جاڭالىقتار
ۇكىمەت توتەنشە رەزەرۆتەن 1,3 ميلليارد تەڭگە بولەدى
قر پرەمەر-ءمينيسترى ولجاس بەكتەنوۆ ۇكىمەتتىڭ توتەنشە رەزەرۆىنەن قوستاناي وبلىسىندا اۋقىمدى سۋ تاسقىنى سالدارىنان زاقىمدالعان ەلەكتر بەرۋ جەلىلەرىن قالپىنا كەلتىرۋگە 1,3 ميلليارد تەڭگەدەن استام قاراجات ءبولۋ تۋرالى قاۋلىعا قول قويدى,-دەپ حابارلايدى Qandastar.kz
جوندەۋ جۇمىستارى ارقالىق قالاسىندا, امانگەلدى جانە جانگەلدى اۋداندارىندا جۇرگىزىلەدى, بۇل جەرگىلىكتى تۇرعىنداردى تۇراقتى ەلەكترمەن قامتاماسىز ەتۋگە مۇمكىندىك بەرەدى.
بيىل 27 ناۋرىزدا وزەندەر مەن سۋ ايدىندارىنداعى سۋ دەڭگەيىنىڭ بىردەن كوتەرىلۋىنە بايلانىستى قوستاناي وبلىسىنىڭ وڭتۇستىك اۋداندارى سۋ استىندا قالدى. سونىڭ سالدارىنان اۋەدەگى ەلەكتر جەلىلەرى مەن ترانسفورماتورلىق قوسالقى ستانسالاردىڭ تىرەكتەرى استىنداعى توپىراق شايىلىپ كەتتى. بۇل ولاردىڭ زاقىمدالۋىنا جانە 37 ەلدى مەكەننىڭ تۇرعىندارىن ەلەكترمەن جابدىقتاۋدى شەكتەۋگە اكەلدى. تەحنيكالىق تەكسەرىس قورىتىندىسى بويىنشا 989 زاقىمدالعان تىرەك انىقتالعان.
«بۇگىندە بارلىق ءىرى ەلدى مەكەندەردە ەلەكترمەن جابدىقتاۋ ۋاقىتشا سحەما بويىنشا قالپىنا كەلتىرىلدى. جوندەۋ بريگادالارى سۋ تاسقىنىنىڭ سالدارىن مۇمكىندىگىنشە تەز جويۋ ءۇشىن جۇمىستى جالعاستىرىپ جاتىر», – دەلىنگەن حابارلامادا.
بارلىعى 12 مىڭ تۇرعىن ءۇي (جتق) جانە 26 مىڭ ساياجاي ۋچاسكەلەرى سۋ استىندا قالدى. زاقىم كەلگەن 17 982 ۇيگە تەكسەرۋ جاسالىپ, 15 685-ءىن باعالاۋ جۇمىسى اياقتالدى. ولاردىڭ جارتىسىنا جۋىعى جوندەۋدى جانە قالپىنا كەلتىرۋدى قاجەت ەتەدى. وسى ماقساتتارعا 38,6 ميلليارد تەڭگە ءبولىنىپ, 5823 وتباسى وتەماقى الدى.
8 مىڭنان استام ءۇي اپاتتى دەپ تانىلدى. ولار بويىنشا ازاماتتاردىڭ تالاپ-تىلەگىنە بايلانىستى زالالدى وتەۋدىڭ 2 نۇسقاسى قاراستىرىلعان: قايتالاما نارىقتا پاتەر نەمەسە ءۇي ساتىپ الۋ; ءۇي سالىپ بەرۋ.
3155 وتباسى جاڭا باسپانا الدى. وڭىرلەردە 2049 ءۇيدىڭ قۇرىلىسى بەلسەندى جۇرگىزىلىپ جاتىر. جالپى تۇرعىن ءۇيدى قالپىنا كەلتىرۋگە جانە سالۋعا 251 ميلليارد تەڭگە باعىتتالعانى ايتىلدى.
سونىمەن قاتار, ينجەنەرلىك, الەۋمەتتىك ينفراقۇرىلىمعا جانە جولدارعا زيان كەلدى. اتاپ ايتقاندا, 2,3 مىڭنان استام ەنەرگيامەن جابدىقتاۋ تىرەكتەرى قيراپ, 54 كم جەلى ءۇزىلدى. 40 پايىزدان استامى بۇگىندە قالپىنا كەلتىرىلدى, جاز ايلارىندا جۇمىس قارقىنى ارتادى.
