“تۇرمەدە وتىرعان جاقسى ەدى”: رەسەيدىڭ اتىنان سوعىسىپ, تۇتقىنعا ءتۇسىپ قالعان قازاقستاندىقتار وقيعاسىن ايتىپ بەردى

ۆيدەودان سكرينشوت

رەسەيدىڭ اتىنان سوعىسقا قاتىسىپ, تۇتقىنعا تۇسكەن قازاقستاندىقتاردى ۋكراينا ەكستراديتسيالادى. الايدا ولاردىڭ ءارى قاراي تاعدىرىپ بەلگىسىز. دەسە دە جىگىتتەر سوعىسقا نە ءۇشىن بارعانىن جانە قانداي قورلىققا تاپ بولعانىن ايتىپ بەردى, دەپ جازدى qandastar.kz

. بۇل تۋرالى Stan.kz اقپارات اگەنتتىگى “ايران” Youtube-ارناسىنا سىلتەمە جاساپ حابارلايدى.

«ناش ۆىحود» قوعامدىق قوزعالىسى جاريالاعان ۋكراينا بوساتقان تۇتقىندار تىزىمىندە قازاقستاننىڭ ەكى ازاماتى بار. ءبىرى – 23 جاستاعى ەربولات. ول قوستانايدىڭ تۋماسى ەكەن. سوزىنشە, اقشا تابۋ ماقساتىندا رەسەيگە كەتكەن. الايدا ونى سوعىسقا جىبەرەدى دەپ ويلاماعان.

“حالىقتا اقشا از. كۇنكورىسكە ارەڭ جەتەدى. سول ءۇشىن قازاقستاندىقتار رەسەيگە ۆاحتالىق جۇمىستارعا بارادى. مەنىڭ اناما وتاعا اقشا كەرەك ەدى. سول سەبەپتى ۆاحتالىق جۇمىسقا بارامىن دەدىم. ول جاقتا كەلىسىمشارتقا قول قويدىم, ولار ماعان اقشا اۋداردى. مەن سول اقشانى اناما جىبەردىم. سول كەزدە “ۆسب”-عا (اسكەري قيمىل) باراسىڭ” دەدى. نە ەكەنىن بىلمەيمىن دەدىم, تۇسىندىرمەدى. “قايدا جىبەرسە, سوندا بارامىن” دەپ كەلىستىم. انام مۇنىڭ ءبارىن مەن تۇتقىنعا تۇسكەن كەزدە ءبىر-اق ءبىلدى”, – دەدى ەربولات.

ول سوعىس كەزدەگى ءساتتى ەسىنە الدى.

“كامەكادزە ۇشىپ ءتۇستى. بىردەن – 300 ادام. جان-جاققا قاشتىق. دروندار ۇشىپ جاتتى, تىعىلدىق. ءبىر كەزدە درون كومانديرگە ءتۇستى”, – دەدى ول.

ەكىنشى جىگىت – 21 جاستاعى شەرحان. ول بايقوڭىر عارىش ايلاعىنان ەكەن.

“جازدا رەسەيگە دەمالۋعا باردىق. دوستارىممەن ىشىمدىك ءىشىپ, جاستىقپەن بۇزاقىلىق جاسادىق. جەتكىزۋشىنىڭ ساموكاتىن ۇرلاپ, ۇردىق. ءبىزدى پوليتسەيلەر ۇستاپ الدى. بۇرىن-سوڭدى ىشىمدىك ءىشىپ كورمەگەن ەدىم. سول ءۇشىن الكوگول قاتتى اسەر ەتىپ, ەڭ ماسى مەن بولدىم”, – دەيدى قازاقستاندىق جىگىت.

وتانداسىمىز تۇرمەگە وتىرماۋ ءۇشىن وسىنداي قادامعا بارعانىن ايتادى.

“قاتتى قورقىپ كەتتىم. وعان دەيىن قۇقىقبۇزۋشىلىق جاساپ كورمەگەنمىن. پوليتسيالىق بولىمشەگە دە بارماعانمىن. تۇرمەگە وتىرماۋ ءۇشىن كەلىسىمشارتقا قول قويۋعا تۋرا كەلدى. تۋىستارىما حابارلاسىپ, كەڭەس سۇراۋىم كەرەك ەدى. ادۆوكات الماق بولعانمىن. تاياق جەپ, كىر-كىر بولىپ ءومىر باقي سوعىس الاڭىندا جۇرگەنشە, تۇرمەدە وتىرعان جاقسى ەدى”, – دەيدى ول.

شەرحان سوعىسقا ءوز بەتىمەن بارعىسى كەلەتىندەرگە ۇندەۋ جولدادى.

“مەن ءومىرىمدى جالعاستىرىپ, قايتا وقىعىم كەلەدى. جوو-عا ءتۇسىپ, پاتەر العىم كەلەدى. سوعىسقا بارعىسى كەلىپ جۇرگەندەرگە ويلانسىن دەر ەدىم. ول ويىنشىق ەمەس. اتىس-شابىس, قىل ۇستىندەگى ءومىر. ءبىرىنشى كۇنى مەن جاراقات الىپ, ولەمىن دەپ ويلادىم”, – دەدى شەرحان.

ۋكراينا تاراپى قابىلداپ العان تۇتقىندارىن كەتۋگە رۇقسات بەرەدى. ولار رەزەرۆكە تۇرادى. ال رەسەي ايىرباستاپ العان تۇتقىندارىن ۇيىنە جىبەرمەيدى, ءتىپتى جاقىندارىمەن كەزدەسۋگە رۇقسات بەرمەيدى ەكەن. مۇنى تۇتقىندارعا رەسەيلىك ەرىكتى مالىمدەدى.