جاڭالىقتار
تۇركىستاندا جەر قويناۋىن زاڭسىز پايدالانعان توپ ۇستالدى
فوتو: اشىق دەرەككوز
تۇركىستان وبلىسىندا پوليتسەيلەر قۇمدى زاڭسىز وندىرۋمەن اينالىسقان توپتى انىقتادى. ولار مەملەكەتكە 437 ملن تەڭگە كولەمىندە شىعىن كەلتىرگەن, دەپ حابارلايدى qandastar.kz polisia.kz-كە سىلتەمە جاساپ.
پوليتسەيلەر تۇركىستان وبلىسى كەلەس اۋدانى اۋماعىندا جۇرگىزىلگەن جەدەل-ىزدەستىرۋ ءىس-شارالارىنىڭ ناتيجەسىندە زاڭسىز جەر قويناۋىن پايدالانۋمەن اينالىسقان ادامدار توبىنىڭ قىزمەتىن توقتاتتى.
تۇركىستان وبلىسى پد ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى پايدالى قازبالاردى (قيىرشىق تاستى) ءوز بەتىنشە ساتقان 4 كۇدىكتىنى ۇستادى. كەلتىرىلگەن زالال 437 ميلليون تەڭگەنى قۇرادى.
ءتارتىپ ساقشىلارى ءتىنتۋ كەزىندە كۇدىكتىلەردەن 1 ەكسكاۆاتور, 1 جۇك تيەگىش, 4 جۇك كولىگى جانە باسقا دا زاتتاي دالەلدەمەلەردى تاۋىپ, تاركىلەپ الدى.
قازىرگى ۋاقىتتا وسى فاكت بويىنشا قىلمىستىق ءىس قوزعالدى جانە بولعان وقيعانىڭ بارلىق ءمان-جايلارىن انىقتاۋ بويىنشا جەدەل-تەرگەۋ ءىس-شارالارى جۇرگىزىلىپ جاتىر.
