تۇركيادا قازاقستاندىقتار وتىرعان ميكرواۆتوبۋس جول اپاتىنا ۇشىرادى

 فوتو: Muğla Gazetesi

تۇركيادا ءىرى جول اپاتىنان قازاقستاندىق تۋريستەر زارداپ شەكتى, دەپ حابارلادى Qandastar.kz. جەرگىلىكتى Muğla Gazetesi-ءنىڭ حابارلاۋىنشا, جاراقات العان 13 ءتۋريستىڭ قاتارىندا قازاقستاندىقتار دا بار.

وقىس وقيعا بۇگىن, ياعني 8 تامىزدا تاڭەرتەڭ 07:00 شاماسىندا مۋگلا ميلاس اۋدانىندا ورىن العان.

«رەسەي جانە قازاقستاندىق تۋريستەردى تاسىمالداعان ميكرواۆتوبۋس جول اپاتىنا ءتۇستى. تۋريستەر وتىرعان اۆتوبۋس جۇك كولىگىمەن سوقتىعىسقان. اپات ورنىنا جەدەل جاردەم, پوليتسيا, ءورت سوندىرۋشىلەر كەلگەن. جول اپاتىنان زارداپ شەككەن 13 تۋريست ءار ءتۇرلى جاراقاتپەن اۋرۋحاناعا جەتكىزىلدى, – دەلىنگەن حابارلامادا.

جەرگىلىكتى پوليتسيا جول-كولىك وقيعاسى بويىنشا تەرگەۋدى باستاپ كەتتى.

ميلاس – بودرۋم اۋەجايىنان 10 كم قاشىقتىقتا ورنالاسقان, مۋگلا پروۆينتسياسىنىڭ قۇرامىنا ەنەتىن ايماق.