergilikti turǵyn áıelimen janjal kezinde oǵan aýyr jaraqattar salyp, sonyń saldarynan áıel kóz jumǵan. Keıin ol aýdıoúndeý qaldyryp, ózine qol salǵan», – dedi vedomstvodan.

Qaıtys bolǵan erli-zaıyptylardyń artynda tórt bala qaldy. Eń úlkeni – 13 jastaǵy qyz, kishisi – úsh jasar ul. Balalardyń biri múgedektik sanatynda. Týystarynyń aıtýynsha, er adam turaqty jumys istemegen, al áıeli bala kútimine baılanysty úıde otyrǵan.

Belgili bolǵandaı, buǵan deıin de kúdikti qyzǵanyshtyń kesirinen burynǵy jubaıyn kóligimen qaǵyp, segiz jylǵa bas bostandyǵynan aıyrylǵan.