ۇكىمەت قۇن سالىعىنىڭ ءۇش ءتۇرىن ۇسىنىپ وتىر

قازاقستان ۇكىمەتى قوسىمشا قۇن سالىعىنىڭ سارالانعان مولشەرلەمەسىن ۇسىنىپ وتىر. اۋىل شارۋاشىلىعى ءونىمىن وندىرۋشىلەر بۇل سالىقتان مۇلدە بوساتىلادى. بۇل تۋرالى بۇگىن ۆيتسە-پرەمەر – ۇلتتىق ەكونوميكا ءمينيسترى سەرىك جۇمانعارين مالىمدەدى, دەپ حابارلايدى qandastar.kz 

ونىڭ ايتۋىنشا, ققس – بيۋدجەتتى تولىقتىرۋدىڭ نەگىزگى كوزدەرىنىڭ ءبىرى. مەملەكەتتىك بيۋدجەتتىڭ 25 پايىزىن قۇرايدى.

«16% بازالىق مولشەرلەمە ۇسىنىلادى. ققس مولشەرلەمەسىن ارتتىرۋ جانە سارالاۋ بيۋدجەتتىڭ قۇبىلمالى مۇناي كىرىستەرىنە تاۋەلدىلىگىن ازايتۋعا, ۇلتتىق قوردىڭ جيناق فۋنكتسياسىن كۇشەيتۋگە جانە باسىم مەملەكەتتىك جوبالاردى قارجىلاندىرۋعا مۇمكىندىك بەرەدى. بۇل رەتتە ءبىز اۋىل شارۋاشىلىعى ونىمدەرىن وندىرۋشىلەردى ءۇشىن قوسىمشا قۇن سالىعىنان بوساتۋدى ۇسىنامىز. قازىر شارۋا قوجالىقتارى ققس تولەمەيدى. ءبىز وسىنى ساقتاپ قالامىز», — دەدى جۇمانعارين ۇكىمەت وتىرىسىندا.

قازىر اۋىل شارۋاشىلىعى تاۋارىن ءوندىرۋشى زاڭدى تۇلعالار بيۋدجەتكە تولەنۋگە ءتيىس ققس-ءتىڭ 30% تولەيدى. جۇمانعارين ولار ەندى بۇل تولەمنەن بوساتىلاتىنىن اتاپ ءوتتى.

«وسىلايشا, قازاقستاندا وندىرىلگەن بارلىق ءونىم (كارتوپ, قىزاناق, پياز, قىرىققابات جانە ت.ب.) باسەكەگە نەعۇرلىم قابىلەتتى بولادى», — دەدى ول.

ۇكىمەت ۇسىنىپ وتىرعان ەكىنشى ستاۆكا – 10% مولشەرلەمە.

«ءبىز دەنساۋلىق ساقتاۋ سالاسى ءۇشىن تومەندەتىلگەن مولشەرلەمەنى ۇسىنامىز. بۇل ستاۆكانى تاعى  كىمدەر قولدانادى? بۇل ماسەلە قوسىمشا تالقىلاۋدى قاجەت ەتەدى. ءبىز بارلىق قىزمەت ءتۇرى بويىنشا ۇسىنىستاردى جينايمىز, ەسەپتەپ سانايمىز جانە سىزدەرمەن بىرگە شەشەمىز», — دەدى ۆيتسە-پرەمەر.

وسى ورايدا جۇمانعارين نەلىكتەن 10% ۇسىنىلىپ وتىرعانىن ءتۇسىندىردى.

«بۇل اكىمشىلەندىرۋدىڭ كۇردەلىلىگىنە بايلانىستى. ەڭ الدىمەن بيزنەس ءۇشىن. مولشەرلەمەلەر كوپ بولعان كەزدە بۋحگالتەرلىك ەسەپ كۇردەلەنە تۇسەدى, دەكلاراتسيا جاساۋ قيىنعا سوعادى. بۇعان جول بەرمەۋ ءۇشىن ءبىز 16%, 10%, 0% جانە سالىقتان بوساتۋدى ۇسىنامىز», — دەدى ول.

پرەمەر-مينيستر ولجاس بەكتەنوۆ ۇكىمەت ۇسىنىپ وتىرعان مولشەرلەمەلەردى وڭىرلەردە حالىقپەن تالقىلاۋدى تاپسىردى.

«جالپى ۇسىنىستاردى قولدايمىز. وسى اپتادا وڭىرلەرگە بارىپ, حالىقتىڭ بارلىق ساناتىمەن ەگجەي-تەگجەيلى تالقىلاۋ كەرەك. مەن دە استانادا جانە وڭىرلەرگە بارىپ, تالقىلاۋلار وتكىزەمىن. وسى جۇمىستىڭ ناتيجەسى بويىنشا سالىق كودەكسىنىڭ جوباسى مەن ىلەسپە زاڭ جوباسىنا تۇزەتۋلەردى 20 اقپانعا دەيىن ماجىلىسكە ەنگىزۋ كەرەك. ارى قاراي ماجىلىستە تالقىلاۋدى جالعاستىرامىز», — دەدى بەكتەنوۆ.