تۇرسىنعالي ەدىلوۆ: ءدىندارسىڭ با – مەدرەسەگە بار, بوكسشىسىڭ با – رينگتە باسىڭمەن جۇمىس ىستە!

فوتو: ۋلىسمەديا.كز

«ۋاقىت كورسەتەدى» YouTube ارناسىنا قازاقستاننىڭ ەڭبەك سىڭىرگەن جاتتىقتىرۋشىسى, بوكستان ۇلتتىق قۇرامانىڭ بۇرىنعى باس باپكەرى تۇرسىنعالي ەدىلوۆ سۇحبات بەردى, دەپ حابارلايدى qandastar.kz. 

Skifnews.kz اقپارات پورتالى جازعانداي, ۇلتتىق قۇرامانىڭ بۇرىنعى باس باپكەرءى پاريجدەگى جەڭىلىستەرىمىز الدا ۇلكەن جەڭىستەرگە باستايتىن ساباق بولار دەگەن ويدا. «قازاق بوكسىن كوتەرۋ ءۇشىن, بىزگە ۇلكەن وزگەرىستەر كەرەك, مۇمكىن, سول ءۇشىن بولىپ جاتقان جەڭىلىستەر شىعار» دەگەن وپتيميستىك وي دا ايتتى.

سونىمەن قاتار, باس باپكەر سپورت پەن ءدىن ماسەلەسىن, «ساقال» تاقىرىبىندا دا پىكىر ءبىلدىردى.

«جيىرما جاستاعى جاپ-جاس جىگىتتەردىڭ ءبارى ساقال قويىپ العان. سپورت پەن ءدىن ەكى بولەك نارسە. جەڭىلىپ قالسا, اللانىڭ قالاۋى سولاي بولدى دەگەن نە ءسوز?! ءدىندارسىڭ با, مەدرەسەگە بارىپ وقى, بوكسشىسىڭ با, رينگتە باسىڭمەن جۇمىس ىستە!» – دەپ اشىنادى ول.

ودان كەيىن باس باپكەر 2004 جىلدى ەسىنە الىپ, وليمپيادا ويىندارىنا اككرەديتاتسيا الا الماي, قىرعىزستان ارقىلى بارعانىن ايتتى.

«2004 جىلى ماعان وليمپياداعا بارۋعا اككرەديتاتسيا بەرمەي قويدى. سوسىن مەن قىرعىزستانعا باردىم. ەسىم قۇتماناليەۆ دەگەن قىرعىز وليمپيادا كوميتەتىنىڭ باستىعىنا كىردىم. «اعا, مەن 2 التىن اپەرگەن باپكەر ەدىم, مەنى وليمپياداعا جىبەرمەي جاتىر, اككرەديتاتسيا جاساپ بەرەسىز بە?» – دەدىم. ول كىسى ايتتى «اكەل, پاسپورتىڭدى!» دەپ. ءسويتىپ, قىرعىزستان ارقىلى بارىپ كوردىم, افينا وليمپياداسىن. پايدالاناتىن كەزدە – كەرەكسىڭ, ال, كەيىن ەشكىمگە قاجەتىڭ جوق», – دەگەن بۇرىنعى باس باپكەردىڭ القىمىنا وكسىك تىعىلدى.

«مەن ساعان وسىنىڭ ءبارىن نە ءۇشىن ايتىپ وتىرمىن? ەل ءبىلسىن, سەن ءبىل. مەنەن كەيىنگى باپكەرلەر ەكىنشى تۇرسىنعالي ەدىلوۆ بوپ قيانات كورمەسىن!» دەپ اياقتايدى سۇحباتىن, سيدنەي وليمپياداسىنان قازاقستانعا 2 التىن, 2 كۇمىس الىپ كەلگەن باس باپكەر.