جاڭالىقتار
ۇكىمەت كاسپي تەڭىزىن زەرتتەۋ ينستيتۋتىنا 305 ملن تەڭگە ءبولدى
istockphoto.com
كاسپي تەڭىزى عىلىمي-زەرتتەۋ ينستيتۋتىن ودان ءارى دامىتۋعا ۇكىمەت رەزەرۆىنەن قاراجات ءبولىندى, دەپ حابارلايدى qandastar.kz
مەملەكەت باسشىسىنىڭ كاسپي تەڭىزى پروبلەمالارىن كەشەندى زەرتتەۋ جونىندەگى تاپسىرمالارىن جۇزەگە اسىرۋ شەڭبەرىندە «قازاق كاسپي تەڭىزى عىلىمي-زەرتتەۋ ينستيتۋتى» كەاق-قا ۇكىمەت رەزەرۆىنەن 305 ملن تەڭگە ءبولىندى. پرەمەر-مينيستر ولجاس بەكتەنوۆ ءتيىستى قاۋلىعا قول قويدى.
ينستيتۋت مەملەكەت باسشىسى قاسىم-جومارت توقاەۆتىڭ تاپسىرماسىمەن كاسپي تەڭىزىنىڭ ەكولوگيالىق ماسەلەلەرىن زەرتتەۋ ماقساتىندا قۇرىلدى. اتاپ ايتقاندا, عزي-ءدىڭ قىزمەت اياسىنا بالىق قورىنىڭ كولەمىن باعالاۋ, ولاردى ساقتاۋ ادىستەرى مەن تەحنولوگيالارىن ازىرلەۋ, يحتيوفاۋنانى زەرتتەۋ, يتبالىقتاردىڭ جاپپاي قىرىلۋ سەبەپتەرىن انىقتاۋ جانە ولاردىڭ پوپۋلياتسياسىن ساقتاۋ ماسەلەلەرى كىرەدى.
بۇدان بولەك, تەڭىزدىڭ گيدرولوگيالىق ۇدەرىستەرىن زەرتتەۋگە جانە ونىڭ دەڭگەيىن باقىلاۋعا, كليماتتىڭ وزگەرۋىن جانە ونىڭ ەكوجۇيەگە اسەرىن تالداۋعا, سۋدىڭ ساپاسى, بيولوگيالىق الۋانتۇرلىلىك جانە كاسپي تەڭىزىنىڭ قازاقستاندىق بولىگى مەن جاعالاۋىنىڭ وزگە دە پارامەترلەرى جونىندەگى دەرەكتەردى جيناۋ مەن تالداۋعا باعىتتالعان.
ۇكىمەت رەزەرۆىنەن بولىنگەن قاراجات ينستيتۋتتى ودان ءارى دامىتۋعا باعىتتالىپ, گيدروبيولوگيا جانە گيدروحيميا, گيدرومەتەورولوگيا, سپۋتنيكتىك مونيتورينگ زەرتحانالارىندا عىلىمي-زەرتتەۋ جۇمىستارىن ۋاقتىلى ءارى ءتيىمدى جۇرگىزۋگە, سونداي-اق ينستيتۋتقا جۇكتەلگەن وزگە دە مىندەتتەردى ورىنداۋعا مۇمكىندىك بەرەدى.
