Jańalyqtar
«Úıdiń astynan sý shyǵyp jatyr»: Astanada júzdegen turǵyny bar kóp qabatty úı apatty jaǵdaıda tur
Vıdeodan skrınshot
Astanada júzdegen turǵyny bar kóp qabatty úı apatty jaǵdaıda. Turǵyndar sýdyń astynda qalamyz ba dep qorqady, dep jazady qandastar.kz
Aıtýlarynsha, apatqa qurylys kezindegi kemshilikter sebep bolýy múmkin. Jańadan salynyp jatqan nysandar da jaǵdaıdy odan saıyn ýshyqtyryp jibergen. О́ıtkeni tabıǵı kóldi kómip, ornyna qurylys júrgizilgeli beri úıleriniń astynan sý shyǵyp, qabyrǵalary jarylǵan. Sondyqtan olar qurylys jumystaryn toqtatýdy talap etedi. Bul týraly Stan.kz aqparat agenttigi 31-arnanyń Informbıýro jańalyqtar baǵdarlamasyna silteme jasap habarlaıdy.
Astanada úıdiń mańy qoqys alańyna aınalǵan. Káriz sýy datógiledi. Saldarynan jaǵymsyz ıis qatty shyǵady. Aıtýlarynsha, qazir kóp qabatty turǵyn jaıdyń turaǵy men jedelsaty shahtalary, tehnıkalyq bólmeler sýǵa tolǵan. Eki kúnniń birinde toqtary isten shyǵady.
“Myna jan-jaqtan qoqysty ákelip tógýdi qoıý kerek. Assenızator týraly aıtpaı-aq qoıaıyn. Turǵyndarǵa qanshalyqty qaýip tónip tur. Lıft jaq sýǵa batyp jatyr. Mańaıdy sý alyp ketti”, – dedi Astana turǵyny Gúlzat Qapbasova.
“Sý qaıda ketetinin bilmeıdi. Bizdiń astymyzǵa kelip jatyr. Ol sý yǵysyp, biz jaqqa kelip jatyr”, – dedi astanalyq Seıitbek Ulan.
Al ákimdik ókilderi alańdaýǵa negiz joq deıdi. Aıtýlarynsha, bári baqylaýda. О́ıtkeni qazanshuńqyrdy toltyrý jumystary ýaqytsha toqtatylǵan. Ári jerasty sýlaryn sorylyp, deńgeıi 70 santımetrge tómendetilipti.
“Jumys bastalǵan kezde jerasty sýlary kóterilip, Sarytaý 16 úıiniń lıft shahtalaryn sý basqan. Bul jaǵdaı týraly ákimdikke dereý habar berildi, olar birden oqıǵa ornyna kelip, motopompalardy qoıyp, sýdy shyǵardy. Alaıda drenajdy sorǵysh istemeı qalǵany anyqtaldy. Biz páter ıeleri birlestigi tóraǵasyna jańa sý sorǵysh satyp alyp, ornatýdy usyndyq”, – dedi Almaty aýdanynyń bas ınspektory Qonaqbaı Espaev.
Inspektor úıdiń jedelsaty shahtalary men avtoturaǵy únemi tekserilip turatynyn aıtty. Sondyqtan turǵyn jaıǵa tóngen qaýip joq dep sendirip otyr. Al qazanshuńqyrdy topyraqpen toltyrý balalardyń qaýipsizdigi úshin qolǵa alynǵan eken.
