Túrkııaǵa emdelýge áketilgen Erbaıannyń jaǵdaıy qalaı

Foto: Inga Imanbaıdyń facebook paraqshasynan

Quqyqqorǵaýshy Inga Imanbaı áskerde jaralanǵan Erbaıan Muhtardyń Túrkııadaǵy eminiń barysy týraly aıtty, dep habarlaıdy Ulysmedia.kz.

INGA IMANBAI JAZBASY

«Erbaıannyń jaǵdaıy qalaı?» dep izdep jatqan kópshilikke alǵysymyz sheksiz. Qazir tıisti dıagnostıkany ótip, Stambuldaǵy emin qabyldaýdy bastady. Ata-anasymen kúnde habardamyn. Sizderge taǵy da alǵysyn aıtýda” delingen jazbada.

Erbaıan Muhtar 27 qyrkúıek kúni Ystanbuldaǵy “Medıkal-Park” klınıkasyna ornalastyrylǵan.

SARBAZ TÝRALY NE BELGILI

Erbaıan  Muhtaruly 22 jasta. Otbasynda 4 balanyń úlkeni. Áskerge ózi suranyp barǵan. Almatydaǵy Ulttyq ulannyń 5571 bóliminde merzimdi áskerı qyzmette júrip jaralanyp komaǵa túsken. Áskerı bólim «sarbaz dárethanada ózi qulap, basyn kafelge soǵyp aldy» degen. Erbaıan Muhtardyń ákesi de, sheshesi de bul nusqaǵa senbeıdi.

RESMI DEREK

Sońǵy úsh jylda Qazaqstanda 270 áskerı qyzmetker qaıtys bolǵan. Qorǵanys mınıstrligi áskerdegi ólimniń kóbin jazataıym jaǵdaı retinde, sýııd faktilerin turmystyq qıyndyqtarmen túsindirip jatady. Dese de kópti munyń artynda armııa sapyndaǵy aıaýsyz álimjettik turǵan joq pa degen oı mazalaıtyny jasyryn emes.

ÁSKERDEGI BÝLLING

Áskerı salany zerttep júrgen jýrnalıst Amangeldi Qurmet áskerdegi, qala berdi qoǵamdaǵy býllıng qoǵamnyń mádenı, quqyqtyq sanasynyń kórinisi dese, áleýmettik teorııa zertteýshisi Ǵalym Júsipbek búgingi qazaq qoǵamyndaǵy zorlyq, álimjettik, adam tulǵasyn qasterlemeý syndy teris áreketterdiń sebebi totalıtar júıemen tyǵyz baılanysty ekenin aıtady.