Túrmedegi alaıaqtar 2 mlrd paıda tapqan

Foto: ashyq derekkóz

Qylmystyq top elimizdiń birden 9 óńirinde aılasyn iske asyryp otyrypty.

Túrmede otyryp alaıaqtyqpen aınalysqan qylmystyq top anyqtaldy. Olar halyqty aldap, bir jyl ishinde 2 mıllıard teńge tabys tapqan, – dep habarlaıdy qandastar.kz Aikyn.kz-ke silteme jasap.

Abaqtydaǵy Call-ortalyqtarynda otyrǵandary saıttardaǵy habarlandyrýdan tapqan lıýks mashınalardyń ıecimen kelissóz júrgizse, qalǵan sharýany bostandyqtaǵy kómekshileri rettegen.

Ulttyq qaýipsizdik komıteti, Ishki ister mınıstrligi men prokýratýra birlesip, arnaıy operaııa uıymdastyrdy. Tintý kezinde aqsha, bank kartalary, dinı ádebıetpen qosa, esep-qısap júrgizgen jýrnaldaryna deıin tabylǵan. Osylaısha, túrmedegi alaıaqtar bir jylda 2 mıllıard teńgeni qaltasyna basqan.

Qylmystyq top saqtyq sharalaryn meılinshe qolǵa alǵan. Qujattarynan qate tappaıtyndaı, minsiz logıstıkalyq kompanııa ashyp, arnaıy mobılograf jaldap saıttyń jarnamasyn jaqsylap jasap qoıǵan.

Sodan soń halyqqa kólikti tıimdi baǵamen «kez kelgen qaladan tasymaldap beremiz» dep ýádeni úıip-tógedi. Quryǵyna tek qymbat mashına ıelerin túsirýge tyrysqan. Sóıtip «basqa qalaǵa jónelttim» degen kóligi, ne tildesken adamy aqshamen qosa joq bolyp ketken. Urlanǵan kólikterdi birden vın-kodyn ózgertip, shetelge satyp otyrǵan.

Qylmystyq top elimizdiń birden 9 óńirinde aılasyn iske asyryp otyrypty. Al bárin basqaryp otyrǵandar Almaty oblysyndaǵy túrmede jazasyn ótep jatqan sottalýshylar eken. Olardyń shottaryna kún saıyn qomaqty soma túsip otyrǵan.

Quqyq qorǵaý organdary qylmystyq toptyń múshelerin qolǵa túsirdi. Elýden asa qylmysker túsken aqshany qumar oıyndaryna salǵan. Ustalǵandardyń basqa da qylmysqa qatysynyń bar-joǵy tekserilip jatyr.