جاڭالىقتار
تۇركىستان وبلىسىندا توي كورتەجىن ۇيىمداستىرعاندار جاۋاپقا تارتىلدى
تۇركىستان وبلىسىندا توي كورتەجىن ۇيىمداستىرعان جۇرگىزۋشىلەر جاۋاپقا تارتىلدى, دەپ حابارلايدى Qandastar.kz
الەۋمەتتىك جەلىلەرگە مونيتورينگ جۇرگىزۋ بارىسىندا پوليتسيا تۇركىستان وبلىسىنداعى بىرنەشە اۆتوكولىك جۇرگىزۋشىلەرىنىڭ جول قوزعالىسى ەرەجەلەرىن ورەسكەل بۇزعانى تۋرالى بەينەجازبانى انىقتادى.
تەكسەرۋ كەزىندە انىقتالعانى, وقيعا ساۋران اۋدانىندا قىز ۇزاتۋ تويى كەزىندە بولعان. Mercedes-benz, Toyotar جانە Nexia 5 اۆتوكولىكتىڭ جۇرگىزۋشىلەرى انىقتالدى. كورسەتىلگەن كولىك قۇرالدارى ايىپتۇراعىنا قويىلدى.
قۇقىق بۇزۋشىلار اۆاريالىق جاعداي جاساعانى, جولاۋشىلاردى تاسىمالداۋ جونىندەگى تالاپتاردى ساقتاماعانى, كولىكتى مەملەكەتتىك تىركەۋ نومىرلەرىنسىز باسقارعانى, مانەۆر جاساۋ ەرەجەلەرىن بۇزعانى, سونداي-اق كولىك قۇرالدارىنا زاقىم كەلتىرگەنى ءۇشىن جاۋاپكەرشىلىككە تارتىلدى.
پوليتسيا زاڭ بارشاعا ورتاق ەكەنىن ەسكەرتەدى جانە جۇرگىزۋشىلەر مەن باسقا جول قوزعالىسىنا قاتىسۋشىلاردى جول ەرەجەلەرىن قاتاڭ ساقتاۋعا شاقىرادى. ەسىڭىزدە بولسىن, جول قاتەلىكتى كەشىرمەيدى.
