«ۇكىمەت ۋادەسىن ورىنداعان جوق»: دەپۋتات ورمانشىلاردىڭ جالاقىسى وسپەگەنىن ايتىپ, ماسەلە كوتەردى

فوتو:  parlam.kz

2024 جىلعى 1 شىلدەدە ەلىمىزدەگى ورمان شارۋاشىلىعى جانە تابيعاتتى قورعاۋ مەكەمەلەرى قىزمەتكەرلەرىنىڭ جالاقىسىنا ۇستەماقى قوسۋ تۋرالى قاۋلىعا قول قويعان بولاتىن.

ءماجىلىس دەپۋتاتى نارتاي سارسەنعاليەۆ ورمانشىلاردىڭ جالاقىسىنا بايلانىستى پرەمەر-ءمينيستردىڭ ورىنباسارى رومان سكليارعا دەپۋتاتتىق ساۋال جولدادى, – دەپ حابارلايدى qandastar.kz turkystan.kz-كە سىلتەمە جاساپ.

بۇگىنگى دەپۋتاتتىق ساۋالىم بيلىكتىڭ قۇجات جۇزىندەگى جاعىمدى جاڭالىعىنا سەنىپ سان مارتە سان سوققان جۇرتتىڭ جانايقايى جايىندا. رەتىمەن ايتايىن, سەمەي ورمانىندا ءورت بولىپ ونداعان وتانداسىمىز وپات بولعان كەزدە ۇكىمەت وكىلدەرى «2023 جىلدىڭ 1 شىلدەسىنەن باستاپ ورمانشىلاردىڭ جالاقىسى وسەدى» دەپ كەسىپ ايتقان ەدى. بىراق ايتىلعان ءسوز ايتىلعان جەردە قالدى. جالاقى ورمان شارۋاشىلىعىنداعى باسشىلىق قۇرام مەن ساناۋلى ماماندىق يەسىنە قوسىلعانى بولماسا ورمان ءۇشىن وت كەشكەن مىڭداعان مامان تۇككە جەتپەيتىن جالاقىمەن سول كۇيى قالا بەردى. اتالعان ماسەلەنى بىلتىر قىركۇيەكتە ءماجىلىستىڭ تورىنەن كوتەرگەنىمدە ۇكىمەت وكىلدەرى, سالالىق مينيستر «جالاقىنى وسىرەمىز» دەپ ۋادەنى ءۇيىپ-توكتى. بۇل جولى وتتان كويلەك كيىپ ورمان ورتىمەن كۇرەسەتىن مامانداردىڭ جالاقىسى وسەر دەپ قاتتى ۇمىتتەندىك, 1 جىل دەگەندە اقجولتاي اقپارات كەلدى, – دەدى ول.

2024 جىلعى 1 شىلدەدە پرەمەر-مينيستر ولجاس بەكتەنوۆ ەلىمىزدەگى ورمان شارۋاشىلىعى جانە تابيعاتتى قورعاۋ مەكەمەلەرى قىزمەتكەرلەرىنىڭ لاۋازىمدىق جالاقىلارىنا ۇستەماقى قوسۋ تۋرالى  قاۋلىعا قول قويعان بولاتىن.

ورمان جانە تابيعاتتى قورعاۋ ۇيىمدارى قىزمەتكەرلەرىنە ەڭبەكاقى تولەۋ جۇيەسىن, شارتتارى مەن مولشەرلەرىن جەتىلدىرۋ ماقساتىندا «ازاماتتىق قىزمەتشىلەرگە, مەملەكەتتىك بيۋدجەت قاراجاتى ەسەبىنەن قارجىلاندىرىلاتىن ۇيىمداردىڭ قىزمەتكەرلەرىنە ەڭبەكاقى تولەۋ جۇيەسى تۋرالى» قازاقستان رەسپۋبليكاسى ۇكىمەتىنىڭ قاۋلىسىنا وزگەرىستەر ەنگىزىلدى. بوركىمىزدى اسپانعا اتىپ الاقايلادىق.قۇجاتقا سايكەس, ورمان ءورتىن ءسوندىرۋ بەكەتتەرىنىڭ, ورمان شارۋاشىلىعى مەكەمەلەرىنىڭ, قورشاعان ورتانى قورعاۋ جانە ورمان ورنالاستىرۋ ۇيىمدارىنىڭ قىزمەتكەرلەرى لاۋازىمدىق جالاقىلارىنا 100 پايىزعا دەيىن وسىماقى الۋى كەرەك ەدى. ولاردىڭ قاتارىندا ورمان ءورتىن سوندىرۋشىلەر, ءورت ءسوندىرۋ كولىگىنىڭ جۇرگىزۋشىلەرى, تراكتورشىلار, راديو وپەراتورلار, ءورت ءسوندىرۋ ماشينالارىن, جابدىقتار مەن اپپاراتتاردى جوندەۋ جونىندەگى شەبەرلەر, ءورت باقىلاۋ مۇناراسىنىڭ باقىلاۋشىلارى بار ەدى. شىلىڭگىر شىلدەدەن باستاپ جالاقىمىز ەسەلەپ ارتادى دەپ ەلدىڭ ەڭسەسى تىكتەلىپ قالدى. بىراق, 2023 جىلى ءۇمىتىنىڭ ك ۇلى كوككە ۇشقان ورمانشىلار 2024 جىلى دا ءدال سول جاعدايدى باستان كەشۋدە. سەبەبى اتالعان قاۋلى قىزىلوردا وبلىسىندا,  ارال اۋدانىندا, پاۆلودار وبلىسىندا, ماڭعىستاۋ وبلىسىندا, قوستاناي وبلىسىندا, جەتىسۋ وبلىسىندا ورىندالمادى دەگەن دەرەك كەلدى. ورمانشىلاردىڭ جازعان ارىزى دا مىنە مەنىڭ قولىمدا. ورمانشىلاردىڭ جالاقىسىن كوتەرۋدىڭ جۇگى جەرگىلىكتى بيۋدجەتكە ارتىلىپتى, ول قامبادا قارجى جوق ەكەن. قاۋلىسى بار دا قارجىسى جوق. AMANAT پارتياسى بۇل جاعدايدى بىرنەشە رەت كوتەرگەنىن قاپەرلەرىڭىزگە سالا كەتەيىن. سالدارى اۋىر, جالاقىنىڭ تومەندىگىنەن جاستار ورمانشى بولىپ قىزمەتكە بارعىسى كەلمەيدى. ورمان بار, ورىن بوس, جالاقى جەتپەيدى. جوعارىدا ايتىلعان ماسەلەلەردى زەردەلەپ, 2024 جىلدىڭ 1 شىلدەسىندە قول قويىلعان  قاۋلىنىڭ تولىققاندا ورىندالۋىن قاداعالاپ, قازاقستانداعى ورمان شارۋاشىلىعىنداعى مامانداردىڭ لاۋازىمدىق جالاقىلارىنا 100 پايىزدىق وسىماقىنىڭ قوسىلۋىن قامتاماسسىز ەتۋىڭىزدى سۇرايمىن, – دەدى دەپۋتات.