«Úkimet ýádesin oryndaǵan joq»: depýtat ormanshylardyń jalaqysy óspegenin aıtyp, másele kóterdi

Foto:  parlam.kz

2024 jylǵy 1 shildede elimizdegi orman sharýashylyǵy jáne tabıǵatty qorǵaý mekemeleri qyzmetkerleriniń jalaqysyna ústemaqy qosý týraly qaýlyǵa qol qoıǵan bolatyn.

Májilis depýtaty Nartaı Sársenǵalıev ormanshylardyń jalaqysyna baılanysty Premer-mınıstrdiń orynbasary Roman Sklıarǵa depýtattyq saýal joldady, – dep habarlaıdy qandastar.kz turkystan.kz-ke silteme jasap.

Búgingi depýtattyq saýalym bıliktiń qujat júzindegi jaǵymdy jańalyǵyna senip san márte san soqqan jurttyń janaıqaıy jaıynda. Retimen aıtaıyn, Semeı ormanynda órt bolyp ondaǵan otandasymyz opat bolǵan kezde Úkimet ókilderi «2023 jyldyń 1 shildesinen bastap ormanshylardyń jalaqysy ósedi» dep kesip aıtqan edi. Biraq aıtylǵan sóz aıtylǵan jerde qaldy. Jalaqy orman sharýashylyǵyndaǵy basshylyq quram men sanaýly mamandyq ıesine qosylǵany bolmasa orman úshin ot keshken myńdaǵan maman túkke jetpeıtin jalaqymen sol kúıi qala berdi. Atalǵan máseleni byltyr qyrkúıekte Májilistiń tórinen kótergenimde Úkimet ókilderi, salalyq mınıstr «jalaqyny ósiremiz» dep ýádeni úıip-tókti. Bul joly ottan kóılek kıip orman órtimen kúresetin mamandardyń jalaqysy óser dep qatty úmittendik, 1 jyl degende aqjoltaı aqparat keldi, – dedi ol.

2024 jylǵy 1 shildede Premer-Mınıstr Oljas Bektenov elimizdegi orman sharýashylyǵy jáne tabıǵatty qorǵaý mekemeleri qyzmetkerleriniń laýazymdyq jalaqylaryna ústemaqy qosý týraly  qaýlyǵa qol qoıǵan bolatyn.

Orman jáne tabıǵatty qorǵaý uıymdary qyzmetkerlerine eńbekaqy tóleý júıesin, sharttary men mólsherlerin jetildirý maqsatynda «Azamattyq qyzmetshilerge, memlekettik bıýdjet qarajaty esebinen qarjylandyrylatyn uıymdardyń qyzmetkerlerine eńbekaqy tóleý júıesi týraly» Qazaqstan Respýblıkasy Úkimetiniń qaýlysyna ózgerister engizildi. Bórkimizdi aspanǵa atyp alaqaıladyq.Qujatqa sáıkes, orman órtin sóndirý beketteriniń, orman sharýashylyǵy mekemeleriniń, qorshaǵan ortany qorǵaý jáne orman ornalastyrý uıymdarynyń qyzmetkerleri laýazymdyq jalaqylaryna 100 paıyzǵa deıin ósimaqy alýy kerek edi. Olardyń qatarynda orman órtin sóndirýshiler, órt sóndirý kóliginiń júrgizýshileri, traktorshylar, radıo operatorlar, órt sóndirý mashınalaryn, jabdyqtar men apparattardy jóndeý jónindegi sheberler, órt baqylaý munarasynyń baqylaýshylary bar edi. Shilińgir shildeden bastap jalaqymyz eselep artady dep eldiń eńsesi tiktelip qaldy. Biraq, 2023 jyly úmitiniń kúli kókke ushqan ormanshylar 2024 jyly da dál sol jaǵdaıdy bastan keshýde. Sebebi atalǵan qaýly Qyzylorda oblysynda,  Aral aýdanynda, Pavlodar oblysynda, Mańǵystaý oblysynda, Qostanaı oblysynda, Jetisý oblysynda oryndalmady degen derek keldi. Ormanshylardyń jazǵan aryzy da mine meniń qolymda. Ormanshylardyń jalaqysyn kóterýdiń júgi jergilikti bıýdjetke artylypty, ol qambada qarjy joq eken. Qaýlysy bar da qarjysy joq. AMANAT partııasy bul jaǵdaıdy birneshe ret kótergenin qaperlerińizge sala keteıin. Saldary aýyr, jalaqynyń tómendiginen jastar ormanshy bolyp qyzmetke barǵysy kelmeıdi. Orman bar, oryn bos, jalaqy jetpeıdi. Joǵaryda aıtylǵan máselelerdi zerdelep, 2024 jyldyń 1 shildesinde qol qoıylǵan  qaýlynyń tolyqqanda oryndalýyn qadaǵalap, Qazaqstandaǵy orman sharýashylyǵyndaǵy mamandardyń laýazymdyq jalaqylaryna 100 paıyzdyq ósimaqynyń qosylýyn qamtamassyz etýińizdi suraımyn, – dedi depýtat.