الەم جاڭالىقتارىجاڭالىقتار
تۇرمىسقا شىقپايمىن دەپ اشۋلانىپ ايتتىم — ءابيبا ابۋجاقىنوۆا
پاريج وليمپياداسىنان ەلگە ورالعان دزيۋدودان قازاقستان قۇراماسىنىڭ مۇشەسى ءابيبا ابۋجاقىنوۆا جارىستان كەيىنگى اسەرىمەن ءبولىستى, دەپ حابارلايدى Qazaq Today اقپارات پورتالى kaz.inform.kz-كە سىلتەمە جاساپ.
«ىستىق ىقىلاسپەن كۇتىپ العاندارىڭىزعا راقمەت. وسى جولى 5-ورىنمەن قايتتىم. الداعى جارىستاردا كوك تۋىمىزدى بيىكتەن جەلبىرەتۋگە ۋادە بەرەمىن. مەنىڭ جاقسى كۇرەسىپ كەلە جاتقانىما 2 جىل عانا بولدى. قالعان قارسىلاستارىم بۇرىننان جۇلدەگەر بولىپ جۇرگەن قىزدار. تاعى دا 4 جىل ماعان تاجىريبە جيناۋعا جەتەدى دەپ ويلايمىن. 48 كەلىدە قالامىن», — دەدى سپورتشى.
قازاقستاندىق دزيۋدوشى ەل نامىسىن وسى جىلدىڭ قازان ايىندا ابۋ-دابيدە قورعاماق.
«قازاننىڭ 13 كۇنى ءابۋ-دابيدە وتەتىن Grand Slam تۋرنيرىندە كۇرەسەمىن. وعان 2 اي بار. بۇيىرسا 2 اپتاداي دەمالىپ, قايتادان جاتتىعۋعا ورالامىن. بىراق وليمپيادا كەزىندە شاعىن جاراقاتىم بولدى», — دەيدى ول.
سونداي-اق دزيۋدوشى قىز جەكە ومىرىنە بايلانىستى سۇراقتارعا دا جاۋاپ بەردى.
«كەلەسى وليمپياداعا دەيىن تۇرمىس قۇرۋ ماعان كەدەرگى ەمەس. تۇرمىسقا شىقپايمىن دەپ اشۋلانىپ ايتتىم. بۇل تۋرالى ءالى ويلانىپ كورەمىن», — دەدى ءابيبا ابۋجاقىنوۆا.
