ۋاقىت بەلدەۋىن اۋىستىرۋعا قارسى پەتيتسيا: شەشىم قابىلداۋ مەرزىمدەرى اتالدى

ساۋدا جانە ينتەگراتسيا ءمينيسترى ارمان شاققاليەۆ قازاقستاندا ۋاقىت بەلدەۋىن قايتا وزگەرتۋ ماسەلەسى پەتيتسيا اياسىندا قارالاتىنىن ايتتى,-دەپ حابارلايدى Qandastar.kz

بيىل 1 ناۋرىزعا قاراعان ءتۇنى قازاقستان بىرىڭعاي UTC+5 ۋاقىت بەلدەۋىنە وتكەن ەدى. پارلامەنتتىڭ بىرلەسكەن وتىرىسىنىڭ الدىندا جۋرناليست ۆەدومستۆو باسشىسىنا «ۋاقىت بەلدەۋىن اۋىستىرۋعا قارسى پەتيتسيانى قاراستىرىپ جاتىرسىزدار ما?» دەپ ساۋال جولدادى.

ارمان شاققاليەۆ پەتيتسيانى قاراۋ ءتارتىبىن ءتۇسىندىردى.

«پەتيتسيانى زاڭدا بەكىتىلگەن الگوريتم بويىنشا قارايمىز. بۇگىن جۇمىس توبىنىڭ وتىرىسى ءوتىپ جاتىر. بۇل – ءبىرىنشى كەزەڭ, ياعني ۇيىمداستىرۋ جۇمىسى ءجۇرىپ جاتىر. ءوتىنىش بەرۋشى ۇسىنعان بارلىق ادامدى ياعني (جۇمىس توبىنا) كىم كىرۋى كەرەك, وعان ەنگىزدىك. قازىر بۇل توپتا جۇمىس ىستەۋ ءپرينتسيپىن ايتىپ جاتىرمىز: اشىقتىق, ارگۋمەنتتىڭ بولۋى, سىيلاستىق. جۇمىس كەستەسىن بەكىتىپ, كۇن ءتارتىبىن بەكىتىپ جاتىرمىز. شاحمات ويىنىنداعى سياقتى ءاربىر ءجۇرىسى دالەلگە ءسۇيىنىپ جاسالادى, قۇر ايىپتاۋعا, ەموتسياعا بوي بەرمەيمىز. بۇل – پەتيتسيانى قاراستىرۋدىڭ ەكىنشى كەزەڭى. ءۇشىنشى كەزەڭدە, كوميسسيا قورىتىندىنى شىعارىپ, ءوز شەشىمىن ايتادى. ءتورتىنشى كەزەڭ, پەتيتسيا 40 كۇن قارالاتىنىن بىلەسىزدەر. سوندىقتان زاڭدا بەكىتىلگەن مەرزىمگە سايكەس بارلىعى ىسكە اسىرىلادى», – دەدى مينيستر.