«Úı tirligin mindetsinbeı isteıdi»: Aǵylshyn jigitke turmysqa shyqqan qazaq qyz qarym-qatynastaǵy erekshelikterin aıtyp berdi

Foto: ashyq derekkóz

Atyraýlyq Marjan Erik TikTok-taǵy vıdeolarymen eldiń qyzyǵýshylyǵyn týdyrdy. Ol jelide aǵylshyn jigitiniń qalaı tamaq istep berip júrgenin kórsetken. Vıdeoǵa sıpattama retinde ol “Tamaq isteı almaısyń, seni kim alady dep edińizder, mine ol maǵan kúnde tamaq istep beredi” dep jazǵan. Stan.kz aqparat agenttigi Marjannan Anglııadaǵy ómiri jáne aǵylshyn joldasy týraly surap, bildi.

Marjan joǵary oqý ornyn bitirgen soń, aǵylshyn tilin úırenip, shetelge shyǵýǵa talpynǵan. Aǵylshynsha sóıleýden tájirıbe bolsyn dep, Tandem qoldanbasy arqyly sheteldiktermen tanysyp, tájirıbe almasyp júrgen. Joldasy Devıdpen de solaı tanysypty. Eki jyl boıy aǵylshynsha sóılesip, onlaın dos bolǵan.

«Ol maǵan «sen maǵan jazǵan eń birinshi qazaq qyzysyń» dedi. Bir joly meni jumystan Anglııadaǵy jazǵy kanıkýlǵa Qazaqstannan stýdentter men oqýshylardy alyp barýǵa jiberdi. Sol toptyń lıderi bolyp meni taǵaıyndady. 8-16 jasar balalarǵa 1 aı qarap júrdim. Balalarmen jumys isteý ońaı emes eken. Degenmen ózim úshin óte qyzyq tájirıbe boldy. О́zim Anglııaǵa birinshi ret bardym jáne Devıdpen birinshi ret sol kezde kezdestik», –  deıdi Marjan Erik.

Anglııadan qaıtyp ketken soń Marjannyń eńbek demalysy bastalǵan. Sol kezde Devıd bılet alyp berip, «kel, Anglııany Shotlandııany kórsetemin» dep shaqyrypty. Birden ata-anasymen de tanystyrǵan.

«Meni birden ata-anasymen tanystyrdy. Olarǵa qyzym musylman, Qazaqstannan dep aıtqan. Anasy olaı bolsa, shoshqanyń etin jemeıtin shyǵar dep, maǵan taýyq etinen dástúrli tamaq daıyndap berdi. Al men jaqtan anam, týystarym basynda qýanbady. «Kim ol, qazaq emes, musylman emes. Basqa jerdiń adamy. Erteń alyp ketip, sońynda tastap ketedi» degen sııaqty pikirler boldy. Biraq ol ata-anamnyń aldynan ótti, meniń nıetim shynaıy dep bildirdi. Eń bastysy meni anam qoldady. “Sen baqytty bolsań, men baqyttymyn” dedi. Ol Devıdti qatty jaqsy kórip ketti. Keıin jaqyndarymnyń da oıy ózgerdi. О́ıtkeni Devıd Aqtaýda, anamnyń apasynyń úıinde úsh kún jatty. Odan keıin Atyraýǵa úsh kún toqtadyq. Qulsaryǵa aparyp, ózim ósken jerdi kórsettim. Onda eki kún boldyq. Osy aralyqta jaqyndarymnyń úıine kirip, batalaryn aldyq. Keıin jigitimdi eń jaqyn qurbymnyń toıyna apardym. Tamada ony 2-3 ret oıynǵa, baıqaýlarǵa shaqyrdy, toıdy biraz kóterdi. Oǵan toı unady jáne múldem basqasha áser syılady. Sońynda bári as qaıyrǵanda ol da qaıyrdy. Osylaı qurmetin bildirdi”, – deıdi Marjan.

Marjan Devıdti eń birinshi anasy jáne jeńgesimen tanystyrǵan. Sol sátte túsirilgen vıdeo TikTok-ta erekshe tanylyp ketti.

“Kezdesýge naǵashy jeńgem qatysqan. Ol Devıdke «Qansha aqshań bar, neshe bala bolǵanyn qalaısyń” dep, neshe túrli suraq qoıdy. Sońynda Devıd «jeńgeń qaýipsizdik komıtetiniń qyzmetkeri sııaqty» dedi. Devıd bolsa, óziniń nıetin bildirip, «qyzyńyzben birge turǵym keledi» dep aldynan ótti. Al meniń anam men aǵam namaz oqıdy. Jigitim musylman bolmaǵan soń aǵam qarsy boldy, biraq anam qoldady. Jigitim meniń senimimdi qurmetteıdi. Eger namaz oqımyn deseń, men de Islam týraly kóbirek bilip, izdenemin degen. Buıyrsa, qudalyq pen toı kelesi jyly bolady», – deıdi arý.

istegendi de jaqsy kóredi eken. Al Marjan ydys jýamyn deıdi.

«Biz basynan kelisip aldyq. Men jigitime «men tamaq istesem, tek qalaǵan ýaqytymda isteımin. Basqa kezde surap, “nege jasamaısyń dep qyspaqqa alma» dedim. Úıdi jınap, ydys jýyp, taza ustaımyn dep aıtyp qoıdym. Al anam bolsa Devıdke jaqtasady. Habarlasyp, «kúıeýbala, Marjan da tamaq istesin» dep otyrady. Devıdtiń ata-anasymen 5 aıdaı birge turdyq. Biraq bolashaqta bólek turasyńdar, biz sizdermen turmaımyz dep aıtty. Jalpy bólek turǵan jaqsy bolady. О́zim úshin eń mańyzdysy anamnyń ruqsatyn alý boldy», – deıdi Marjan Erik.

Marjan bizge sheteldik jigitterdiń qazaq jigitterinen aıyrmashylyǵyn da aıtyp berdi.

“Basqa eldiń jigitteri úı tirligin mindetsinbeı isteıdi. Pikirlerdi kórip otyrǵanyńyzdaı, bizdiń jigitter asúıge kirse, erkek degen atynan aıyrylady eken. Sonymen qatar eń bastysy konflıkt bolǵanda ol únemi tatýlasýǵa birinshi keledi. Qate túsinip qalmańyz, qazaqtyń jigitteri jaman degenim emes. Buryn qazaq jigitpen úsh jyl kezdestik, biraq bir kelisimge kele almadyq”, – dedi ol.

Marjannyń TikTok-taǵy vıdeolaryna kóp adam pikir jazyp jatyr. Onyń 30-40%-y heıt jáne ol kóbine jigitterden deıdi ózi. Degenmen Marjan óz qalaýymen ómir súrýdi jáne adamdardyń sózimen alyspaýdy úırengen eken.

«Kóbine qyzdar qoldap, tilegin aıtyp, men úshin qýanyp jatyr. Meniń heıtke qarsy ımmýnıtetim bar. Ár adamnyń aýzyn jaýyp, qaqpaq bola almaısyń. Onyń ústine ár adamnyń pikiri bolady. Eń bastysy ózara túsinistik bolsa, jetkilikti. Jaqyndarymnyń arasynan da anama baryp «qyzyń musylman emes pe, musylman jigitpen júrsin, uıat» degender de boldy. Biraq anam meni árdaıym qoldaıdy. Devıdti balasyndaı jaqsy kóredi. Anamdy Grýzııaǵa shaqyryp, oǵan kúshti demalys uıymdastyrýdy da Devıdtiń ıdeıasymen jasadyq», – deıdi atyraýlyq qyz.

Jastar bıyl jyl sońyna deıin Grýzııada bolyp, kelesi jyly Anglııaǵa qaıta kóshpek. Qalyńdyqtyń vızasyn jasatpaq. Keıin yńǵaıy kelgende anamdy da kóshirip alamyn deıdi atyraýlyq qyz.

“Keıingi 2 jyl ekeýimiz Astanada, sosyn Anglııada (Stafford) turdyq. Qazir Grýzııada turyp jatyrmyz. О́ıtkeni osy eldegi halyqaralyq kompanııa jumys usyndy. 3 tilde, qazaqsha, aǵylshynsha, oryssha kontent moderatormyn”, – deıdi Marjan.

Marjan aǵylshyn tilin úırenip, shetelde jumys istegen adam retinde ózi qatarly jastarǵa aqyl-keńesin de aıtty.

“Jastarǵa, ini-cińlilerime aǵylshyn tilin oqyńyzdar dep aıtar edim. Eshqashan kesh emes, óıtkeni ózim ýnıver kezinen bastap oqydym. Aǵylshyn bilseńiz, múmkindikter kóp bolady. Shetelge jibere alatyn kompanııalarǵa kirińizder, ásirese satý menedjeri bolyp. Sonda kompanııa sizdi basqa elderge jiberedi. Eshqashan ózińizdi kórsetýge qoryqpańyz. Aǵylshynsha sóılesýge tájirıbe kerek bolsa, Tandem degen qoldanbany júktep, sol arqyly sheteldiktermen sóılese alasyzdar. Men Devıdti solaı kezdestirdim”, – dedi Marjan.