جاڭالىقتار
ۋاقىتتى قايتارۋ تۋرالى پەتيتسيا: سوت شەشىمى شىقتى
فوتو: Tengrinews.kz/ تۇرار قازانعاپوۆ
ۋاقىتتى قايتارۋ تۋرالى ءوتىنىشتى قاراۋ ناتيجەسىن سوت زاڭدى دەپ تانىدى, دەپ حابارلايدى qandastar.kz Massaget.kz تىلشىسىنە سىلتەمە جاساپ.
تالاپ قويۋشى ل. «ۋاقىتتى كەرى قايتارۋ» پەتيتسياسىن قاراۋ ناتيجەسىن زاڭسىز دەپ تانۋ تۋرالى تالاپپەن سوتقا جۇگىنىپ, وندا پەتيتسيانى قاراۋ مەن شەشىم قابىلداۋدا ءراسىم بۇزىلعانى كورسەتىلگەن.
سوت ءىس قۇجاتتارىن زەردجەلەپ, كەلەسىنى انىقتادى.
قازاقستان رەسپۋبليكاسى اكىمشىلىك راسىمدىك-پروتسەستىك كودەكسىنىڭ (ارپك) تالاپتارىنا سايكەس «ۋاقىتتى كەرى قايتارۋ» پەتيتسياسى تىركەلدى.
ءوتىنىش 50 مىڭ قولداۋ داۋىسىن جيناپ, تىركەلگەن. ءوتىنىشتى قاراۋ قر ساۋدا جانە ينتەگراتسيا مينيسترلىگىنە (مينيسترلىك) تاپسىرىلعان.
جۇمىس توبىن قالىپتاستىرۋ ءۇشىن مينيسترلىك ءوتىنىش بەرۋشىگە, قازاقستان رەسپۋبليكاسىنىڭ پارلامەنتىنە, مۇددەلى مەملەكەتتىك ورگاندارعا, قوعامدىق بىرلەستىككە جۇمىس توبىنىڭ قۇرامىنا ەنگىزۋ ءۇشىن كانديداتۋرالار جىبەرۋدى سۇراپ حاتتار جولداعان.
قازاقستان رەسپۋبليكاسى پارلامەنتى ءماجىلىسىنىڭ 2024 جىلعى 14 ماۋسىمداعى حاتىمەن جۇمىس توبىنا قاتىسۋ ءۇشىن كانديداتتار ە.ا.ءابىل مەن م.ا.ابەنوۆتى ۇسىنىلدى.
ءمينيستردىڭ 2024 جىلعى 21 ماۋسىمداعى بۇيرىعىمەن پەتيتسيانى قاراۋ جونىندەگى جۇمىس توبىنىڭ قۇرامى بەكىتىلىپ, دەپۋتات ە.ا.ءابىل جۇمىس توبى باسشىسىنىڭ ورىنباسارى بولىپ تاعايىندالعان.
جۇمىس توبىنىڭ جۇمىسى اياسىندا 2024 جىلعى 21 ماۋسىمدا, 16 شىلدەدە جانە 2 تامىزدا 3 وتىرىس وتكەن. 2024 جىلعى 02 تامىزدا ءوتىنىشتى قاراۋ ناتيجەلەرى بويىنشا ءوتىنىشتى قاناعاتتاندىرۋدان باس تارتۋ تۋرالى شەشىم قابىلدانعان.
وتىنىشتەردى تىركەۋ, ەسەپكە الۋ مەملەكەت پەن ازاماتتىق قوعامنىڭ ءوزارا ءىس-قيمىلى سالاسىنداعى ۋاكىلەتتى ورگان بەلگىلەگەن تارتىپپەن جۇزەگە اسىرىلادى.
ارپك-ءنىڭ 90-6-بابىنا سايكەس ءوتىنىشتى قاراۋ ناتيجەلەرى بويىنشا ورتالىق مەملەكەتتىك نەمەسە جەرگىلىكتى اتقارۋشى ورگاننىڭ ءبىرىنشى باسشىسى, جەرگىلىكتى وكىلدى ورگاننىڭ توراعاسى مىناداي شەشىمدەردىڭ ءبىرىن قابىلدايدى:
ءوتىنىشتى تولىق نەمەسە ءىشىنارا قاناعاتتاندىرۋ تۋرالى;
ءوتىنىشتى قاناعاتتاندىرۋدان باس تارتۋ تۋرالى.
پەتيتسيانى قاراۋ جانە ول بويىنشا شەشىم قابىلداۋ ءراسىمى ارپك نورمالارىمەن رەگلامەنتتەلگەن.
پەتيتسيانى قاراۋ ناتيجەلەرى بويىنشا شەشىمگە داۋ ايتۋ تۋرالى تالاپتاردى قاراۋ كەزىندە سوت ونى قاراۋ ءتارتىبى مەن مەرزىمدەرىنىڭ ساقتالۋىنا عانا باعا بەرەدى.
پەتيتسيانى قاراۋ كەزىندە ءراسىمنىڭ بۇزىلماۋىنا بايلانىستى, سوت تالاپ قويۋدى قاناعاتتاندىرۋدان باس تارتتى.
تالاپ قويۋشىنىڭ بەلگىلەنگەن ءتارتىپتى بۇزا وتىرىپ, وتىرىستىڭ توراعاسى قازاقستان رەسپۋبليكاسى ءماجىلىسىنىڭ دەپۋتاتى ە.ا.ءابىلدىڭ بولعاندىعى تۋرالى دالەلدەرى سوتپەن قابىلدانبادى. سەبەبى ە.ا.ءابىل جۇمىس توبى باسشىسىنىڭ ورىنباسارى بولعانى انىقتالدى.
كوميسسيا قۇرامىن قالىپتاستىرۋ كەزىندە قانداي دا ءبىر بۇزۋشىلىقتارعا جول بەرىلمەگەن.
سوت شاعىمدالعان شەشىم مەن پەتيتسيانى قاراۋ جونىندەگى ارەكەتتەر زاڭدى, مەملەكەتتىك ورگاننىڭ قۇزىرەتى شەگىندە جاسالعان جانە راسىمدىك بۇزۋشىلىقتار انىقتالماعان دەگەن قورىتىندىعا كەلدى.
شەشىم زاڭدى كۇشىنە ەنگەن جوق.
