تۇرمەدەگى الاياقتار 2 ملرد پايدا تاپقان

فوتو: اشىق دەرەككوز

قىلمىستىق توپ ەلىمىزدىڭ بىردەن 9 وڭىرىندە ايلاسىن ىسكە اسىرىپ وتىرىپتى.

تۇرمەدە وتىرىپ الاياقتىقپەن اينالىسقان قىلمىستىق توپ انىقتالدى. ولار حالىقتى الداپ, ءبىر جىل ىشىندە 2 ميلليارد تەڭگە تابىس تاپقان, – دەپ حابارلايدى qandastar.kz Aikyn.kz-كە سىلتەمە جاساپ.

اباقتىداعى Call-ورتالىقتارىندا وتىرعاندارى سايتتارداعى حابارلاندىرۋدان تاپقان ليۋكس ماشينالاردىڭ يەcىمەن كەلىسسوز جۇرگىزسە, قالعان شارۋانى بوستاندىقتاعى كومەكشىلەرى رەتتەگەن.

ۇلتتىق قاۋىپسىزدىك كوميتەتى, ىشكى ىستەر مينيسترلىگى مەن پروكۋراتۋرا بىرلەسىپ, ارنايى وپەراتسيا ۇيىمداستىردى. ءتىنتۋ كەزىندە اقشا, بانك كارتالارى, ءدىني ادەبيەتپەن قوسا, ەسەپ-قيساپ جۇرگىزگەن جۋرنالدارىنا دەيىن تابىلعان. وسىلايشا, تۇرمەدەگى الاياقتار ءبىر جىلدا 2 ميلليارد تەڭگەنى قالتاسىنا باسقان.

قىلمىستىق توپ ساقتىق شارالارىن مەيلىنشە قولعا العان. قۇجاتتارىنان قاتە تاپپايتىنداي, ءمىنسىز لوگيستيكالىق كومپانيا اشىپ, ارنايى موبيلوگراف جالداپ سايتتىڭ جارناماسىن جاقسىلاپ جاساپ قويعان.

سودان سوڭ حالىققا كولىكتى ءتيىمدى باعامەن «كەز كەلگەن قالادان تاسىمالداپ بەرەمىز» دەپ ۋادەنى ءۇيىپ-توگەدى. قۇرىعىنا تەك قىمبات ماشينا يەلەرىن تۇسىرۋگە تىرىسقان. ءسويتىپ «باسقا قالاعا جونەلتتىم» دەگەن كولىگى, نە تىلدەسكەن ادامى اقشامەن قوسا جوق بولىپ كەتكەن. ۇرلانعان كولىكتەردى بىردەن ۆين-كودىن وزگەرتىپ, شەتەلگە ساتىپ وتىرعان.

قىلمىستىق توپ ەلىمىزدىڭ بىردەن 9 وڭىرىندە ايلاسىن ىسكە اسىرىپ وتىرىپتى. ال ءبارىن باسقارىپ وتىرعاندار الماتى وبلىسىنداعى تۇرمەدە جازاسىن وتەپ جاتقان سوتتالۋشىلار ەكەن. ولاردىڭ شوتتارىنا كۇن سايىن قوماقتى سوما ءتۇسىپ وتىرعان.

قۇقىق قورعاۋ ورگاندارى قىلمىستىق توپتىڭ مۇشەلەرىن قولعا ءتۇسىردى. ەلۋدەن اسا قىلمىسكەر تۇسكەن اقشانى قۇمار ويىندارىنا سالعان. ۇستالعانداردىڭ باسقا دا قىلمىسقا قاتىسىنىڭ بار-جوعى تەكسەرىلىپ جاتىر.