جاڭالىقتار
ۋاقىتتى 1 ساعات كەرى ەمەس, 23 ساعات العا جىلجىتۋ ۇسىنىلدى
جالپى, الەمدە 175 ەل ستاندارتتى ءبىر ساعاتقا باعىنادى.
ال ەڭ كوپ ۋاقىت بەلدەۋى بار مەملەكەت – رەسەي. ول جاق 11 ءتۇرلى ۋاقىت بەلدەۋىمەن جۇرەدى
بىرىڭعاي ۋاقىتقا كوشۋگە كەلگەندە قازاقستاندىقتاردىڭ پىكىرى قاق جارىلادى. ءبىرى ەكونوميكالىق تۇرعىدان ۇتىلامىز دەسە, ەندى ەكىنشىسى «ۇلت ساۋلىعىن بارىنەن جوعارى قويۋىمىز كەرەك» دەگەن پىكىردە.
جۋرناليست نۇرلات بايگەنجە ۋاقىت بەلدەۋى ماسەلەسىندە «قازاقستاننىڭ قادامى قولايلى ما?» دەگەن ساۋالعا جاۋاپ ىزدەيدى.
– 2023 جىلدىڭ ساۋىرىندە ساۋدا جانە ينتەگراتسيا مينيسترلىگى جانىنان ۆەدومستۆوارالىق جۇمىس توبى قۇرىلىپ, ونىڭ قۇرامىنا ۆ.فەسەنكوۆ اتىنداعى استروفيزيكا ينستيتۋتى, گەنەتيكا جانە فيزيولوگيا ينستيتۋتى, گەوگرافيا جانە سۋ قاۋىپسىزدىگى ينستيتۋتى, م.ايتحوجين اتىنداعى مولەكۋلالىق بيولوگيا جانە بيوحيميا ينستيتۋتى, قازاق ونكولوگيا جانە راديولوگيا عىلىمي-زەرتتەۋ ينستيتۋتىنىڭ عالىمدارى, پارلامەنت دەپۋتاتتارى, قوعام بەلسەندىلەرى ەنىپ, UTC+6 ۋاقىت بەلدەۋى تابيعي كۇن ۋاقىتىنا سايكەس كەلمەيتىنىن ايتىپ, دەنساۋلىققا تەرىس اسەر ەتەتىنىن انىقتادى (قازاقستان UTC+5 جانە UTC+6 ۋاقىت بەلدەۋىن قولدانادى). ەندى ساراپشىلار اعزانىڭ بيولوگيالىق ساعاتتارىن ساقتاۋ ءۇشىن بۇكىل ەل بويىنشا UTC+5 بىرىڭعاي ۋاقىتىنا كوشۋدى ۇسىندى, – دەيدى ول.
شىنى كەرەك, قازاقستاندىقتار ەلدەگى ۋاقىت بەلدەۋىنىڭ اركەلكىلىگىنە كوبىنە پويىز بەن ۇشاقتان قالىپ قويعاندا نارازى بولادى. وسى كۇنى قازاقستاننىڭ باتىسىنداعى 4 وبلىس جانە قىزىلوردادا ءبىر ۋاقىت, وزگە وبلىس تۇرعىندارى ءبىر ۋاقىتتى پايدالانىپ كەلەدى.
– قولدانبالى حرونوبيولوگيا بويىنشا مامان, قوعام بەلسەندىسى بولات نۇرحوجاەۆتىڭ سوزىنشە, عىلىمي كونسەنسۋسقا ساي, ۋاقىت بەلدەۋلەرىن بارىنشا ءتيىمدى پايدالانۋ كەرەك. ەلدىڭ بارلىق ايماعى UTC+5 بىرىڭعاي ۋاقىتىنا كوشۋى ۇتىمدى شەشىم بولدى. قىسقاسى, 1 ناۋرىزدان باستاپ ەل باتىسىنداعى وڭىرلەر مەن قىزىلوردا وبلىسى قولداناتىن UTC+5 ۋاقىت بەلدەۋىمەن بارلىعىمىز جۇرەتىن بولامىز. بالكىم, الداعى ۋاقىتتا جازعى ۋاقىتقا اۋىساتىن شىعارمىز, – دەپ تۇيىندەدى ءسوزىن جۋرناليست.
2018 جىلى 21 جەلتوقساننان 22 جەلتوقسانعا قاراعان تۇستا قىزىلوردا وبلىسىندا ساعات 00:00-دە جەرگىلىكتى ۋاقىت ءبىر ساعات ارتقا جىلجىتىلعان ەدى. سوندا ساعات ءتىلىن 1 ساعات كەرى ەمەس, العا 23 ساعات جىلجىتۋدى ۇسىنعاندار بولدى. سەبەبى, «ساعات ءتىلىن كەرى بۇرۋعا بولمايدى» دەگەن قاعيدا ەل ىشىندە بولسا كەرەك.
