تۇرسىنبەك قاباتوۆ وسپادار قىلىق جاساپ الىپ, ساحناعا شىعىپ ءجۇر. بۇل – حالىقتىڭ قاسىرەتى – احمەتبەك نۇرسيلا

فوتو: اشىق دەرەككوز

تانىمال ونەر جۇلدىزدارىنىڭ قاتارىنان قامالۋى قوعامدا ءالى قىزۋ تالقىلانىپ جاتىر. ازىلكەش پەن انشىلەردىڭ ارەكەتى دۇرىس پا, انشەيىندە جۇرتتى سابىرعا شاقىراتىن ونەر يەلەرى نەگە سابىرسىزدىق تانىتتى? بەلگىلى كاسىپكەر, پسيحولوگ احمەتبەك نۇرسيلا وسى جايتقا قاتىستى پىكىر ءبىلدىردى, – دەپ حابارلايدى Aikyn.kz Kazinform اگەنتتىگىنە سىلتەمە جاساپ.

احمەتبەك نۇرسيلا قاي زاماندا بولسىن قوعامنىڭ قادىر تۇتار تۇلعالارى بولاتىنىن, وكىنىشكە قاراي, قازىرگى قوعامدا قۇندىلىعى جوق, مادەنيەتتەن جۇرداي سايقىمازاقتار, انشىسىماق «شەگىرتكەلەر» جۇلدىز بولعانىن ايتادى.

«اسەت نايمانباي ۇلى ايتقانداي, اسۋعا ات شىقپايتىن اربا شىقتى, قاندى بالاق قىراندى قارعا جىقتى, قوپادا وگىز سوققان جولبارىستار, قوياننان قورىققانىنان جارعا بۇقتى. ياعني, قوعام داعدارىپ تۇرعان كەزەڭدە قوعامنىڭ قادىرلىسى بولىپ, جۇلدىزدار بولىپ «شەگىرتكەلەر» شىقتى. باياعىدا بالۋان شولاق, اقان سەرى, ءبىرجان سال سياقتى تۇلعالاردى ادامدار توبەسىنە كوتەرگەن. ولاردىڭ مادەنيەتى, كىسىلىگى, ادامگەرشىلىگى وتە جوعارى بولعان. ەلگە ءسوزى ءوتىپ, قورعان بولعان. سوندىقتان حالىق ولاردى قۇرمەتتەدى. ال قازىرگى توقىراۋ زامانىندا دۇنيەقوڭىز سايقىمازاق, ءبىلىمسىز ادامدار تورگە شىقتى. ەڭ قورقىنىشتىسى, حالىق سولاردىڭ سوراقى قىلىقتارىن قورعاپ جاتىر.

مەيرامبەك بەسپاەۆ تا «ەركەلىك قوي» دەپ قورعاپ الەك. ەركەلىگىن اكە-شەشەسىنە كورسەتسىن. حالىققا ونداي ەركەلىك جۇرمەيدى. ءىشىپ الىپ, قوعامدىق جەردە ۇرىس, توبەلەس شىعارىپ, ساحناعا اناشا شەگىپ شىعۋ دەگەن بارىپ تۇرعان باسسىزدىق. بۇل قوعامنىڭ دەڭگەيىن دە كورسەتەدى. دامىعان ەلدەردە پارا العان, بىردەڭە بۇلدىرگەن مينيسترلەر بىردەن جۇمىستان كەتەتىن ەدى. قوعام الدىندا جۇرگەن ادامدار شالىس باسسا, قارابەت بولىپ, ەلدىڭ الدىنا شىقپاۋشى ەدى.

تۇرسىنبەك قاباتوۆ وسپادار قىلىق جاساپ الىپ, ساحناعا شىعىپ, سونىسىن دارىپتەپ كۇلكىگە اينالدىرىپ تۇر. وعان حالىق ءماز. بۇل — قوعام الدىنداعى حالىقتىڭ قاسىرەتى. ەسەك وزىپ, تۇلپارلاردىڭ مەرەيى اقساعان زامان بولىپ تۇر. حالىقتىڭ الدىندا ءجۇرىپ وسىنداي وسپادار قىلىق كورسەتكەندەر ەلگە ۇلگى سانالسا, قوعام ەشقاشان تۇزەلمەيدى», — دەيدى ول.