ۇكىمەت باسشىسى: 39 ميلليارد تەڭگەدەن استام قاراجاتتىڭ زاڭسىز جۇمسالعانى انىقتالدى

فوتو: اشىق دەرەككوز

پرەزيدەنتكە مەملەكەتتىك اۋديت جۇيەسىن رەفورمالاۋ جونىندەگى ۇسىنىستار توپتاماسى تانىستىرىلدى.

مەملەكەت باسشىسى قاسىم-جومارت توقاەۆ جوعارى اۋديتورلىق پالاتا توراعاسى ءاليحان سمايىلوۆتى قابىلدادى, دەپ حابارلادى qandastar.kz informburo-عا سىلتەمە جاساپ.

قاسىم-جومارت توقاەۆقا جوعارى اۋديتورلىق پالاتانىڭ بيىلعى II توقسانداعى جۇمىسىنىڭ قورىتىندىلارى تانىستىرىلدى.
اتاپ ايتقاندا, تەمىرجولعا باسا نازار اۋدارا وتىرىپ, كولىك سالاسىنا, سونىمەن قاتار اباي, جەتىسۋ, ۇلىتاۋ, الماتى وبلىستارىنىڭ بيۋدجەتتەرىنە جانە قازاقستاندىقتاردى ءدارى-دارمەكپەن قامتاماسىز ەتۋ جۇيەسىنە اۋديت جۇرگىزىلگەن.
جالپى سوماسى 2,9 تريلليون تەڭگەدەن استام قارجىنى قۇرايتىن 73 نىسان تەكسەرىلگەن. ناتيجەسىندە 39 ميلليارد تەڭگەدەن استام قاراجاتتىڭ زاڭسىز جۇمسالعانى انىقتالعان.

ء«اليحان سمايىلوۆتىڭ ايتۋىنشا, كەمشىلىكتەردى جويۋ ءۇشىن كولىك سالاسىن دامىتۋ, بيۋدجەتتىك-ينۆەستيتسيالىق جوبالاردى ىسكە اسىرۋ, وتاندىق فارماتسەۆتيكا ونىمدەرىن وندىرۋشىلەردى مەملەكەت تاراپىنان قولداۋ تەتىگىن قايتا قاراۋ جونىندە ۇسىنىستار ازىرلەندى», – دەپ جازىلعان حابارلامادا.

پرەزيدەنتكە مەملەكەتتىك اۋديت جۇيەسىن رەفورمالاۋ جونىندەگى ۇسىنىستار توپتاماسى تانىستىرىلدى.

بۇدان بولەك, مەملەكەت باسشىسىنا بيىل ەكىنشى جارتىجىلدىقتا جۇرگىزىلەتىن اۋديتورلىق ءىس-شارالار تۋرالى باياندالدى.
تەكسەرۋ جۇمىستارى نازارباەۆ ۋنيۆەرسيتەتى جانە «قازمۇنايگاز» ۇك» اق قىزمەتىن, سوت جۇيەسىن, سونىمەن بىرگە اۋىل شارۋاشىلىعىنداعى, وڭدەۋ ونەركاسىبىندەگى جانە قۇرىلىستاعى جەكەلەگەن باعىتتاردى قامتيدى.
قاسىم-جومارت توقاەۆ بيۋدجەت قاراجاتى مەن مەملەكەت اكتيۆتەرىنىڭ پايدالانىلۋىن مۇلتىكسىز باقىلاۋدى قامتاماسىز ەتۋدى تاپسىردى.
سونىمەن قاتار جالپى مەملەكەتتىك اۋديت جۇيەسىنىڭ تيىمدىلىگىن ودان ءارى ارتتىرۋعا ەرەكشە ءمان بەرۋ كەرەك ەكەنىن ايتتى.