ءبىلىم
ۇبت-عا وزگەرتۋ ەنگىزىلدى
فوتو: اشىۇ دەرەككوز
عىلىم جانە جوعارى ءبىلىم ءمينيسترىنىڭ 2025 جىلعى 1 ساۋىردەگى بۇيرىعىمەن ۇلتتىق بىرىڭعاي تەستىلەۋدى (ۇبت) وتكىزۋ قاعيدالارىنا وزگەرىستەر ەنگىزىلدى, دەپ حابارلادى qandastar.kz
«ۇبت قاعاز نەمەسە ەلەكتروندىق فورماتتا ۇلتتىق تەستىلەۋ ورتالىعى ارقىلى نەمەسە جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمدارىنىڭ بازاسىندا, نە بولماسا ۇلتتىق تەستىلەۋ ورتالىعى ايقىندايتىن ۇيىمداردا وتكىزىلەدى. ۇبت-عا قاتىسۋعا ءوتىنىش (قاعاز جانە ەلەكتروندىق فورماتتا) ۇلتتىق تەستىلەۋ ورتالىعىنىڭ www.testcenter.kz سايتىندا ونلاين رەجيمدە قابىلدانادى», — دەلىنگەن قۇجاتتا.
ءمينيستردىڭ بۇيرىعىنا سايكەس, نەگىزگى وزگەرىستەر مۇگەدەكتىگى بار مەكتەپ بىتىرۋشىلەردىڭ ۇبت-عا قاتىسۋ تارتىبىنە قاتىستى.
«قاعاز نەمەسە ەلەكتروندىق فورماتتا ۇبت-عا قاتىسۋ ءۇشىن مۇگەدەكتىگى بار بالالار مەن مۇگەدەكتىگى بار تۇلعالار (كورۋ, ەستۋ, تىرەك-قيمىل اپپاراتى قىزمەتتەرىنىڭ بۇزىلۋى بار) ەڭبەك جانە حالىقتى الەۋمەتتىك قورعاۋ ءمينيسترىنىڭ 2023 جىلعى 29 ماۋسىمداعى № 260 بۇيرىعىمەن بەكىتىلگەن «مەديتسينالىق-الەۋمەتتىك ساراپتاما جۇرگىزۋ قاعيدالارىن بەكىتۋ تۋرالى» (نقا مەملەكەتتىك تىركەۋ تىزىلىمىندە № 32922 تىركەلگەن) بۇيرىعىنا سايكەس مۇگەدەكتىك بەلگىلەنگەنى تۋرالى قۇجاتتى ۇبت-عا ءوتىنىش بەرۋ باعدارلامالىق قامتاماسىز ەتۋ جۇيەسىنە تىركەيدى. سونداي-اق, كورۋ, تىرەك-قيمىل اپپاراتى قىزمەتتەرىنىڭ بۇزىلۋى بار مۇگەدەكتىگى بار بالالار مەن تۇلعالار ءۇشىن ءپان مۇعالىمى ەمەس كومەكشىنى جانە ەستۋ قابىلەتى بۇزىلعان مۇگەدەكتىگى بار بالالار مەن تۇلعالار ءۇشىن ىم ءتىلىن مەڭگەرگەن ماماندى ۇسىنۋ قاجەتتىگى تۋرالى قوسىمشا مالىمەت كورسەتىلەدى», — دەلىنگەن بۇيرىقتا.
سونداي-اق قۇجاتتا كەلەسى ماسەلەلەر اتاپ وتىلەدى:
- شەتەل ءتىلىن (اعىلشىن ءتىلىن) مەڭگەرۋ دەڭگەيىن جالپى ەۋروپالىق شەتەل ءتىلىن مەڭگەرۋ قۇزىرەتتەرىنە (ستاندارتتارىنا) سايكەس راستايتىن حالىقارالىق سەرتيفيكاتتارى بار تۇلعالار ءوز قالاۋى بويىنشا اعىلشىن ءتىلى بويىنشا بەيىندىك پاننەن نەمەسە «شەتەل ءتىلى» (اعىلشىن) ارنايى پانىنەن بوساتىلادى;
- TOEFL ITP, TOEFL IBT, IELTS سەكىلدى اعىلشىن ءتىلىن مەڭگەرۋ بويىنشا حالىقارالىق سەرتيفيكاتتارى بار تۇلعالار ۇبت-عا نەمەسە كونكۋرسقا قاتىسۋ ءۇشىن ءوتىنىش بەرگەن كەزدە سەرتيفيكات مالىمەتتەرىن كورسەتۋى ءتيىس;
- SAT, ACT, IB, A-Level, TOEFL ITP, TOEFL IBT, IELTS سياقتى حالىقارالىق ستاندارتتالعان تەست سەرتيفيكاتتارى بار تۇلعالار ۇبت-عا ءوتىنىش بەرۋ دەرەكتەر بازاسىنا مالىمەتتەردى ەنگىزىپ, سەرتيفيكات كوشىرمەسىن جۇكتەۋى قاجەت.
- ۇبت-عا قاتىسۋعا ءوتىنىش بەرگەن, الايدا تەستىلەۋگە قاتىسپاعان تالاپكەرلەرگە, تەست وتكىزۋ كۇندەرى بوس ورىن بولعان جاعدايدا, سول كەزەڭنىڭ ىشىندە ءبىر كۇنگە تەستىلەۋگە قاتىسۋ مۇمكىندىگى بەرىلەدى.
- بۇل مۇمكىندىك كەلەسى دالەلدى سەبەپتەر بولعان جاعدايدا قاراستىرىلادى:
- دەنساۋلىعىنا بايلانىستى, تەستىلەۋ كۇنىمەن سايكەس كەلەتىن № 026/ۋ نىسانىنداعى دارىگەرلىك-كونسۋلتاتسيالىق كوميسسيا قورىتىندىسى نەمەسە امبۋلاتوريالىق كارتادان ءۇزىندى جازبا/اۋرۋ تاريحىنان انىقتاما بولعان جاعدايدا;
- «نەكە (ەرلى-زايىپتىلىق) جانە وتباسى تۋرالى» كودەكستىڭ 1-بابى 13) تارماقشاسىندا كورسەتىلگەن جاقىن تۋىستارىنىڭ قايتىس بولۋىن راستايتىن قۇجاتتار بولعان جاعدايدا;
- رەسپۋبليكالىق جانە حالىقارالىق وليمپيادالارعا, عىلىمي جوبالار بايقاۋلارىنا (عىلىمي جارىستارعا), ورىنداۋشىلار بايقاۋلارىنا, كاسىبي شەبەرلىك بايقاۋلارىنا جانە سپورتتىق جارىستارعا قاتىسقان جاعدايدا (جاڭا نورما);
- توتەنشە جاعدايلار بولعاندا.
سونىمەن قاتار:
- ۇبت قاعاز فورماتىندا تاپسىراتىن تالاپكەر قۇجاتتاردى قوسا تىركەپ, مەملەكەتتىك كوميسسيا توراعاسىنىڭ اتىنا ۇبت-نى قايتا تاپسىرۋعا ءوتىنىش بەرەدى;
- ۇبت ەلەكتروندىق فورماتىندا تاپسىراتىن تالاپكەر قۇجاتتاردى قوسا تىركەپ, ۇلتتىق تەستىلەۋ ورتالىعى ديرەكتورىنىڭ اتىنا ۇبت-نى قايتا تاپسىرۋعا ءوتىنىش بەرەدى.
تەستىلەۋ كەلەسى مەرزىمدەردە وتكىزىلەدى:
10 قاڭتار — 10 اقپان ارالىعىندا:
- جالپى ورتا ءبىلىم بەرۋ ۇيىمدارىنىڭ 11 (12)-سىنىپ تۇلەكتەرى ءۇشىن, قالاۋى بويىنشا جوعارى وقۋ ورىندارىنا (جوو) اقىلى نەگىزدە وقۋعا ءتۇسۋ ماقساتىندا;
- وتكەن جىلدارداعى جالپى ورتا, تەحنيكالىق جانە كاسىپتىك نەمەسە ورتا بىلىمنەن كەيىنگى ءبىلىم بەرۋ ۇيىمدارىنىڭ تۇلەكتەرى ءۇشىن, رەسپۋبليكالىق نەمەسە جەرگىلىكتى بيۋدجەت قاراجاتى ەسەبىنەن ءبىلىم بەرۋ گرانتتارىن تاعايىنداۋ كونكۋرسىنا قاتىسۋعا نەمەسە اقىلى نەگىزدە جوو-عا تۇسۋگە;
- شەتەلدە ءبىلىم العان جالپى ورتا ءبىلىم بەرۋ ۇيىمدارىنىڭ تۇلەكتەرى, سونداي-اق قازاقستان رەسپۋبليكاسىنىڭ ازاماتى ەمەس, قازاق ۇلتىنا جاتاتىن تۇلعالار ءۇشىن, ءبىلىم بەرۋ گرانتتارى كونكۋرسىنا نەمەسە اقىلى نەگىزدە جوو-عا تۇسۋگە;
- جوو-عا كۇندىزگى وقۋ ءتۇرى بويىنشا اقىلى نەگىزدە قابىلدانعان, الايدا ۇبت ناتيجەسى بويىنشا شەكتى بالل جيناي الماعان, بەيىندىك پاندەر كومبيناتسياسى سايكەس كەلمەيتىن نەمەسە ۇبت ناتيجەلەرى جويىلعان تۇلعالار ءۇشىن, سول كالەندارلىق جىلى اقىلى نەگىزدە قايتا وقۋعا ءتۇسۋ ءۇشىن;
- شىعارماشىلىق دايارلىقتى قاجەت ەتەتىن ءبىلىم بەرۋ باعدارلامالارى بويىنشا وقيتىن جانە باسقا ءبىلىم بەرۋ باعدارلامالارىنا اقىلى نەگىزدە اۋىسقىسى كەلەتىن جوو ستۋدەنتتەرى ءۇشىن;
- «پەداگوگيكالىق عىلىمدار» ءبىلىم بەرۋ سالاسى بويىنشا ءبىلىم بەرۋ باعدارلامالارىنا اقىلى نەگىزدە اۋىسقىسى كەلەتىن جوو ستۋدەنتتەرى ءۇشىن.
1 ناۋرىز — 6 ءساۋىر ارالىعىندا (بۇرىن — 1–31 ناۋرىز):
- جالپى ورتا ءبىلىم بەرۋ ۇيىمدارىنىڭ 11 (12)-سىنىپ تۇلەكتەرى ءۇشىن, قالاۋى بويىنشا جوو-عا اقىلى نەگىزدە ءتۇسۋ ماقساتىندا;
- وتكەن جىلدارداعى جالپى ورتا, تەحنيكالىق جانە كاسىپتىك نەمەسە ورتا بىلىمنەن كەيىنگى ءبىلىم بەرۋ ۇيىمدارىنىڭ تۇلەكتەرى ءۇشىن, ءبىلىم بەرۋ گرانتتارى كونكۋرسىنا نەمەسە اقىلى نەگىزدە جوو-عا تۇسۋگە;
- شەتەلدە ءبىلىم العان جالپى ورتا ءبىلىم بەرۋ ۇيىمدارىنىڭ تۇلەكتەرى, سونداي-اق قازاقستان رەسپۋبليكاسىنىڭ ازاماتتارى بولىپ تابىلمايتىن, قازاق ۇلتىنا جاتاتىن تۇلعالار ءۇشىن, ءبىلىم بەرۋ گرانتتارى كونكۋرسىنا نەمەسە اقىلى نەگىزدە جوو-عا تۇسۋگە;
- جوو-عا كۇندىزگى وقۋ ءتۇرى بويىنشا اقىلى نەگىزدە قابىلدانعان, بىراق ۇبت ناتيجەسى بويىنشا شەكتى بالل جيناي الماعان, بەيىندىك پاندەر كومبيناتسياسى سايكەس كەلمەيتىن نەمەسە ۇبت ناتيجەلەرى جويىلعان تۇلعالار ءۇشىن, قايتا وقۋعا ءتۇسۋ ماقساتىندا.
10 مامىر — 10 شىلدە ارالىعىندا (بۇرىن — 16 مامىر — 5 شىلدە):
- بيىل جالپى ورتا ءبىلىم بەرۋ ۇيىمدارىنىڭ تۇلەكتەرى ءۇشىن رەسپۋبليكالىق نەمەسە جەرگىلىكتى بيۋدجەت قاراجاتى ەسەبىنەن ءبىلىم بەرۋ گرانتىن تاعايىنداۋ كونكۋرسىنا قاتىسۋعا, اقىلى نەگىزدە جوو-عا تۇسۋگە, نەمەسە رەسپۋبليكالىق بيۋدجەت قاراجاتى ەسەبىنەن مەملەكەتتىك ءبىلىم بەرۋ تاپسىرىسى بويىنشا وقۋعا (قالاۋى بويىنشا);
- وتكەن جىلدارداعى جالپى ورتا, تەحنيكالىق جانە كاسىپتىك نەمەسە ورتا بىلىمنەن كەيىنگى ءبىلىم بەرۋ ۇيىمدارىنىڭ تۇلەكتەرى ءۇشىن ءبىلىم بەرۋ گرانتىن تاعايىنداۋ كونكۋرسىنا قاتىسۋعا نەمەسە اقىلى نەگىزدە جوو-عا تۇسۋگە (قالاۋى بويىنشا);
- جوعارى ءبىلىمنىڭ قىسقارتىلعان وقۋ مەرزىمدەرىن كوزدەيتىن ءبىلىم بەرۋ باعدارلامالارى بويىنشا وقۋعا تۇسەتىن تەحنيكالىق جانە كاسىپتىك نەمەسە ورتا بىلىمنەن كەيىنگى ءبىلىم بەرۋ ۇيىمدارىنىڭ تۇلەكتەرى ءۇشىن, ءبىلىم بەرۋ گرانتى كونكۋرسىنا قاتىسۋعا (قالاۋى بويىنشا);
- شەتەلدە ءبىلىم العان ورتا ءبىلىم بەرۋ ۇيىمدارىنىڭ تۇلەكتەرى مەن قازاقستان رەسپۋبليكاسىنىڭ ازاماتتارى بولىپ تابىلمايتىن, قازاق ۇلتىنا جاتاتىن شەتەلدىك تۇلعالار ءۇشىن گرانت كونكۋرسىنا نەمەسە اقىلى نەگىزدە جوو-عا تۇسۋگە (قالاۋى بويىنشا);
- جوو-عا كۇندىزگى وقۋ ءتۇرى بويىنشا اقىلى نەگىزدە قابىلدانعان, شەكتى بالل جيناماعان, بەيىندىك پاندەر كومبيناتسياسى سايكەس كەلمەگەن نەمەسە ۇبت ناتيجەلەرى جويىلعان تۇلعالار ءۇشىن سول جىلى اقىلى تۇردە وقۋعا ءتۇسۋ ماقساتىندا.
وسى كەزەڭدە تاپسىرىلعان ۇبت ناتيجەلەرى:
- ءبىلىم بەرۋ گرانتىن تاعايىنداۋ كونكۋرسىنا قاتىسۋعا,
- نەمەسە اقىلى نەگىزدە جوو-عا تۇسۋگە جارامدى دەپ ەسەپتەلەدى.
10 — 20 تامىز ارالىعىندا:
- بيىل ورتا ءبىلىم بەرۋ ۇيىمدارىنىڭ تۇلەكتەرى ءۇشىن ءبىلىم بەرۋ گرانتى كونكۋرسىنا, اقىلى نەگىزدە جوو-عا تۇسۋگە نەمەسە مەملەكەتتىك ءبىلىم بەرۋ تاپسىرىسى بويىنشا وقۋعا (قالاۋى بويىنشا);
- وتكەن جىلدارداعى ورتا, تەحنيكالىق جانە كاسىپتىك نەمەسە ورتا بىلىمنەن كەيىنگى ءبىلىم بەرۋ ۇيىمدارىنىڭ تۇلەكتەرى ءۇشىن گرانت كونكۋرسىنا نەمەسە اقىلى نەگىزدە وقۋعا (قالاۋى بويىنشا);
- شەتەلدە ءبىلىم العان تۇلەكتەر مەن قازاق ۇلتىنا جاتاتىن, بىراق قر ازاماتى بولىپ ەمەس تۇلعالار ءۇشىن گرانت كونكۋرسىنا نەمەسە اقىلى نەگىزدە جوو-عا تۇسۋگە (قالاۋى بويىنشا);
- اقىلى نەگىزدە كۇندىزگى بولىمگە قابىلدانعان, بىراق شەكتى بالل جيناماعان, بەيىندىك پاندەرى سايكەس كەلمەيتىن نەمەسە ناتيجەلەرى جويىلعان تالاپكەرلەر ءۇشىن قايتا ءتۇسۋ ماقساتىندا;
- شىعارماشىلىق دايىندىقتى قاجەت ەتەتىن ءبىلىم بەرۋ باعدارلامالارى بويىنشا وقيتىن جانە باسقا باعىتتارعا اۋىسقىسى كەلەتىن, سونداي-اق «پەداگوگيكالىق عىلىمدار» سالاسىنا اۋىسقىسى كەلەتىن ستۋدەنتتەر ءۇشىن (اقىلى نەگىزدە).
«10 مامىر — 10 شىلدە ارالىعىندا ۇبت تاپسىراتىن تۇلعالار ءۇشىن بەيىندىك پاندەردى وزگەرتۋگە جول بەرىلمەيدى», — دەلىنگەن قۇجاتتا.
ەلەكتروندىق فورماتتاعى ۇبت-عا ونلاين ءوتىنىش قابىلداۋ مەرزىمدەرى:
- 20 جەلتوقسان — 30 جەلتوقسان ارالىعىندا — تالاپكەر بۇل كەزەڭدە تەك 1 رەت ءوتىنىش بەرەدى;
- 15 اقپان — 25 اقپان ارالىعىندا — تالاپكەر بۇل كەزەڭدە تەك 1 رەت ءوتىنىش بەرەدى;
- 10 ءساۋىر — 25 ءساۋىر ارالىعىندا — تالاپكەر بۇل كەزەڭدە 2 رەتكە دەيىن ءوتىنىش بەرە الادى;
- 25 شىلدە — 5 تامىز ارالىعىندا — تالاپكەر بۇل كەزەڭدە تەك 1 رەت ءوتىنىش بەرەدى.
«ونلاين رەجيمدە ۇبت-عا ءوتىنىش بەرۋ كەزىندە تالاپكەر تەستىلەۋ پۋنكتىن, تەستىلەۋ كۇنىن جانە ۋاقىتىن ءوزى تاڭدايدى», — دەلىنگەن جاڭا ەرەجەدە.
