«تىرناق استىنان “كىر” ىزدەۋ»: قورعانىس ءمينيسترى جاقسىلىقوۆتىڭ ايەلىنىڭ كليپىنە قانشا قاراجات جۇمسالدى?

فوتو: todayinfo

قورعانىس ءمينيسترى رۋسلان جاقسىلىقوۆتىڭ ايەلى ەلميرا باققالي “قازاقستان” انىنە 2015 جىلى بەينەكليپ تۇسىرگەن, دەپ حابارلايدى Alash.KZ.

بەينەكليپكە اسكەري تەحنيكانىڭ تۇتاس كولونناسى, تىكۇشاق پەن ءبىر توپ سارباز تۇسكەن. ونداعى ادام سانى مەن اسكەري تەحنيكانى ەسكەرسەك, كوپ قاراجات جۇمسالعانى انىق.

ال قورعانىس مينيسترلىگى, تىرناق استىنان “كىر” ىزدەۋدىڭ قاجەتى جوعىن ايتتى. ولاردىڭ مالىمەتىنشە, بەينەبايان وسىدان 10 جىل بۇرىن تۇسىرىلگەن. بۇل ۇلتتىق ۇلان تۋرالى اسكەري-پاتريوتتىق باعىتتا جاسالعان العاشقى يميدجدىك كليپ.

«كليپ جاۋىنگەرلىك دايىندىق بويىنشا جوسپارلى ساباقتار كەزىندە تۇسىرىلگەن. ونى جاساۋعا ەشقانداي مەملەكەتتىك قارجى جۇمسالماعان. دەمەۋشىلەردىڭ كومەگى تارتىلعان. 10 جىلعا جۋىق ۋاقىتتان كەيىن بۇعان ءمان بەرۋدىڭ قاجەتى قانشا?», – دەيدى ولار.

ايتا كەتەيىك, 2014 جىلى رۋسلان جاقسىلىقوۆ ۇلتتىق ۇلاننىڭ باس قولباسشىسى قىزمەتىنە كەلدى. ال بەينەكليپ ەلميرا باققالي انسامبل قۇرامىندا بولعان كەزدە, 2015 جىلى جارىققا شىققان. ول – قازاقستاننىڭ ەڭبەك سىڭىرگەن قايراتكەرى. «قۇرمەت» وردەنىنىڭ يەگەرى.