جاڭالىقتار
ءۇي كەزەگىنەن زاڭسىز شىققان اسكەري قىزمەتكەر سوتتا جەڭدى
فوتو: istockphoto.com
اسكەري قىزمەتشى مەملەكەتتىك ورگاننىڭ ءوزى مەن وتباسى مۇشەلەرىن تۇرعىن ءۇي كەزەگىنەن الىپ تاستاۋ جونىندەگى ارەكەتىن داۋلاپ, جالعا العان تۇرعىن ءۇي ونىڭ جەكە مەنشىگى ەمەس ەكەنىن اتاپ كورسەتكەن, دەپ جازدى qandastar.kz
جەرگىلىكتى سوتتار تالاپ قويۋدى قاناعاتتاندىرۋدان باس تارتا وتىرىپ, تۇرعىن ءۇيدى ساتىپ الۋ شارتىنىڭ بار ەكەندىگىنە سۇيەنىپ, سول ارقىلى ارىزدانۋشى ءوزىنىڭ تۇرعىن ءۇي قۇقىعىن پايدالانىپ, تۇرعىن ۇيگە مۇقتاج رەتىندەگى مارتەبەسىن جوعالتقان دەگەن سەبەپ كەلتىرگەن.
جوعارعى سوتتىڭ سوت القاسى بۇل تۇجىرىمدارمەن كەلىسپەدى, وسى رەتتە ارىز بەرۋشىنىڭ تۇرعىن ۇيگە مۇقتاج اسكەري قىزمەتشىلەر ساناتىنا جاتاتىنىن, ويتكەنى جالعا بەرىلەتىن تۇرعىن ءۇيدىڭ بولۋى اسكەري قىزمەتشىلەردى كەيىننەن ساتىپ الۋ ارقىلى جالداۋ اقىسىن تولەۋ جونىندەگى ءوز مىندەتتەمەلەرىن تولىق ورىنداعانعا دەيىن تۇرعىن ءۇي مارتەبەسىنەن ايىرمايتىندىعىن ۋاجدەگەن.
وسىلايشا, ءىس بويىنشا ارىز بەرۋشى جالعا الىنعان تۇرعىن ءۇيدىڭ مەنشىك يەسى بولىپ تابىلمايتىنى, باسپانا وعان ساتىپ الۋ شارتتارىمەن ۋاقىتشا يەلەنۋگە بەرىلگەندىگى انىقتالدى.
جەرگىلىكتى سوتتاردىڭ سوت اكتىلەرىنىڭ كۇشى جويىلدى, ارىزدى تولىق كولەمدە قاناعاتتاندىرۋ تۋرالى جاڭا شەشىم شىعارىلدى.
جوعارعى سوت مەملەكەتتىك ورگاننىڭ تۇرعىن ءۇي كوميسسياسىنىڭ ارىز بەرۋشىنى ەسەپتەن شىعارۋ تۋرالى شەشىمىن زاڭسىز دەپ تانىپ, جىبەرىلگەن بۇزۋشىلىقتاردى تۇزەتىپ, اسكەري قىزمەتشىنىڭ تۇرعىن ءۇي تولەمدەرىن الۋ قۇقىقتارىن قالپىنا كەلتىرۋدى مىندەتتەدى. مەملەكەتتىك قورعانىس ورگانىنان ارىزدانۋشىنىڭ سوت شىعىندارى وتەلدى.
