تۇرمەدەگى جەمقورلاردى شارتتى تۇردە مەرزىمىنەن بۇرىن بوساتۋعا سالىنعان تىيىم زاڭدى دەپ تانىلدى

بۇعان دەيىن كونستيتۋتسيالىق سوت قر قىلمىستىق-اتقارۋ زاڭناماسىنىڭ ۋاقىتقا قاراي قولدانىلۋىن ايقىندايتىن قىلمىستىق-اتقارۋ كودەكسىنىڭ 2-بابى ەكىنشى بولىگىنىڭ كونستيتۋتسياعا سايكەستىگىن تەكسەرۋ تۋرالى ازاماتتاردىڭ وتىنىشتەرىن قارادى.

اتالعان نورماعا سايكەس جازالاردى جانە وزگە دە قىلمىستىق-قۇقىقتىق ىقپال ەتۋ شارالارىن ورىنداۋ جانە وتەۋ, سوتتالعاندارعا تۇزەۋ قۇرالدارىن قولدانۋ, سونداي-اق بوساتىلاتىن سوتتالعاندارعا كومەك كورسەتۋ ولاردى ورىنداۋ كەزىندە قولدانىستا بولاتىن قازاقستان رەسپۋبليكاسىنىڭ زاڭناماسىنا سايكەس جۇزەگە اسىرىلادى.

«ازاماتتاردىڭ كونستيتۋتسيالىق سوتقا جۇگىنۋىنە سوتتاردىڭ قىلمىستىق جازادان شارتتى تۇردە مەرزىمىنەن بۇرىن بوساتۋدان باس تارتۋى سەبەپ بولدى. سوتتار ءوز شەشىمىن اۋىر جانە اسا اۋىر سىبايلاس جەمقورلىق قىلمىسى ءۇشىن سوتتالعان ادامدارعا جازادان شارتتى تۇردە مەرزىمىنەن بۇرىن بوساتۋدى قولدانۋدى شەكتەيتىن قىلمىستىق كودەكستىڭ 72-بابىنىڭ سەگىزىنشى بولىگىنىڭ 3) تارماعىنا جانە قىلمىستىق-اتقارۋ كودەكسىنىڭ 2-بابىنىڭ ەكىنشى بولىگىنە سىلتەمە جاساي وتىرىپ, ءۋاج كەلتىرەدى», دەلىنگەن سوت تۇسىنىكتەمەسىندە.

Zakon.kz جازعانداي,  وتىنىش يەلەرىنىڭ پىكىرىنشە, قىلمىستىق-اتقارۋ كودەكسىنىڭ داۋ ايتىلىپ وتىرعان نورماسى كونستيتۋتسياعا قايشى كەلەدى, ويتكەنى شارتتى تۇردە مەرزىمىنەن بۇرىن بوساتۋعا تىيىم سالۋ ەنگىزىلگەنگە دەيىن جاسالعان ءتيىستى ساناتتاعى قىلمىستار ءۇشىن سوتتالعانداردىڭ جاعدايىن ناشارلاتادى.

«كودەكستىڭ كورسەتىلگەن نورماسىنىڭ كونستيتۋتسيالىلىعىن تەكسەرۋ ناتيجەلەرى بويىنشا كونستيتۋتسيالىق سوت داۋ ايتىلىپ وتىرعان نورمانى كونستيتۋتسياعا سايكەس دەپ تانىدى», دەپ ناقتىلايدى سوتتاعىلار.

بۇعان دەيىن كونستيتۋتسيالىق سوت 2024 جىلعى 16 مامىرداعى №44-نق نورماتيۆتىك قاۋلىسىندا جازاسىن وتەۋدەن شارتتى تۇردە مەرزىمىنەن بۇرىن بوساتۋدى قولدانۋ-قولدانباۋ ماسەلەلەرى قىلمىستىق زاڭنىڭ وزىندە بەلگىلەنگەن كەرى كۇش ەرەجەلەرى ەسكەرىلە وتىرىپ, شارتتى تۇردە مەرزىمىنەن بۇرىن بوساتۋدى قولدانۋ كەزىندە قولدانىستا بولاتىن (كىنالى دەپ تانۋ جانە جازالاۋ تۋرالى ۇكىم شىعارۋعا نەگىز بولعان) قىلمىستىق زاڭعا سايكەس شەشىلەدى دەپ كورسەتكەن بولاتىن.

سونىمەن قاتار, كونستيتۋتسيالىق سوت سوت پراكتيكاسىنىڭ بىركەلكىلىگىن قامتاماسىز ەتۋ ماقساتىندا جوعارعى سوتقا قابىلدانعان نورماتيۆتىك قاۋلىداعى قۇقىقتىق ۇستانىمداردى ەسكەرە وتىرىپ, اۋىر جانە اسا اۋىر سىبايلاس جەمقورلىق قىلمىس جاساعان ادامدارعا شارتتى تۇردە مەرزىمىنەن بۇرىن بوساتۋدى قولدانۋ ماسەلەلەرى بويىنشا قوسىمشا تۇسىندىرۋلەر بەرۋدى ۇسىندى.