جاڭالىقتار
ء«ۇيدىڭ استىنان سۋ شىعىپ جاتىر»: استانادا جۇزدەگەن تۇرعىنى بار كوپ قاباتتى ءۇي اپاتتى جاعدايدا تۇر
ۆيدەودان سكرينشوت
استانادا جۇزدەگەن تۇرعىنى بار كوپ قاباتتى ءۇي اپاتتى جاعدايدا. تۇرعىندار سۋدىڭ استىندا قالامىز با دەپ قورقادى, دەپ جازادى qandastar.kz
ايتۋلارىنشا, اپاتقا قۇرىلىس كەزىندەگى كەمشىلىكتەر سەبەپ بولۋى مۇمكىن. جاڭادان سالىنىپ جاتقان نىساندار دا جاعدايدى ودان سايىن ۋشىقتىرىپ جىبەرگەن. ويتكەنى تابيعي كولدى كومىپ, ورنىنا قۇرىلىس جۇرگىزىلگەلى بەرى ۇيلەرىنىڭ استىنان سۋ شىعىپ, قابىرعالارى جارىلعان. سوندىقتان ولار قۇرىلىس جۇمىستارىن توقتاتۋدى تالاپ ەتەدى. بۇل تۋرالى Stan.kz اقپارات اگەنتتىگى 31-ارنانىڭ ينفورمبيۋرو جاڭالىقتار باعدارلاماسىنا سىلتەمە جاساپ حابارلايدى.
استانادا ءۇيدىڭ ماڭى قوقىس الاڭىنا اينالعان. كارىز سۋى داتوگىلەدى. سالدارىنان جاعىمسىز ءيىس قاتتى شىعادى. ايتۋلارىنشا, قازىر كوپ قاباتتى تۇرعىن جايدىڭ تۇراعى مەن جەدەلساتى شاحتالارى, تەحنيكالىق بولمەلەر سۋعا تولعان. ەكى كۇننىڭ بىرىندە توقتارى ىستەن شىعادى.
“مىنا جان-جاقتان قوقىستى اكەلىپ توگۋدى قويۋ كەرەك. اسسەنيزاتور تۋرالى ايتپاي-اق قويايىن. تۇرعىندارعا قانشالىقتى قاۋىپ ءتونىپ تۇر. ليفت جاق سۋعا باتىپ جاتىر. ماڭايدى سۋ الىپ كەتتى”, – دەدى استانا تۇرعىنى گۇلزات قاپباسوۆا.
“سۋ قايدا كەتەتىنىن بىلمەيدى. ءبىزدىڭ استىمىزعا كەلىپ جاتىر. ول سۋ ىعىسىپ, ءبىز جاققا كەلىپ جاتىر”, – دەدى استانالىق سەيىتبەك ۇلان.
ال اكىمدىك وكىلدەرى الاڭداۋعا نەگىز جوق دەيدى. ايتۋلارىنشا, ءبارى باقىلاۋدا. ويتكەنى قازانشۇڭقىردى تولتىرۋ جۇمىستارى ۋاقىتشا توقتاتىلعان. ءارى جەراستى سۋلارىن سورىلىپ, دەڭگەيى 70 سانتيمەترگە تومەندەتىلىپتى.
“جۇمىس باستالعان كەزدە جەراستى سۋلارى كوتەرىلىپ, سارىتاۋ 16 ءۇيىنىڭ ليفت شاحتالارىن سۋ باسقان. بۇل جاعداي تۋرالى اكىمدىككە دەرەۋ حابار بەرىلدى, ولار بىردەن وقيعا ورنىنا كەلىپ, موتوپومپالاردى قويىپ, سۋدى شىعاردى. الايدا درەناجدى سورعىش ىستەمەي قالعانى انىقتالدى. ءبىز پاتەر يەلەرى بىرلەستىگى توراعاسىنا جاڭا سۋ سورعىش ساتىپ الىپ, ورناتۋدى ۇسىندىق”, – دەدى الماتى اۋدانىنىڭ باس ينسپەكتورى قوناقباي ەسپاەۆ.
ينسپەكتور ءۇيدىڭ جەدەلساتى شاحتالارى مەن اۆتوتۇراعى ۇنەمى تەكسەرىلىپ تۇراتىنىن ايتتى. سوندىقتان تۇرعىن جايعا تونگەن قاۋىپ جوق دەپ سەندىرىپ وتىر. ال قازانشۇڭقىردى توپىراقپەن تولتىرۋ بالالاردىڭ قاۋىپسىزدىگى ءۇشىن قولعا الىنعان ەكەن.
