ء«ۇي تىرلىگىن مىندەتسىنبەي ىستەيدى»: اعىلشىن جىگىتكە تۇرمىسقا شىققان قازاق قىز قارىم-قاتىناستاعى ەرەكشەلىكتەرىن ايتىپ بەردى

فوتو: اشىق دەرەككوز

اتىراۋلىق مارجان ەرىك TikTok-تاعى ۆيدەولارىمەن ەلدىڭ قىزىعۋشىلىعىن تۋدىردى. ول جەلىدە اعىلشىن جىگىتىنىڭ قالاي تاماق ىستەپ بەرىپ جۇرگەنىن كورسەتكەن. ۆيدەوعا سيپاتتاما رەتىندە ول “تاماق ىستەي المايسىڭ, سەنى كىم الادى دەپ ەدىڭىزدەر, مىنە ول ماعان كۇندە تاماق ىستەپ بەرەدى” دەپ جازعان. Stan.kz اقپارات اگەنتتىگى مارجاننان انگلياداعى ءومىرى جانە اعىلشىن جولداسى تۋرالى سۇراپ, ءبىلدى.

مارجان جوعارى وقۋ ورنىن بىتىرگەن سوڭ, اعىلشىن ءتىلىن ۇيرەنىپ, شەتەلگە شىعۋعا تالپىنعان. اعىلشىنشا سويلەۋدەن تاجىريبە بولسىن دەپ, تاندەم قولدانباسى ارقىلى شەتەلدىكتەرمەن تانىسىپ, تاجىريبە الماسىپ جۇرگەن. جولداسى دەۆيدپەن دە سولاي تانىسىپتى. ەكى جىل بويى اعىلشىنشا سويلەسىپ, ونلاين دوس بولعان.

«ول ماعان «سەن ماعان جازعان ەڭ ءبىرىنشى قازاق قىزىسىڭ» دەدى. ءبىر جولى مەنى جۇمىستان انگلياداعى جازعى كانيكۋلعا قازاقستاننان ستۋدەنتتەر مەن وقۋشىلاردى الىپ بارۋعا جىبەردى. سول توپتىڭ ليدەرى بولىپ مەنى تاعايىندادى. 8-16 جاسار بالالارعا 1 اي قاراپ ءجۇردىم. بالالارمەن جۇمىس ىستەۋ وڭاي ەمەس ەكەن. دەگەنمەن ءوزىم ءۇشىن وتە قىزىق تاجىريبە بولدى. ءوزىم انگلياعا ءبىرىنشى رەت باردىم جانە دەۆيدپەن ءبىرىنشى رەت سول كەزدە كەزدەستىك», –  دەيدى مارجان ەرىك.

انگليادان قايتىپ كەتكەن سوڭ مارجاننىڭ ەڭبەك دەمالىسى باستالعان. سول كەزدە دەۆيد بيلەت الىپ بەرىپ, «كەل, انگليانى شوتلانديانى كورسەتەمىن» دەپ شاقىرىپتى. بىردەن اتا-اناسىمەن دە تانىستىرعان.

«مەنى بىردەن اتا-اناسىمەن تانىستىردى. ولارعا قىزىم مۇسىلمان, قازاقستاننان دەپ ايتقان. اناسى ولاي بولسا, شوشقانىڭ ەتىن جەمەيتىن شىعار دەپ, ماعان تاۋىق ەتىنەن ءداستۇرلى تاماق دايىنداپ بەردى. ال مەن جاقتان انام, تۋىستارىم باسىندا قۋانبادى. «كىم ول, قازاق ەمەس, مۇسىلمان ەمەس. باسقا جەردىڭ ادامى. ەرتەڭ الىپ كەتىپ, سوڭىندا تاستاپ كەتەدى» دەگەن سياقتى پىكىرلەر بولدى. بىراق ول اتا-انامنىڭ الدىنان ءوتتى, مەنىڭ نيەتىم شىنايى دەپ ءبىلدىردى. ەڭ باستىسى مەنى انام قولدادى. “سەن باقىتتى بولساڭ, مەن باقىتتىمىن” دەدى. ول دەۆيدتى قاتتى جاقسى كورىپ كەتتى. كەيىن جاقىندارىمنىڭ دا ويى وزگەردى. ويتكەنى دەۆيد اقتاۋدا, انامنىڭ اپاسىنىڭ ۇيىندە ءۇش كۇن جاتتى. ودان كەيىن اتىراۋعا ءۇش كۇن توقتادىق. قۇلسارىعا اپارىپ, ءوزىم وسكەن جەردى كورسەتتىم. وندا ەكى كۇن بولدىق. وسى ارالىقتا جاقىندارىمنىڭ ۇيىنە كىرىپ, باتالارىن الدىق. كەيىن جىگىتىمدى ەڭ جاقىن قۇربىمنىڭ تويىنا اپاردىم. تامادا ونى 2-3 رەت ويىنعا, بايقاۋلارعا شاقىردى, تويدى ءبىراز كوتەردى. وعان توي ۇنادى جانە مۇلدەم باسقاشا اسەر سىيلادى. سوڭىندا ءبارى اس قايىرعاندا ول دا قايىردى. وسىلاي قۇرمەتىن ءبىلدىردى”, – دەيدى مارجان.

مارجان دەۆيدتى ەڭ ءبىرىنشى اناسى جانە جەڭگەسىمەن تانىستىرعان. سول ساتتە تۇسىرىلگەن ۆيدەو TikTok-تا ەرەكشە تانىلىپ كەتتى.

“كەزدەسۋگە ناعاشى جەڭگەم قاتىسقان. ول دەۆيدكە «قانشا اقشاڭ بار, نەشە بالا بولعانىن قالايسىڭ” دەپ, نەشە ءتۇرلى سۇراق قويدى. سوڭىندا دەۆيد «جەڭگەڭ قاۋىپسىزدىك كوميتەتىنىڭ قىزمەتكەرى سياقتى» دەدى. دەۆيد بولسا, ءوزىنىڭ نيەتىن ءبىلدىرىپ, «قىزىڭىزبەن بىرگە تۇرعىم كەلەدى» دەپ الدىنان ءوتتى. ال مەنىڭ انام مەن اعام ناماز وقيدى. جىگىتىم مۇسىلمان بولماعان سوڭ اعام قارسى بولدى, بىراق انام قولدادى. جىگىتىم مەنىڭ سەنىمىمدى قۇرمەتتەيدى. ەگەر ناماز وقيمىن دەسەڭ, مەن دە يسلام تۋرالى كوبىرەك ءبىلىپ, ىزدەنەمىن دەگەن. بۇيىرسا, قۇدالىق پەن توي كەلەسى جىلى بولادى», – دەيدى ارۋ.

ىستەگەندى دە جاقسى كورەدى ەكەن. ال مارجان ىدىس جۋامىن دەيدى.

ء«بىز باسىنان كەلىسىپ الدىق. مەن جىگىتىمە «مەن تاماق ىستەسەم, تەك قالاعان ۋاقىتىمدا ىستەيمىن. باسقا كەزدە سۇراپ, “نەگە جاسامايسىڭ دەپ قىسپاققا الما» دەدىم. ءۇيدى جيناپ, ىدىس جۋىپ, تازا ۇستايمىن دەپ ايتىپ قويدىم. ال انام بولسا دەۆيدكە جاقتاسادى. حابارلاسىپ, «كۇيەۋبالا, مارجان دا تاماق ىستەسىن» دەپ وتىرادى. دەۆيدتىڭ اتا-اناسىمەن 5 ايداي بىرگە تۇردىق. بىراق بولاشاقتا بولەك تۇراسىڭدار, ءبىز سىزدەرمەن تۇرمايمىز دەپ ايتتى. جالپى بولەك تۇرعان جاقسى بولادى. ءوزىم ءۇشىن ەڭ ماڭىزدىسى انامنىڭ رۇقساتىن الۋ بولدى», – دەيدى مارجان ەرىك.

مارجان بىزگە شەتەلدىك جىگىتتەردىڭ قازاق جىگىتتەرىنەن ايىرماشىلىعىن دا ايتىپ بەردى.

“باسقا ەلدىڭ جىگىتتەرى ءۇي تىرلىگىن مىندەتسىنبەي ىستەيدى. پىكىرلەردى كورىپ وتىرعانىڭىزداي, ءبىزدىڭ جىگىتتەر اسۇيگە كىرسە, ەركەك دەگەن اتىنان ايىرىلادى ەكەن. سونىمەن قاتار ەڭ باستىسى كونفليكت بولعاندا ول ۇنەمى تاتۋلاسۋعا ءبىرىنشى كەلەدى. قاتە ءتۇسىنىپ قالماڭىز, قازاقتىڭ جىگىتتەرى جامان دەگەنىم ەمەس. بۇرىن قازاق جىگىتپەن ءۇش جىل كەزدەستىك, بىراق ءبىر كەلىسىمگە كەلە المادىق”, – دەدى ول.

مارجاننىڭ TikTok-تاعى ۆيدەولارىنا كوپ ادام پىكىر جازىپ جاتىر. ونىڭ 30-40%-ى حەيت جانە ول كوبىنە جىگىتتەردەن دەيدى ءوزى. دەگەنمەن مارجان ءوز قالاۋىمەن ءومىر ءسۇرۋدى جانە ادامداردىڭ سوزىمەن الىسپاۋدى ۇيرەنگەن ەكەن.

«كوبىنە قىزدار قولداپ, تىلەگىن ايتىپ, مەن ءۇشىن قۋانىپ جاتىر. مەنىڭ حەيتكە قارسى يممۋنيتەتىم بار. ءار ادامنىڭ اۋزىن جاۋىپ, قاقپاق بولا المايسىڭ. ونىڭ ۇستىنە ءار ادامنىڭ پىكىرى بولادى. ەڭ باستىسى ءوزارا تۇسىنىستىك بولسا, جەتكىلىكتى. جاقىندارىمنىڭ اراسىنان دا اناما بارىپ «قىزىڭ مۇسىلمان ەمەس پە, مۇسىلمان جىگىتپەن ءجۇرسىن, ۇيات» دەگەندەر دە بولدى. بىراق انام مەنى ءاردايىم قولدايدى. دەۆيدتى بالاسىنداي جاقسى كورەدى. انامدى گرۋزياعا شاقىرىپ, وعان كۇشتى دەمالىس ۇيىمداستىرۋدى دا دەۆيدتىڭ يدەياسىمەن جاسادىق», – دەيدى اتىراۋلىق قىز.

جاستار بيىل جىل سوڭىنا دەيىن گرۋزيادا بولىپ, كەلەسى جىلى انگلياعا قايتا كوشپەك. قالىڭدىقتىڭ ۆيزاسىن جاساتپاق. كەيىن ىڭعايى كەلگەندە انامدى دا كوشىرىپ الامىن دەيدى اتىراۋلىق قىز.

“كەيىنگى 2 جىل ەكەۋىمىز استانادا, سوسىن انگليادا (ستاففورد) تۇردىق. قازىر گرۋزيادا تۇرىپ جاتىرمىز. ويتكەنى وسى ەلدەگى حالىقارالىق كومپانيا جۇمىس ۇسىندى. 3 تىلدە, قازاقشا, اعىلشىنشا, ورىسشا كونتەنت مودەراتورمىن”, – دەيدى مارجان.

مارجان اعىلشىن ءتىلىن ۇيرەنىپ, شەتەلدە جۇمىس ىستەگەن ادام رەتىندە ءوزى قاتارلى جاستارعا اقىل-كەڭەسىن دە ايتتى.

“جاستارعا, ءىنى-cىڭلىلەرىمە اعىلشىن ءتىلىن وقىڭىزدار دەپ ايتار ەدىم. ەشقاشان كەش ەمەس, ويتكەنى ءوزىم ۋنيۆەر كەزىنەن باستاپ وقىدىم. اعىلشىن بىلسەڭىز, مۇمكىندىكتەر كوپ بولادى. شەتەلگە جىبەرە الاتىن كومپانيالارعا كىرىڭىزدەر, اسىرەسە ساتۋ مەنەدجەرى بولىپ. سوندا كومپانيا ءسىزدى باسقا ەلدەرگە جىبەرەدى. ەشقاشان ءوزىڭىزدى كورسەتۋگە قورىقپاڭىز. اعىلشىنشا سويلەسۋگە تاجىريبە كەرەك بولسا, تاندەم دەگەن قولدانبانى جۇكتەپ, سول ارقىلى شەتەلدىكتەرمەن سويلەسە الاسىزدار. مەن دەۆيدتى سولاي كەزدەستىردىم”, – دەدى مارجان.