جاڭالىقتار
تجم قازاقستانداعى سۋ تاسقىنى جاعدايى تۋرالى مالىمەت بەردى: ءتورت وبلىس باقىلاۋدا
فوتو: تجم
ناۋرىز ايىنىڭ باسىنان باستاپ قازاقستاننىڭ بارلىق وڭىرىندە سۋ تاسقىنىنىڭ الدىن الۋ شارالارى جۇرگىزىلىپ جاتىر. بۇل جۇمىستار اۋماقتاردىڭ سۋ باسۋ قاۋپىن بارىنشا ازايتۋ جانە حالىقتىڭ قاۋىپسىزدىگىن قامتاماسىز ەتۋ ماقساتىندا قولعا الىنعان, دەپ حابارلايدى qandastar.kz
ناۋرىز ايىنىڭ باسىنان باستاپ 4 ميلليون تەكشە مەتر سۋ سورىلىپ, 658مىڭنان استام قاپشىق جانە 45 مىڭ تونناعا جۋىق ينەرتتى ماتەريالدار توسەلدى. سونداي-اق, 842 مىڭ مەتردەن استام ارىقتاردى تازارتۋ جۇمىسى جۇرگىزىلدى.
Zakon.kz جازعانداي, قازىرگى ۋاقىتتا اۆاريالىق-قۇتقارۋ جۇمىستارىنا بارلىعى 577 ادام, 179 بىرلىك تەحنيكا, 58 موتوپومپالار جانە ءجۇزۋ قۇرالدارى جۇمىلدىرىلدى. سۋ تاسقىنى قاۋپى جاعدايىندا قاۋىپسىزدىكتى قامتاماسىز ەتۋ ءۇشىن تجم, ءىىم, جاو جانە باسقا دا ۇيىمداردىڭ قىزمەتكەرلەرى جۇمىلدىرىلدى.
بۇگىنگى تاڭدا بىرنەشە سۋ باسقان اۋماقتار باقىلاۋدا. اقمولا وبلىسىنىڭ استراحان اۋدانى جاڭاتۇرمىس, كولۋتون, ستارىي كولۋتون, ياگودنوە جانە اتباسار اۋدانى ا.قۇرمانوۆ اۋىلدارىندا 69 جەكە تۇرعىن ءۇيدى, ال بۇلاندى اۋدانى نوۆوبراتسكوە اۋىلىندا 29 اۋلا اۋماعىن سۋ باسقان.
اۆتوموبيل جولدارىندا 26 سۋ توگىلۋ جانە 5 شايىلىپ كەتكەن ۋچاسكە باقىلاۋدا, 14 ەلدى مەكەن كولىك قاتىناسىنسىز قالدى. سۋ تاسقىنى كەزەڭىندە 383 ادام ەۆاكۋاتسيالاندى, ونىڭ 10-ى ۋاقىتشا ورنالاستىرۋ پۋنكتتەرىندە, ال 159 ەۆاكۋاتسيالانعان ادام تۋىستارىنىڭ قاسىندا تۇرادى, 214 ادام ۇيلەرىنە ورالدى.
كۇشتەر مەن قۇرالدار ۇنەمى دايىندىقتا تۇر. ەۆاكۋاتسيالانعان حالىقتى تاسىمالداۋعا ارنالعان ەۆاكۋاتسيالىق پۋنكتتەر مەن كولىك قۇرالدارى ءازىر. تجم اۋە كەمەلەرى دە تۇراقتى دايىندىقتا. قازىر ءتورت ايماق باقىلاۋدا: اقمولا, سولتۇستىك قازاقستان, شىعىس قازاقستان وبلىستارى جانە اباي وبلىسى. الايدا, مۇندا سۋ تاسقىنى مەن سۋ باسۋ قاۋپى وتكەن جىلدىڭ سايكەس كەزەڭىمەن سالىستىرعاندا ەداۋىر تومەن.
