تۇركىستان وبلىسىندا تۇرمە وفيتسەرىن ءۇش باستىعى ۇرىپ-سوققان

فوتو: اشىق دەرەككوز

تۇركىستان وبلىسىنداعى №55 تۇزەۋ مەكەمەسىنىڭ بۇرىنعى قىزمەتكەرى ادىلدىك سۇرايدى. مايور دارحان تولەگەنوۆتىڭ ايتۋىنشا, ءوزىن تۇرمە باسشىسى ۇرىپ-سوعىپ, جۇمىستان ماجبۇرلەپ شىعارعان, دەپ حابارلايدى qandastar.kz 31 ارناعا سىلتەمە جاساپ.

ىشكى ىستەر ورگانىندا 15 جىلدان اسا تاجىريبەسى بار ازامات وزگە دە زاڭسىزدىقتاردى ايتىپ بەرگەن. سونىڭ سالدارىنان ول تۇزەۋ مەكەمەسىندە جارتى جىل عانا جۇمىس ىستەگەن. ءوزىن تۇرمەنىڭ 3 باسشىسى كابينەتكە كىرگىزىپ, سوققىعا جىقتى دەپ وتىر. ءتىپتى, ولار ورىندىقپەن ۇرىپ, نەگىزسىز جالا جاپقان.

قىزمەت بولمەسىنە كىرگىزىپ الىپ, «مەكەمەگە ەسىرتكى كىرگىزبەك بولدىڭ», «سوتتالعانعا ۇيالى تەلەفون كىرگىزبەك بولدىڭ» دەپ جالعان ايىپتادى. سول جەردە مەنى ۇرىپ, موينىمنان قىلقىندىرىپ, ءماجبۇرلى تۇردە بايانات جازدىرىپ الدى, – دەيدى دارحان تولەگەنوۆ.

ول پوليتسەيلەردى شاقىرسا دا ولار وفيتسەرلەرگە ەش شارا قولدانباعان. دەگەنمەن بۇل جايتتان كەيىن تۇزەۋ مەكەمەسىندە تەكسەرىس جۇرگىزىلگەن. شىمكەنت قالاسى جانە تۇركىستان وبلىسى بويىنشا قاجد-نىڭ ءبولىم باستىعى قارلىعاش قۇرالباەۆا مۇلدە زاڭبۇزۋشىلىق انىقتالماعانىن ايتادى.

№55 تۇزەۋ مەكەمەسىندە سوتتالعاندارمەن زاڭسىز قارىم-قاتىناس جاساعاندار دەرەگى بويىنشا قىزمەتتىك تەكسەرىس جۇرگىزىلىپ, قورىتىندىسىنا سايكەس تەرىس قىلىقتار انىقتالمادى. ال باسشىلارىنا قاتىستى پروكۋراتۋرامەن بىرگە قىزمەتتىك تەكسەرىس جۇرگىزىلىپ, قورىتىندىسىنا ساي دالەلىن تاپپاۋىنا بايلانىستى, تەكسەرىس توقتاتىلدى, – دەدى قارلىعاش قۇرالباەۆا.

مايور دارحان تولەگەنوۆ ەندى ىشكى ىستەر مينيسترلىگىنە شاعىم تۇسىرمەك. ونىڭ ايتۋىنشا, بارلىق جايت بەينەباقىلاۋ كامەراسىندا جازۋلى تۇر.