Túrkistanda taýda turatyn «Maýglı adam» tabyldy

Foto: ashyq derekkóz

Túrkistan oblysy Sozaq aýdanynda jasy alpysqa taıasa da, japadan-jalǵyz taý kezip, sol jaqty meken etetin «Taý adamy» turady, dep habarlaıdy  qandastar.kz  Alash.KZ .

«Túrkistan oblysy Sozaq aýdanynyń taýlarynda Maýglı adam ómir súrip jatyr, tipti keskin-kelbetine deıin uqsas. Shashy belýardan keledi», – delingen telearnanyń saıtynda.

Ony kópshilik «Taý adamy» dep atap ketken, sebebi jasy alpysqa taıasa da, osynda kelip ómir súrýin toqtatqan emes. Ol jyl saıyn jaz shyǵa bere keregin arqalap, taýǵa attanady. Taý basyna kúrke tigip, 3-4 aı japadan-jalǵyz ómir súredi, dep jazdy kaz.nur.kz.

«Malym bar, janym bar, túnde turyp qaraımyn ǵoı. Jan-jaǵymda elester, áne jerde, myna joldan ótip bara jatady. Bylaı kelip, myna jaqta da turady, sondaı elesterdi kóp kóremin», – deıdi «taý adamy».

Shavkat taý basynda qur júrmeıdi, quzar shyńnyń eń bıik jerine baryp, ár nárseni armandaıdy. Ásirese akter bolǵysy keletinin aıtady, tipti senarıı de daıyndap qoıǵanmyn deıdi ol.

Degenmen «átteń, qoldyń keltesi-aı» dep otyr, óıtkeni shalǵaıda júrgen «taý adamyn» áıgili kınorejısser Djeıms Kemeron qaıdan bilsin?!

«О́tkende taýdyń basyna shyqsam, jańbyr jaýyp tur eken. Djeıms Kemerondy oılap jatqam, Jańaǵy kóz aldyma elestetip jatyrmyn da, Oskardy jeńip jatqanyn, birge kınoǵa túsip jatqanyn… Osynyń bárin kóz aldyma elestep, kóz jasyma ıe bola almaı qaldym. Sózdiń shyny kerek, sol kezde bir shýmaq óleń kelip qaldy», – degen ol óleńin de oqyp berdi:

Bul dúnıe jumbaq tylsym netken,

Eı, taǵdyr, saldyń ǵoı qalyń betten.

Táńir jazyp kezdessem Djeıms Kemeronmen,

Sheshiler qudireti tylsym netken.

Iá, onyń armany erekshe ózgeshe, munysy taý basynda júrip saf aýany jutqannan, bulaq sýyn ishkennen bolar. Taý adamynyń budan da ózge qyry bar – ol eshqashan óshpeıtinin sýret salady, ıaǵnı tasqa qashap salynǵan týyndylar.

«Ol sýretti aıtatyn bolsam, «Bir ózim keń dalaǵa syımaımyn» dep atalady. Bul sýrettegi qyz emes, ol menmin. Anaý turǵan men jáne lashyn qus. Armanyma qaraı umtylyp jatyrmyn degen beınede», – dep túsindirdi tasqa qashalǵan sýretterin Shavkat Jurtanov.

Ol osy sýretterdis alyp júrip, kópshilikke tanylǵan, al mundaı oı sondaǵy petroglıfterdi kórip júrip týyndaǵan eken. Tarıhı týyndylardy sýret salyp júrip búldirip alǵan kórinedi. Jergilikti ákimdikten eskertý kelgen soń ondaı oryndarǵa múlde jolamaıtyn boldym deıdi ol.