«ۇكىمەت قوجاناسىردىڭ نۇسقاسىن جاسادى» — دەپۋتات جاڭبىرشين

فوتو: ۆيدەودان كادر

ءماجىلىس دەپۋتاتى ەدىل جاڭبىرشين ەكولوگيا مينيسترلىگىنىڭ وكىلىنە ەلدى مەكەندەردى ەرەكشە قورعالاتىن تابيعي اۋماققا اۋىستىرۋ تۋرالى ساۋال قويدى,— دەپ حابارلايدى  qandastar.kz Dalanews.kz-كە cىلتەمە جاساپ.

ونىڭ سوزىنشە, بۇل ماسەلە ۇكىمەتكە دەيىن جەتكەن, الايدا ۇكىمەت ناقتى شەشىم ۇسىنباعان.

«مەنىڭ قويايىن دەپ وتىرعان سۇراعىم زاڭ جوباسىندا ەڭ پىكىرتالاس تۋعىزعان ماسەلەگە بايلانىستى. زاڭ جوباسىنا ەلدى مەكەندەردى, ينفراقۇرىلىمدى, الەۋمەتتىك نىسانداردى ەرەكشە قورعالاتىن تابيعي اۋماقتان باسقا جەردىڭ ساناتىنا اۋىستىرۋ جونىندە نورما كىرگەن بولاتىن. بۇل نىسانداردىڭ ءبارى ەرەكشە قورعالاتىن تابيعي اۋماق جاساقتالماي تۇرىپ, كەڭەيتىلمەي تۇرىپ بار دۇنيەلەر ەدى. ەندى دەپۋتاتتار تاراپىنان ەكى نورما ۇسىنىلدى. ءبىرىنشى — ەشقايسىن دا ەرەكشە قورعالاتىن تابيعي اۋماقتاردان شىعارماۋ, ەكىنشىسى — ەلدى مەكەندەردى عانا قالدىرىپ, قالعاندارىن شىعارىپ, ولاردىڭ جوندەۋ جاساۋىنا مۇمكىندىك بەرۋ. وسى ماسەلە داۋ تۋعىزعاننان كەيىن ۇكىمەتكە جىبەردىك. ۇكىمەت قوجاناسىردىڭ نۇسقاسىن جاسادى. قوجاناسىرعا ەكى ادام وزدەرىنىڭ داۋىن شەشىپ بەر دەپ بارادى عوي. سوندا قوجەكەڭ «سەنىكى دە دۇرىس, ونىكى دە دۇرىس, ونى ايتىپ تۇرعان مەنىكى دە دۇرىس» دەيدى. جۇمىس توبىندا دەپۋتاتتاردىڭ وزدەرى ءبىر ۆاريانتىن داۋىسقا سالىپ, قابىلدادى. ەلدى مەكەندەر ەرەكشە قورعالاتىن تابيعي اۋماقتان شىقپايدى. قالعاندارىن باسقا ساناتقا اۋدارۋعا بولادى دەيدى. ەكولوگيا جانە تابيعي رەسۋرستار مينيسترلىگىنە سۇراعىم, سىزدەردىڭ پوزيتسيالارىڭىز قانداي?» — دەپ سۇرادى دەپۋتات.

مينيسترلىك وكىلى دەپۋتاتتىڭ ساۋالىنا جاۋاپ بەرگەن سوڭ ءماجىلىس توراعاسى ەرلان قوشانوۆ تا سوزگە ارالاستى.

«قايسىڭىزدىكى دۇرىس ەكەنىن بىلمەيمىن. قاناعاتتاندىڭىز با?» — دەپ كۇلدى.

دەپۋتات تا قايتا ءسوز الدى.

ء«بىر پوزيتسيا بولۋى كەرەك. ەكىنشى پوزيتسيانى قولدادىق دەپ وتىر. سوندىقتان قوجاناسىردىڭ ۆاريانتى وتپەي قالدى», — دەپ جاۋاپ بەردى دەپۋتات.