Tursynbek Qabatov ospadar qylyq jasap alyp, sahnaǵa shyǵyp júr. Bul – halyqtyń qasireti – Ahmetbek Nursıla

Foto: ashyq derekkóz

Tanymal óner juldyzdarynyń qatarynan qamalýy qoǵamda áli qyzý talqylanyp jatyr. Ázilkesh pen ánshilerdiń áreketi durys pa, ánsheıinde jurtty sabyrǵa shaqyratyn óner ıeleri nege sabyrsyzdyq tanytty? Belgili kásipker, psıholog Ahmetbek Nursıla osy jaıtqa qatysty pikir bildirdi, – dep habarlaıdy Aikyn.kz Kazinform agenttigine silteme jasap.

Ahmetbek Nursıla qaı zamanda bolsyn qoǵamnyń qadir tutar tulǵalary bolatynyn, ókinishke qaraı, qazirgi qoǵamda qundylyǵy joq, mádenıetten jurdaı saıqymazaqtar, ánshisymaq «shegirtkeler» juldyz bolǵanyn aıtady.

«Áset Naımanbaıuly aıtqandaı, asýǵa at shyqpaıtyn arba shyqty, Qandy balaq qyrandy qarǵa jyqty, Qopada ógiz soqqan jolbarystar, Qoıannan qoryqqanynan jarǵa buqty. Iaǵnı, qoǵam daǵdaryp turǵan kezeńde qoǵamnyń qadirlisi bolyp, juldyzdar bolyp «shegirtkeler» shyqty. Baıaǵyda Balýan Sholaq, Aqan seri, Birjan sal sııaqty tulǵalardy adamdar tóbesine kótergen. Olardyń mádenıeti, kisiligi, adamgershiligi óte joǵary bolǵan. Elge sózi ótip, qorǵan bolǵan. Sondyqtan halyq olardy qurmettedi. Al qazirgi toqyraý zamanynda dúnıeqońyz saıqymazaq, bilimsiz adamdar tórge shyqty. Eń qorqynyshtysy, halyq solardyń soraqy qylyqtaryn qorǵap jatyr.

Meırambek Bespaev ta «erkelik qoı» dep qorǵap álek. Erkeligin áke-sheshesine kórsetsin. Halyqqa ondaı erkelik júrmeıdi. Iship alyp, qoǵamdyq jerde urys, tóbeles shyǵaryp, sahnaǵa anasha shegip shyǵý degen baryp turǵan bassyzdyq. Bul qoǵamnyń deńgeıin de kórsetedi. Damyǵan elderde para alǵan, birdeńe búldirgen mınıstrler birden jumystan ketetin edi. Qoǵam aldynda júrgen adamdar shalys bassa, qarabet bolyp, eldiń aldyna shyqpaýshy edi.

Tursynbek Qabatov ospadar qylyq jasap alyp, sahnaǵa shyǵyp, sonysyn dáriptep kúlkige aınaldyryp tur. Oǵan halyq máz. Bul — qoǵam aldyndaǵy halyqtyń qasireti. Esek ozyp, tulparlardyń mereıi aqsaǵan zaman bolyp tur. Halyqtyń aldynda júrip osyndaı ospadar qylyq kórsetkender elge úlgi sanalsa, qoǵam eshqashan túzelmeıdi», — deıdi ol.