تۇركىستان وبلىسىندا گاز جارىلىپ, ءبىر وتباسىنان ءۇش ادام قازا تاپتى

تۇركىستان وبلىسى, قازىعۇرت اۋدانى, جىگەرگەن اۋىلىنداعى ۇيلەردىڭ بىرىندە 7 قاڭتار كۇنى قايعىلى وقيعا بولدى. اياداي ۇيدە گاز جارىلىپ, ءبىر وتباسىنىڭ ءۇش ادامى باقيلىق بولدى. بۇل تۋرالى qandastar.kz اقپارات پورتالى Stan.kz-كە cىلتەمە جاساپ حابارلايدى.

ءۇش كۇن قاتارىنان اكەسى مەن ەكى ۇلىنىڭ جانازاسىن شىعارعان قارالى وتباسى سودان بەرى ەس جيا الماي ءجۇر.

40 جاستاعى داۋلەت تۇراباەۆ ءۇش ۇل, ەكى قىزدىڭ اكەسى بولعان. بالقاشقا بارىپ-كەلىپ جۇمىس ىستەيتىن جىگىت اعاسى 24-جەلتوقساندا عانا مەرەكەلىك دەمالىسقا كەلگەن. ءسويتىپ, قان قىسىمى كوتەرىلىپ, دەنساۋلىعى سىر بەرگەن كەلىنشەگىن قالاعا ەمدەلۋگە جىبەرىپتى. قوس قىزىمەن شىمكەنتكە كەتكەن دينارا ۇيگە تابيعي گازدى ەكى-ءۇش اي بۇرىن عانا كىرگىزگەنىن ايتادى. ونىڭ بۇل ءسوزىن ۇلى مەن نەمەرەلەرىنەن ايرىلعان انالارى دا راستاپ وتىر.

“ازاندا قوڭىراۋ شالىپ تۇر. “دينا قايتشى. گاز جارىلدى. مەن كۇيىپ قالدىم. بالالار امان” دەدى. كەيىن قايتا حابارلاسىپ ەدىم قايىناعام الدى. “كەلىن ولاردى جەدەل-جاردەممەن اۋرۋحاناعا اكەتىپ جاتىر. سول جاققا بارا بەر” دەدى. جەدەل-جاردەممەن قاتار باردىق قازىعۇرتقا. ەكى بالامدى كوردىم. ەكەۋى دە تۇگەلدەي كۇيىپ قالعان. ۇلكەن بالام “ماما بىزدە ءبارى جاقسى. بولماشى جاراقات قوي. جازىلىپ كەتەمىز” دەدى”, – دەيدى دينارا ءاشىروۆا.

سوزدەرىنشە, جارىلىس اي بۇرىن ۇيگە اكەلىنگەن يران پەشىندەگى اقاۋدان بولعان.

“گازدى كىرگىزگەنىنە 3-4-اق اي بولدى عوي. “ماما, تىم بولماسا ەل قاتارلى ەكى بولمەنى جىلىتىپ وتىرايىن” دەپ جازدا كەلگەندە ءوتىنىش جازىپ بەرگەنمىن. ءوزىم الماتىدا ۇلكەن ۇلدىڭ قولىندا تۇرامىن. سول كامەن پەش قويىپ وتىرعان ەكەن عوي. كورگەندەردىڭ ايتىسى گاز اتىلعاندا بۇكىل وسى ۇيدە قانشا بولمە بار سونىڭ بارلىعىنىڭ اينەگىن سىندىرىپ جىبەرگەن عوي. مىنا جەردە جانىپ جاتقان دۇنيەنى, ءۇيدى الىپ قالامىز دەپ وتتىڭ ىشىندە جۇرە بەرىپتى بالالارىم. سول ارالىقتا ءتۇتىن ىشكى اعزالارىن كۇيدىرىپ جىبەرگەن. دەنەسىنىڭ 90 پايىزدان استامى كۇيگەن. ولاردى امان الىپ قالۋ مۇمكىن بولمادى”, – دەيدى داۋلەتتىڭ اناسى.

اۋرۋحاناعا حال ۇستىندە جەتكىزىلگەن ءتورت ناۋقاستىڭ الدىمەن 5 جاستاعىسى جان تاپسىرىپتى. كەيىن 13 جاستاعى ۇل, ءۇشىنشى كۇنى 40 جاستاعى ەر ازامات اجال قۇشقان. گاز جارىلعاندا مارقۇمداردىڭ ۇشەۋى دە ءبىر بولمەدە جاتىپتى. تەك ورتانشى بالا بولەك بولمەدە ۇيىقتاعان.

“امان قالعان بالامنىڭ اياعى تەرەڭ كۇيىپتى. ول اكەسى, اعاسى مەن ءىنىسى قايتىس بولعانىن بىلمەيدى. ويتكەنى شوكتان شىقپاعان. دارىگەرلەر كوڭىلىن الاڭداتپاۋدى تاپسىردى. ءالى اۋرۋحانادا جاتىر. ءوزىم جارىلىس بولعان ۇيدە تۇرىپ جاتىرمىز. اۋىل-ايماق بولىپ 3 ميلليون تەڭگە جيناپ, نەسيەمنىڭ بىرەۋىن جاۋىپ بەردى. قالعاندارى ءۇيدى اكتەپ-سىلاپ, تەرەزەلەرىن قاپتاپ بەردى. ازىرگە اينەكتەرى جوق”, – دەيدى دينارا ءاشىروۆا.

ايلىقتان ايلىققا ءومىر سۇرگەن وتباسىنىڭ موينىندا 12 ميلليون تەڭگە نەسيە بار ەكەن. ءبىرىن ءتورت ت ۇلىك اسىراپ ساتۋ ءۇشىن السا, قالعانىنا جولاۋشى تاسىمالدايتىن كولىك ساتىپ العان. الايدا, ول كاسىپتىڭ ءبىرى دە جۇرمەي وتاعاسى بالقاشتا تاس جول توسەيتىن فيرمادا ناپاقا تاپقان. ونىڭ ءوزىن نەسيەگە ءبولىپ وتىرعان وتباسى قارا سۋ مەن ناندى قاناعات تۇتقاندارىن ايتتى.

توتەنشەلىكتەردىڭ بولجامى بويىنشا, جارىلىس تابيعي گازعا جالعانعان پەشتەگى گاز-اۋا قوسپاسىنان بولعان.

“اۋدان اكىمشىلىگى تاراپىنان جاقىن كۇندەرى زارداپ شەككەن ازاماتتارعا 1 ميلليون 585 تەڭگە توڭىرەگىندە قارجى بەرىلەدى”, – دەيدى اۋداندىق اكىمدىك وكىلدەرى.

40 جاستاعى اكە مەن ونىڭ 13 جانە 5 جاستاعى ۇلدارى قاتارىنان ءۇش كۇندە جان تاپسىرعان. ولاردى جوقتاپ 35 جاستاعى جەسىرى مەن 12 جاستاعى ۇل, 9 جاسار جانە 8 ايلىق قىزدارى قالدى.