جاڭالىقتار
تۇركياعا ەمدەلۋگە اكەتىلگەن ەرباياننىڭ جاعدايى قالاي
فوتو: ينگا يمانبايدىڭ facebook پاراقشاسىنان
قۇقىققورعاۋشى ينگا يمانباي اسكەردە جارالانعان ەربايان مۇحتاردىڭ تۇركياداعى ەمىنىڭ بارىسى تۋرالى ايتتى, دەپ حابارلايدى Ulysmedia.kz.
ينگا يمانباي جازباسى
«ەرباياننىڭ جاعدايى قالاي?» دەپ ىزدەپ جاتقان كوپشىلىككە العىسىمىز شەكسىز. قازىر ءتيىستى دياگنوستيكانى ءوتىپ, ستامبۇلداعى ەمىن قابىلداۋدى باستادى. اتا-اناسىمەن كۇندە حاباردامىن. سىزدەرگە تاعى دا العىسىن ايتۋدا” دەلىنگەن جازبادا.
ەربايان مۇحتار 27 قىركۇيەك كۇنى ىستانبۇلداعى “مەديكال-پارك” كلينيكاسىنا ورنالاستىرىلعان.
سارباز تۋرالى نە بەلگىلى
ەربايان مۇحتار ۇلى 22 جاستا. وتباسىندا 4 بالانىڭ ۇلكەنى. اسكەرگە ءوزى سۇرانىپ بارعان. الماتىداعى ۇلتتىق ۇلاننىڭ 5571 بولىمىندە مەرزىمدى اسكەري قىزمەتتە ءجۇرىپ جارالانىپ كوماعا تۇسكەن. اسكەري ءبولىم «سارباز دارەتحانادا ءوزى قۇلاپ, باسىن كافەلگە سوعىپ الدى» دەگەن. ەربايان مۇحتاردىڭ اكەسى دە, شەشەسى دە بۇل نۇسقاعا سەنبەيدى.
رەسمي دەرەك
سوڭعى ءۇش جىلدا قازاقستاندا 270 اسكەري قىزمەتكەر قايتىس بولعان. قورعانىس مينيسترلىگى اسكەردەگى ءولىمنىڭ كوبىن جازاتايىم جاعداي رەتىندە, سۋيتسيد فاكتىلەرىن تۇرمىستىق قيىندىقتارمەن ءتۇسىندىرىپ جاتادى. دەسە دە كوپتى مۇنىڭ ارتىندا ارميا ساپىنداعى اياۋسىز الىمجەتتىك تۇرعان جوق پا دەگەن وي مازالايتىنى جاسىرىن ەمەس.
اسكەردەگى بۋللينگ
اسكەري سالانى زەرتتەپ جۇرگەن جۋرناليست امانگەلدى قۇرمەت اسكەردەگى, قالا بەردى قوعامداعى بۋللينگ قوعامنىڭ مادەني, قۇقىقتىق ساناسىنىڭ كورىنىسى دەسە, الەۋمەتتىك تەوريا زەرتتەۋشىسى عالىم جۇسىپبەك بۇگىنگى قازاق قوعامىنداعى زورلىق, الىمجەتتىك, ادام تۇلعاسىن قاستەرلەمەۋ سىندى تەرىس ارەكەتتەردىڭ سەبەبى توتاليتار جۇيەمەن تىعىز بايلانىستى ەكەنىن ايتادى.
