تۇركيا كيللەر جىبەرگەن بە: ءوزىن سەنىمدى ۇستاعان مەرگەن جەلى جۇلدىزىنا اينالدى

فوتو: اشىق دەرەككوز

بۇكىل الەم كوز تىككەن وليمپياداعا بەيقام كەلگەن مەرگەن كوپشىلىكتىڭ كوزايىمىنا اينالدى, دەپ حابارلادى Qandastar.kz. ناقتىراق ايتاتىن بولساق, تۇركيادان پاريج وليمپياداسىنا كەلگەن مەرگەن يۋسۋف ديكەچ كۇمىس مەدال جەڭىپ الدى.

51 جاستاعى مەرگەن وليمپيادادا ەش قينالماعان ءتۇر تانىتىپ, ەكىنشى ورىن العان. سپورتشىنىڭ ونەر كورسەتۋ ءساتى ح جەلىسىندە جاريالاندى, وندا يۋسۋف ءوزىن سابىرلى ءارى وزىنە سەنىمدى ۇستاعان. «تۇركيا كيللەر جىبەرگەن بە?» دەلىنگەن حابارلامادا. 10 مەتر جەردەن پنەۆماتيكالىق مىلتىقپەن اتاتىن ارالاس كوماندالىق سىناقتىڭ فينالىندا ديكەچ قولىن قالتاسىندا سالىپ, بوساڭسىعان كۇيدە ونەر كورسەتتى.

تۇرىك مەرگەنى باسقالار سياقتى دالدىك ءۇشىن ءبىر كوزدى جاۋىپ, قۇلاققاپ كيگەن جوق. باردى دا, وعىن اتىپ, كۇمىس مەدال يەلەندى. وسى جەتىستىگىنەن كەيىن ءاپ-ساتتە الەۋمەتتىك جەلىدە تانىمال بولىپ شىعا كەلدى. جەلى قولدانۋشىلارى «قالتاسىنان قولىن الىپ, كوزدەپ اتقاندا التىن الاتىن ەدى», «وزىنە تىم سەنىمدى بولدى», «كەرەمەت» دەگەن سياقتى پىكىرلەر ءبىلدىردى.

ايتا كەتۋ كەرەك, 1news.a رەسۋرسىنىڭ مالىمەتىنشە, ديكەچ – تۇرىك جاندارمەرياسىنىڭ وتستاۆكاداعى وفيتسەرى. بۇل ونىڭ بەسىنشى وليمپيادا ويىندارى جانە العاشقى مەدالى.