ۇكىمەت 5 جاستاعى بالالاردىڭ شوتىنا اقشا اۋدارماق

فوتو: اشىق دەرەككوز

ءماجىلىس كەيبىر زاڭنامالىق اكتىلەرگە اقپارات, قوعامدىق دامۋ, مادەنيەت جانە ارحيۆ ىستەرى سالالارىنداعى نورمالاردىڭ ارتىق زاڭنامالىق رەگلامەنتتەلۋىن بولعىزباۋ ماسەلەلەرى بويىنشا زاڭ جوباسىن ءبىرىنشى وقىلىمدا ماقۇلدادى, دەپ حابارلايدى qandastar.kz  Skifnews.kz اقپارات پورتالىنا سىلتەمە جاساپ.

قۇجاتتا «كەلەشەك» بىرىڭعاي ەرىكتى جيناقتاۋ جۇيەسىنىڭ قىزمەتىن قۇقىقتىق رەتتەۋدى كوزدەيتىن نورمالار دا قاراستىرىلعان.

«كەلەشەكتىڭ» باعدارلاماسىنا قاتىساتىن ءاربىر اتا-اناعا بانكتەردە نەمەسە ءومىردى ساقتاندىرۋ كومپانياسىندا كەز كەلگەن جاستاعى بالاسىنىڭ اتىنا شوت اشۋعا قۇقىعى بەرىلەدى.

«5 جاسقا تولعان بالالاردىڭ شوتىنا مەملەكەت بيۋدجەتتەن 60 اەك, جەتىم بالالارعا 120 اەك مولشەرىندە بىرجولعى باستاپقى ءبىلىم بەرۋ كاپيتالىن بەرەدى. اتا-انالار ءۇشىن بالانىڭ شوتىنا جىل سايىنعى ەڭ تومەنگى جارنا تالاپتارى بار. ول الەۋمەتتىك جاعىنان وسال وتباسىلاردىڭ بالالارى ءۇشىن – 12 اەك جانە قالعاندارىنا – 24 اەك. جيناق بارلىق بالا ءۇشىن 5 پايىز, الەۋمەتتىك جاعىنان وسال وتباسىلاردىڭ بالالارى ءۇشىن 7 پايىز. سونداي-اق بانكتىڭ نەمەسە ساقتاندىرۋ كومپانياسىنىڭ بەلگىلەنگەن تابىس كولەمى ءۇشىن جىل سايىنعى مەملەكەتتىك سىيلىقاقى الادى», – دەلىنگەن ءماجىلىس ۇسىنعان مالىمەتتە.

ەڭ تومەنگى جىلدىق جارناعا قويىلاتىن تالاپتار بۇزىلعان جاعدايدا باستاپقى ءبىلىم بەرۋ كاپيتالى بيۋدجەتكە قايتارىلۋعا ءتيىس. جينالعان قاراجاتتى ەلدە نەمەسە شەتەلدە ءبىلىم الۋعا, تۇرعىن ءۇي جاعدايىن جاقسارتۋعا باعىتتاۋعا بولادى.