Túrkistan oblysynda júk vagondary relsten shyǵyp ketti: Apat saldarynan keshikken on poıyzdyń jolaýshylary ótemaqy alady

Foto: hi-tech.mail.ru

Túlkibas aýdanynda júk poıyzynyń 5 vagony relsten shyǵyp, aýdarylyp qaldy. Bul týraly Stan.kz aqparat agenttigi Otyrar.kz saıtyna silteme jasap habarlaıdy.

Oqıǵa kýágerleri túsirgen vıdeodan júk poıyzynyń 5 vagony aýdarylyp jatqanyn kórýge bolady.

“25 maýsym kúni saǵat 19:20-da Túlkibas – Arys ýchaskesinde Meńlibaı – Kókterek ýchaskesiniń kúrdeli qısyq ýchaskesinde júk poıyzy relsten shyǵyp ketti”, – dep QTJ bolǵan jaǵdaıǵa qatysty pikir bildirdi.

Keshikken poıyzdardyń jolaýshylaryna ótemaqy tólenbek. Sondaı-aq olar aýyz sýmen jáne tamaqpen qamtamasyz etiletin boldy.

“Túrkistan oblysynda júk poıyzy vagondarynyń relsten shyǵyp ketýine baılanysty jolaýshylar poıyzdary keshigýi múmkin”, – dep eskertti «Jolaýshylar tasymaly» AQ baspasóz qyzmeti.

Saǵat 21:00-degi aqparat boıynsha:

• №21 «Semeı-Qyzylorda»
• № 203 «Astana-Shymkent»
• №22 «Qyzylorda-Semeı»
• №46 «Túrkistan-Pavlodar»
• №24 «Aqtóbe-Almaty»
• №55 «Kókshetaý-Qyzylorda»
• №87 «Almaty-Saryaǵash»
• №78 «Mańǵystaý-Almaty»
• №30 «Atyraý-Almaty
• No34 «Aqtóbe-Almaty»

Jospar boıynsha, 26 maýsym kúni tańǵy saǵat 04:00-de poıyz qozǵalysy qaıta jandanǵan.

“Kompanııa qolaısyzdyqtar úshin jolaýshylardan keshirim suraıdy. Sondaı-aq jolaýshylardy, bagajdy, júk-bagajdy jáne poshta jóneltilimderin temirjol kóligimen tasymaldaý erejelerine sáıkes jolaýshylarǵa keshiktirilgen árbir tolyq saǵat úshin 3% mólsherinde ótemaqy tólenetinin habarlaıdy. Biraq ótemaqy mólsheri jol júrý qunynan aspaıdy», –  delingen resmı habarlamada.

Relsten shyǵyp ketken jerde Shymkent, Arys jáne Taraz stanııalarynyń qalpyna keltirý poıyzdary jumys istep jatyr. Poıyz vagondarynyń relsten shyǵýyna jeke vagonnyń dóńgelek juby osiniń synýy sebep bolǵan.