«Úıge bireýler nómiri joq kólikpen kelgen»: Sherzattyń týystary úıdiń órtenýin kúdiktiler jaqtan kóredi

Foto: Ulysmedia kollajy

Talǵar qalasy mańyndaǵy Azat aýylynda órtke oranǵan marqum Sherzat Bolattyń úıine bardy. Oqıǵa ornynda ne bolyp jatqanyn kózben kórip, Qarjaýbaı Nurymovtyń qaryndasy Perızatpen tildesti.

ÚIDE EShKIM BOLMAǴAN

Marqumnyń týǵan-týystarynyń aıtýynsha, órt shamamen túngi 00.30 ýaqytynda bolǵan. Úıde eshkim bolmaǵan. Sebebi Sherzat ata-ájesiniń qolynda óskendikten, bul jaǵdaı egde kisilerge qatty aýyr tıgendikten, marqumnyń týǵan-týystary qara shańyraqta bolǵan. Úıdegi mal aman, tek ıtti kúıik shalǵan.

Ulysmedia.kz portalyna oqıǵa jaıly Qarjaýbaı Nurymovtyń qaryndasy aıtyp berdi. “Qarjaýbaıdyń ózi birdeńe deıtindeı jaǵdaıda emes” deıdi ol. Ulynyń qazasyna qabyrǵasy sógilip otyrǵan ákege bul oqıǵa ekinshi soqqy bolyp, eseńgirep qalǵan. Marqumnyń týǵan-týystary órtti kúdiktiler jaqtan kelgen áreketpen baılanystyrady. Ony Perızet aıtyp berdi. “Úıdiń órtenýin aldyńǵy bolǵan jaǵdaılarmen baılanystyryp otyrsyz ba?” degen suraqqa “árıne, baılanystyramyz” deıdi.

NО́MIRI JOQ KО́LIKTER

– Sońǵy úsh kúnde Sherzattyń synyptastary “kóshelerińizde nómiri joq kólikter júr” dedi. О́rt bolmaı bir kún buryn kórshiler “sizdiń úılerińizge nómiri joq kólikpen kelgender kirip shyqty, biz shýlap, bárimiz jaryqty jaqtyq, aıǵaılap edik, toqtamastan qashyp ketti” dep habar berdi. Mektep balalarynyń bári de bir aýyldan bolǵan soń kimniń qandaı kólikti aıdaıtynyn bilemiz dep otyr. Balalar “ishindegi adamdar da beıtanys, amandasaıyq dep qasyna baryp edik, terezeni jaýyp alyp, toqtamaı ótip ketti” dedi. Sońǵy úsh kúnde “kólikter júr” degendi estidik. IIM-ge baryp, kelgennen beri osylaı bolyp jatyr, – deıdi ol.

Perızat Nurymova resmı organdar óz jumysyn durys atqarmady dep esepteıtinin jetkizdi.

– Qarastyryp jatyr. Sonyń “arqasy”. IIM-niń, Talǵar, oblys ákimdiginiń “qarastyryp, kúshti jumys atqaryp jatqandarynyń arqasy”. Úıden aıyrylyp qaldyq. Úıdi qoıshy, janymyz aman. Buǵan deıin kúzet qoıylǵan joq. Úıge qoımaı-aq qoısyn, joq degende aýyldyń basyna qoıyp bersin. Kimniń kirip shyǵyp jatqanyn bilsin. Qarapaıym halyq bolyp, joldan ótken kólikti toqtatyp, “kimsiń” dep suraı bersek, esi durys emes dep oılaıdy ǵoı. Ustalǵan adamdardyń, sol jaqtan shyqqan adamdardyń bárine kólik qoıyp berip qoıypty. Aýylǵa kire beriste kólik qoıypty. Sonda biz janymyz shyǵyp otyrǵanda bireýdiń janyn alýǵa shamamyz jete me? Mamamyzdyń ózi bir qulap, bir esin jıyp otyr. Zań ókilderine oılanýǵa bolady ǵoı. Búgin topyrlap bári júr. Júrgennen ne paıda? Bári bitken soń! Qalǵanymyzdyń janymyzdy alyp ketkenin kútemiz be? Sóıtip, bir tóbe bolyp, úıip qoıaıyn degen shyǵar? Zań ókilderi jumys istese bulaı bolmaıdy! Bizdiń prezıdent Qasym-Jomart Kemeluly zań ókilderi qalaı jumys isteıtinin kórsin! Sol kisiniń qol astynda basshy bolyp, jumysshylarynyń is-áreketi osy! – deıdi ol.

Qaıǵyly oqıǵadan keıin Sherzattyń ákesi aýyldyń mańyna kúzet qoıýdy, aýylǵa kim kelip, kim ketip jatqanyn baqylaýdy ótingen. Biraq polıııa qyzmetkerleri ony eskermegen.

– Jylap-syqtap boldyq. Endi qoıa salmaımyz. Aqyryna deıin baramyz, – deıdi Perızat.

TALǴARDAǴY QANDY OQIǴA

Eske sala keteıik, Almaty oblysynda jas jigitterdiń tóbelesi 16 jastaǵy jasóspirimniń ólimimen aıaqtalǵan. Marqum dúkende saýda jasap turǵan ákesimen eregesken klıentpen tóbelesken. Buryn taraǵan aqparattarǵa qaraǵanda, klıent dúkennen syra alyp, aqshasyn tólemeı ketpek bolǵan. Tóbeles sol úshin týyndaǵan. Syrany tegin alyp ketpek bolǵan jigit jaqtastaryn shaqyryp, ákesi men balasyn, týys aǵasyn soqqyǵa jyqqan. Bir top jigit jasóspirimdi tepkilep jatqanyn mańaıdaǵy turǵyndar vıdeoǵa túsirip alǵan. 10-shy synypta oqıtyn Sherzat Bolat ata-anasynyń dúkenine kezdeısoq kelgen. Sýyq qarýmen kelgen buzaqylar eshkimdi aıamapty.

Prokýratýra Talǵardaǵy jasóspirimniń ólimine qatysty málimdeme jasap, «ádil tergeýge kepildik beremiz» dep aqparat taratqan. Alaıda tergeýshilerge senbegen marqumnyń týǵan-týystary kóshege shyǵyp, ádildikti talap etti. Olar sol túni bolǵan 13 adamnyń ornyna 7 adamnyń ǵana qamalǵanyna narazylyq bildirdi. Kóp ótpeı marqum Saltanat Núkenovanyń aǵasy, quqyqqorǵaýshy Aıtbek Amangeldi Talǵarda óltirilgen bozbalanyń otbasyna tegin advokat taýyp beretini habarlandy.

Buǵan deıin qaza tapqan jasóspirimniń ákesi beınebaqylaý kamerasynyń jazbasyn áldekimder óshirip tastaǵanyn aıtqan edi. Alaıda IIM ol málimetti joqqa shyǵardy. 9 qazanda depýtat Nartaı Aralbaıuly bas prokýror Berik Asylovqa, ishki ister mınıstri Erjan Sádenovke jáne oqý-aǵartý mınıstri Ǵanı Beısembaevqa depýtattyq saýal joldap, 16 jasar azamatty óltirgen, jaqyndaryn aıaýsyz sabaǵan qylmyskerler qamaýǵa alynyp, olarǵa zańǵa sáıkes ádil jaza berilýi tıis dep másele kóterdi. Al onyń áriptesi Abzal Quspan qylmystyq kodekstiń 201-babyn (sotqa deıingi tergep-tekserý derekterin jarııa etýge jol bermeý) ózgertý kerek dep esepteıdi. Bul qajettilik onyń sózinshe, Talǵardaǵy jasóspirimniń óliminen keıin aıqyn sezilgen.

Ulysmedia.kz kúdiktilerdiń biri taıaýda qylmystyq jaýapkershilikke tartylyp, jazasyn óteýi kerek bolǵanyn, ekinshi kúdikti jaýapkershilikten jaltaryp ketkenin anyqtaǵan edi.